កីឡាករ Zhang Linpeng ប្រធានក្រុមជម្រើសជាតិចិន បានប្រកាសចូលនិវត្តន៍ ពីជម្រើសជាតិក្រោយមិនអាចជួយក្រុមជម្រើសជាតិរបស់ខ្លួន យកឈ្នះលើក្រុមសិង្ហបុរី បានក្នុងការប្រកួតវគ្គជម្រុះពានរង្វាន់ពិភពលោក ជើងទី១ កាលពីថ្ងៃទី២១ ខែមីនា ឆ្នាំ២០២៤ កន្លងទៅ។
ក្រោយចប់ការប្រកួតរវាងក្រុមជម្រើសជាតិចិន ទល់នឹងក្រុមជម្រើសជាតិសិង្ហបុរី ដែលលទ្ធផលក្រុមចិន បានត្រឹមស្នើ ២ទល់នឹង២ ជាមួយម្ចាស់ផ្ទះសិង្ហបុរី នៃកាប្រកួតជម្រុះជុំទី២ ជើងទី១ នៃពានរង្វាន់បាល់ ទាត់ពិភពលោក FIFA World Cup 2026 កន្លងទៅក្នុងកីឡដ្ឋាន Singapore National Stadium ។ ខ្សែការពារ Zhang Linpeng ដែលជាតួរអង្គសម្ខាន់របស់ក្រុមជម្រើសជាតិចិន រូបនោះបានប្រកាសចូលនិវត្តន៍ តែម្ដង។
យ៉ាងណាមិញមិនទាន់មានប្រភពណាដែលបានបញ្ជាក់ពីហេតុផលជាក់លាក់ពីប្រធានក្រុមរូបនោះឡើយ ប៉ុន្តែបើយោងតាមការចេញផ្សាយពីគេហទំពរ របស់ប្រទេសចិន South China Morning Post ចុះផ្សាយកាលពីពេលកន្លងទៅថា ដើមចមនៃការចូលនិវត្តន៍របស់កីឡាករ Zhang Linpeng គឺរូបគេមិនសូវពេញចិត្តនឹងទម្រង់លេងរបស់មិត្តរួមក្រុមរបស់ខ្លួន។
ទោះយ៉ាងណាក្តី សម្រាប់ក្រុមជម្រើសជាតិចិន បានយកឈ្នះសិង្ហបុរី វិញក្នុងការប្រកួតជើងទី២ ដោយលទ្ធផល ៤-១ ដែលប្រកួតនោះធ្វើឡើងនៅកីឡដ្ឋាន Tianjin Olympic Centre ស្ថិតក្នុងទីក្រុង Tianjin ប្រទេសចិន។
កន្លងមកក្រុមជម្រើសជាតិចិន បានកែប្រែក្បាលម៉ាស៊ីរបស់ខ្លួនដែលបានកំចាត់មន្ត្រីពុករលួយ មួយចំនួន ថែមទាំងប្រធានសហព័ន្ធ គ្រូបង្វឹក និងកីឡាករមួយចំនួនថែមទៀតផងពាក់ព័ន្ធនឹងរឿងស៊ី សំណូក និងរៀបចំលទ្ធផលការប្រកួត។
គួរឱ្យដឹងថា កីឡាករ Zhang Linpeng កើតនៅថ្ងៃទី៩ ខែឧសភា ឆ្នាំ១៩៨៩ បច្ចុប្បន្នមានវ័យ ៣៤ឆ្នាំ កំពុងប្រកបអាជីបនៅក្លិប Shanghai Port ប្រទេសចិន បានបង្ហាញខ្លួន ៤៥ប្រកួត រកបាន២គ្រាប់ ក្នុងនាមជាខ្សែការពារ។ ក្នុងក្រុមជម្រើសជាតិវិញ បុរស់កម្ពស់១.៨៥ ម៉ែត្រ រូបនេះ បង្ហាញខ្លួននៅជម្រើសជាតិតាំងពីឆ្នាំ២០០៩ បានចំនួន ១០៥ ប្រកួតថែមទាំងរកបាន ៦គ្រាប់ទៀតផង។
ដោយលែកសម្រាប់ភារៈកិច្ចក្នុងពានរង្វាន់បាល់ទាត់ពិភពលោក FIFA World Cup2026 ក្រុមជម្រើសជាតិចិន គឺស្ថិតនៅពូល C ជាមួយក្រុមខ្លាំងកូរ៉េ ខាងត្បូង, ថៃ និងសិង្ហបុរី កំពុងឈរនៅលេខ២ ក្រោមកូរ៉េ ខាងត្បូង ក្រោយឆ្លងកាត់៤ប្រកួត ឈ្នះ២ ស្មើ១ និងចាញ់១ ក្រោមការដឹកនាំរបស់លោក Branko Ivankovic ជនជាតិ ក្រូអាស៊ី ជាគ្រូបង្វឹក។
ក្រុមជម្រើសជាតិចិន នឹងបន្តជួបក្រុមជម្រើសជាតិថៃ សម្រាប់ជើងទី២ នៃពានរង្វាន់ FIFA World Cup 2026 នៅប្រទេសចិន ខណៈកាលពីជើងទី១ ចិនបានយកឈ្នះថៃ ដោយលទ្ធផល ២-១៕