សិល្បៈជាតិ៖ មិនឱ្យចាញ់ក្មេងៗនោះឡើយ នៅថ្ងៃទី១៤ ខែកុម្ភៈដែលជាទិវានៃក្ដីស្រលាញ់ឧកញ៉ា ព្រាប សុវត្ថិបានបង្ហាញភាពផ្អែមល្ហែមដាក់ឧត្តមភរិយាដែលបានចាប់ដៃគ្នាសាងគ្រួសាររហូតដល់ទៅ២៦ឆ្នាំកន្លងមកហើយ។
នៅក្នុងការបង្ហោះមួយនាថ្ងៃទី១៤ ខែកុម្ភៈ ឆ្នាំ២០២៤ ឧកញ៉ា ព្រាប សុវត្ថិ ដោយមានភ្ជាប់រូបភាពខ្លួនជូនផ្កាកុលាបមួយទងដល់ភរិយា លោកបានសរសេរថា៖ «បងស្រលាញ់អូនរាល់ថ្ងៃ មិនថាថ្ងៃនេះឬថ្ងៃស្អែក ស្រលាញ់មយយជីវិត អូនដឹងអត់?» ដែលពាក្យប៉ុន្មានម៉ាត់នេះបានធ្វើឱ្យមហាជនមានអារម្មណ៍រំភើបជំនួសឧត្តមភរិយារបស់លោក ជាពិសេសនោះគឺនារីតែម្ដង។
មិនអស់ត្រឹមនេះឡើយ ព្រោះក្រោយមកទៀត លោកឧកញ៉ា ក៏បានបង្ហោះរូបភាពជាវីដេអូថែមទៀតនៅលើបណ្ដាញសង្គម Tiktok ដោយក្នុងនោះគេឃើញលោកបានឱបនិងថើបភរិយារបស់លោកពោរពេញទៅដោយក្ដីស្រលាញ់ថែមទៀត ដែលត្រង់ចំណុចនេះសម្រាប់អ្នកអត់គូ អាចនឹងអៀនមិនហ៊ានមើលក៏ថាបាន។
អ្នកតាមដានសង្កេតឃើញថារយៈពេល២៦ឆ្នាំ នៃចំណងអាពាហ៍ពិពាហ៍ រហូតបង្កើតបានសាក្សីស្នេហ៍ជាកំលោះសង្ហា៣រូប គេមិនដែលឃើញគ្រួសារលោក ព្រាប សុវត្ថិ លេចឮពាក្យចចាមអារ៉ាម ឬដំណឹងអាស្រូវស្នេហាធ្វើឱ្យភរិយារងទឹកភ្នែកណាស់ ភាគច្រើនគេឃើញតែភាពផ្អែមល្ហែម ស្រលាញ់ យល់ចិត្តគ្នាប៉ុណ្ណោះ ដែលគូស្នេហ៍ទាំងពីរមានឱ្យគ្នាទៅវិញទៅមក។
សូមអាន៖ បង្ហោះរូបខួបរៀបការតែអ្នកគាំទ្រ នាំគ្នាសួរលោក ព្រាប សុវត្ថិ នូវសំនួរបែបនេះទៅវិញ!
សូមរំលឹកឡើងវិញថាឧកញ៉ា ព្រាប សុវត្ថិ និង ភរិយា លោកស្រី ឡុង ស្រីមុំ បានរៀបអាពាហ៍ពិពាហ៍ជាមួយគ្នាកាលពីឆ្នាំ ១៩៩៧ និង មានចំណងដៃកូនប្រុសចំនួន ៣នាក់ដែលបច្ចុប្បន្នសុទ្ធតែជាតារាចម្រៀងប្រចាំផលិតកម្មហង្សមាស៕