ក្លិបបាល់ទាត់ចំនួន៣បានបានប្រកាសពីការដោះដូរកីឡាករ២នាក់ នៅក្នុងពានរង្វាន់លីគកំពូលកម្ពុជា Cambodian Premier League 2023-24 មុនទីផ្សារដោះដូរកីឡាករក្នុងស្រុកបើកទ្វាក្នុងជើងទី២ ដែលមានរយៈពេល២៧ថ្ងៃ ចាប់ពីថ្ងៃអង្គារ ទី១៤ ខែវិច្ឆិកា ឆ្នាំ២០២៣ តទៅ។
កីឡាករទាំង២នាក់នោះមានកីឡាករអេស្ប៉ាញ Victor Blasco បានប្រកាសចាកចេញពីក្លិបអង្គរថាយហ្គឺរ ដែលមានមូលដ្ឋាននៅខេត្តសៀមរាប ស្របពេលដែលខ្សែការពារវ័យក្មេង លឹម អារុណរ៉េយមិន បានចាកចេញពីក្រុមណាហ្គាវើល ទៅកាន់កងយោធពលខេមរភូមិន្ទ (Tiffy Army FC) ក្រោយមិនបានបង្ហាញខ្លួនទាល់តែសោះជាមួយក្រុមនៅខេត្តកំពង់ស្ពឺ មួយនេះ។
ជាមួយគ្នានេះដែរ ក្លិប Tiffy Army FC បានដំឡើងកីឡាករពីក្រុមឈុតយុវជនរបស់ខ្លួនចំនួន៤នាក់ ពីលីគទី២ (Cambodian League 2) អោយឡើងមកឈុតធំ សម្រាប់ជើងទី២នេះ ក្នុងនោះមានកីឡាករ ជ សុវិសាល, សា យូសុះ, ជុង សាណាត , លាង ពិសី។
អត្ថបទពាក់ព័ន្ធ៖ទីផ្សារដោះដូរកីឡាករ ជើងទី២ លីគកំពូលកម្ពុជា រដូវកាល ២០២៣-២៤ មានពេល២៧ថ្ងៃ
សូមបញ្ជាក់ថាក្រុមហ៊ុន Cambodian Premier League បានជូនដំណឹងពីកាលបរិច្ឆេទនៃការផ្ទេរកីឡាករជាតិ និងកីឡាករអន្តរជាតិ លើកទី២ (Transfer Window 2) តាមប្រព័ន្ធអនឡាញ (FIFA TMS and FIFA CONNECT) ចាប់ពីថ្ងៃទី១៤ ខែវិច្ឆិកា ២០២៣ ហើយបិទទៅវិញថ្ងៃទី១១ ខែធ្នូ ២០២៣ ដោយក្នុងនោះក្លិបជាសមាជិកអាចបន្ថែមកីឡាករក្នុងក្រុមខ្លួនបាន៖
– កីឡាករជាតិ ៦រូប
– កីឡាករអន្តរជាតិ ៣រូប
ពានរង្វាន់លីគកំពូលកម្ពុជា មានសមាជិកចំនួន១០ក្រុម ដោយដំណើរការប្រកួតពីថ្ងៃទី០៥ ខែសីហា ឆ្នាំ២០២៣ ដល់ថ្ងៃទី១២ ខែឧសភា ឆ្នាំ២០២៤ ដោយតម្រូវប្រកួតចំនួន៣ជុំសិន ហើយក្រុមដែលមានចំណាត់ថ្នាក់ល្អជាងគេចំនួន៤ក្រុម មានឈ្មោះឡើងទៅប្រកួតវិលជុំម្នាក់១លើកទៀត មុនរកឃើញម្ចាស់ជើងឯកប្រចាំរដូវកាល៕