កាលពីពេលថ្មីៗនេះ លោក យក់ ឆេងហាក់ តារាសម្ដែង និងជាពិធីករដ៏លេចធ្លោមួយរូប ធ្លាប់ចេញមកបកស្រាយពាក់ព័ន្ធលើការក្លែងបន្លំយករូបថតលោកទៅបង្កើតគណនីហ្វេសប៊ុកក្លែងក្លាយ ប្រើប្រាស់បោកលុយនិងបោកចិត្តស្រី រហូតកើតមានការភាន់ច្រឡំពីសំណាក់នារីរងគ្រោះនោះ នៅពេលនេះលោកបានចាត់ចំណាត់ការផ្លូវច្បាប់ហើយ ក្រោយពីព្យាយាមពន្យល់និងបកស្រាយច្រើនដងតែភាគីនារីរងគ្រោះនៅតែបន្តតាមឆាឆៅនិងធ្វើឱ្យប៉ះពាល់ដល់កិត្តិយសនិងសេចក្ដីថ្លៃថ្នូររបស់លោក។
សូមចុចអាន យក់ ឆេងហាក់ តារាវ័យក្មេងត្រូវជនអនាមិកប្រើរូបបោកប្រាស់លុយស្រីរាប់ពាន់ដុល្លារ!
យោងតាមការបញ្ជាក់ពីលោក យក់ ឆេងហាក់កាលពីពេលកន្លងមកនេះ មានគណនីមួយឈ្មោះ Vanna Rong Rath បានយករូបថតលោកទៅក្លែងបន្លំបង្កើតជាគណនីក្លែងក្លាយរួចប្រើប្រាស់រូបរបស់លោកទៅបោកប្រាស់ចិត្តនិងលុយពីនារីរងគ្រោះ ហើយនៅពេលដែលលោកទទួលបានដំណឹងនេះ លោកបានព្យាយាមពន្យល់ និងបកស្រាយប្រាប់ទៅនារីរងគ្រោះនោះជាច្រើនលើក ប៉ុន្តែហាក់គ្មានប្រសិទ្ធិភាព ដោយនារីរងគ្រោះនោះនៅតែយល់ច្រឡំថាលោកជាម្ចាស់គណនីបោកប្រាស់ដែលមានឈ្មោះដូចខាងលើដដែល។
មិនតែប៉ុណ្ណោះភាគីនារីរងគ្រោះបានបន្តផុសនិងបង្ហោះលើបណ្ដាញសង្គម (Facebook) ដោយបានប្រើប្រាស់ពាក្យពេចន៍មួយចំនួនដែលធ្វើឱ្យប៉ះពាល់ដល់កិត្តិយសនិងសេចក្ដីថ្លៃថ្នូររបស់លោកដូចមានរៀបរាប់ខាងក្រោមនេះ៖
«បើស្អាតសង្ហារតែរូបឯងចិត្តគំនិតអនជាងសត្វទៅទៀតខ្ញុំមិនចង់ផុសរូបអ្នកឯងទ ព្រោះខ្ញុំដឹងថាអ្នកជាតារាល្បីអ្នកដែលគេស្គាល់ច្រើនតែគំនិតអ្នកថោកជាងសត្វទៅទៀតពេលមានបញ្ហាអ្នកឯងឲ្យខ្ញុំ ជួយដោះស្រាយគ្រប់យ៉ាងដល់ពេលចុងក្រោយវិញអ្នកឯងសម្តែងចរិតពិតចេញមកឲ្យគេស្គាល់ថាអ្នកជាមនុស្សកំពូល តារាបោកកុំគិតថាខ្ញុំមិនហ៊ានធ្វើអ្វីអ្នកឯងឲ្យសោះណាខ្ញុំទុក្ខឲ្យអ្នកសិនដល់ពេលណាអ្នកល្បីខ្លាំងដឹងថាមានរឿង អ្វីកើតឡើងហើយណា បើអ្នកដោះស្រាយរឿងលុយខ្ញុំ បងប្អូនជួយស៊ែរអ្នកមួយផង!!»។
ដើម្បីការពារកិត្តិយសរបស់ខ្លួនលោក យក់ ឆេងហាក់ បានងាកមករកចំណាត់ការផ្លូវច្បាប់ឱ្យជួយដោះស្រាយចំពោះករណីចោទប្រកាន់មកលើរូបលោក។ យោងតាមរយៈលិខិតជូនតំណឹងពីសំណាក់មេធាវីរបស់លោក មានសេចក្ដីសង្ខេបយ៉ាងដូច្នេះថា ៖ «ស្នើសុំឱ្យម្ចាស់គណនីហ្វេសប៊ុកចំនួនពីរគឺ អូន អ៊ូក និង La Ma បញ្ឈប់ជាបន្ទាន់រាល់សកម្មភាពធ្វើការបរិហាកេរ្តិ៍ដោយអះអាងនូវព័ត៌មានមិនពិតក្នុងន័យញុះញង់ឱ្យមានការរើសអើងមកកាន់កូនក្ដីខ្ញុំបាទ។ កូនក្ដីខ្ញុំបាទរីករាយសហការជានិច្ចចំពោះម្ចាស់គណនីហ្វេសប៊ុកឈ្មោះ អូន អ៊ូក និង La Ma ប្រសិនបើគាត់ពិតជាជនរងគ្រោះក្នុងករណីឆបោកប្រាក់ពីម្ចាស់គណនីឈ្មោះ Vanna Rong Rath ប្រាកដមែន»
ខាងក្រោមនេះជាលិខិតជូនតំណឹងពីសំណាក់មេធាវីលោក យក់ ឆេងហាក់ ជូនទៅម្ចាស់គណនី អូន អ៊ូក និង La Ma ៖