ជំលោះរវាងលោក សុខ រ៉ាស៊ី និងលោក អ៊ិន សុភិន មកដល់ពេលនេះហាក់នៅមិនទាន់មានពន្លឺទោះជាបានជួបសម្រុះសម្រួលមុខសមត្ថកិច្ចលើកទីមួយ ប៉ុន្តែភាគីលោក សុខ រ៉ាស៊ី នៅតែមានភាពជឿជាក់ថាលោកនឹងឈ្នះក្ដីនេះរហូតដល់ ៩០ភាគរយដដែល។
សូមចុចអាន អស់ការអត់ទ្រាំ លោក សុខ រ៉ាស៊ី ប្រកាសប្ដឹងលោក អ៊ិន សុភិន ទៅតុលាការ!
យោងតាមការសម្ភាសន៍ផ្ទាល់ជាមួយនឹងលោក សុខ រ៉ាស៊ី តាមរយៈសារអេឡិចត្រូនិចលោកបានលើកឡើងជាច្រើនលើកច្រើនសារនៅតាមបណ្ដាញសង្គម មកដល់ពេលនេះភាគីពិធីករល្បីបានឱ្យដឹងថា លោកបានជួបសម្រុះសម្រួលម្ដងនៅមុខសមត្ថកិច្ចស្នងការដ្ឋាននគរបាលរាជធានីភ្នំពេញ។
ក្នុងជំនួបចចារលើកទីមួយនេះមិនជោគជ័យនោះទេ ព្រោះមានចំណុចមួយចំនួនលោក សុខ រ៉ាស៊ីមិនអាចទទួលយកបាននោះទេ ដូចជាភាគីលោក អ៊ិន សុភិន បានស្នើឱ្យខាងលោកចេញលិខិត ឬ Live វីដេអូជាសាធារណៈសុំទោសដើម្បីជួយស្ដារនិងលាងកិត្តិយស កេរ្តិ៍ឈ្មោះគាត់វិញ ដែលត្រង់នេះលោក សុខ រ៉ាស៊ី បានប្រកែកដាច់អហង្ការ លោកមិនសុំទោសជាដាច់ខាត លោកអះអាងថាលោកមិនមានកំហុសទេ ព្រោះលោកបានទុកពេលដល់ទៅមួយឆ្នាំ ដើម្បីឱ្យលោក អ៊ិន សុភិន សងប្រាក់ហើយ។
លោក សុខ រ៉ាស៊ី បានឆ្លើយតបមកកាន់សារព័ត៌មានត្រយងទៀតថាមកដល់ដំណាក់ការនេះលោកទុកឱ្យច្បាប់ជាអ្នកដោះស្រាយ ព្រោះលោកជឿជាក់ដល់ទៅ៩០ភាគរយ ថាលោកនឹងឈ្នះ ដោយសារលោកប្រមូលបានភស្ដុតាងតាមរយៈឆាតជាសំឡេងនិងភស្ដុតាងផ្សេងៗទៀតក្ដោបក្ដាប់ក្នុងដៃរួចអស់ហើយទោះជាភាគីម្ខាងទៀតបាន Block លោកក្នុងគោលបំណងលុបបំបាត់ និងបំបិទភស្ដុតតាងក្ដី។
លោក សុខ រ៉ាស៊ីបានបញ្ជាក់ជាចុងក្រោយដែរថាលោកមានការឈឺចាប់ព្រោះកន្លងមក លោកមានលុយមានឡានជិះ តែពេលនេះលោកធ្លាក់ខ្លួនរហូត ជិះម៉ូតូទៅធ្វើពិធីករអោយគេ ដោយសារគាត់ សំដៅដល់លោក អ៊ិន សុភិន។ លោកបានបន្ថែមដែរថា លោកចង់ឱ្យបុគ្គលនេះ រៀងចាល កុំអោយធ្វើបែបនេះ ដាក់អ្នកសិល្បៈផ្សេងៗទៀត៕
ទស្សនាវីដេអូព័ត៌មានលោក សុខ រ៉ាស៊ី ខាងក្រោមនេះ៖
