ក្លិបបាល់ទាត់ Lion City Sailors បានគ្រងជើងឯកពានរង្វាន់លីគកំពូលសិង្ហបុរី (Singapore Premier League) រដូវកាលឆ្នាំ២០២១ នេះ ខណៈក្រុមដែលប្តូរឈ្មោះពី Home United នេះជាក្រុមបាល់ទាត់ក្នុងស្រុកដំបូងដែលឈ្នះជើងឯកប្រទេសខ្លួនគិតចាប់តាំងពីឆ្នាំ២០១៤ មក ព្រោះរាល់លើសុទ្ធតែជាក្រុមបរទេសទាំងអស់គ្រងជើងឯក។
អត្ថបទពាក់ព័ន្ធ៖ក្លិបបាល់ទាត់មួយនៅសិង្ហបុរី ចាប់ដៃជាមួយ Borussia Dortmund របស់អាល្លឺម៉ង់ រយៈពេល២ឆ្នាំកន្លះ
ពានរង្វាន់លីគកំពូលសិង្ហបុរី មានសមាជិក៨ក្រុម ខណៈប្រកួតវិលជុំចំនួន២១ប្រកួត ហើយក្រុម Lion City Sailors បានក្លាយជាម្ចាស់ជើងឯកបន្ទាប់ពីឈ្នះបាន១៤លើក ស្មើ៦លើក និងចាញ់១លើក ទាត់បញ្ជូលទីគេបាន៥៩គ្រាប់ តែគេទាត់ចូលវិញចំនួន២១គ្រាប់។
ក្រុមបាល់ទាត់ Warriors FC ជាក្រុមក្នុងស្រុកដែលឈ្នះពានរង្វាន់ S League នៅឆ្នាំ២០១៤ ហើយគិតពីពេលនោះមកក្រុមបាល់តាត់ DPMM FC របស់ប្រ៊ុយណេ យកឈ្នះជើងឯកបាន២លើក ២០១៥និង២០១៩ និងក្រុមបាល់ទាត់ Albirex Niigata (S) របស់ជប៉ុន យកឈ្នះជើងឯកបាន ៤លើកផងដែរនៅឆ្នាំ២០១៦,២០១៧,២០១៨និង២០២០។
ក្រុមបាល់ទាត់ Lion City Sailors បានចាយប្រាក់យ៉ាងច្រើននៅរដូវកាលនេះពោលគឺបាននាំយកខ្សែបម្រើ Diego Lopesមកពីក្រុម Roi Ave របស់ព័រទុយហ្គាល់ ក្នុងកញ្ចប់ទឹកប្រាក់ប្រមាណជិត៣លានដុល្លារអាមេរិក ហើយនេះជាកំណត់ត្រាខ្ពស់ជាងគេប្រចាំលីគក្នុងអាស៊ានមួយនេះផងដែរ។ មិនត្រឹមតែប៉ុណ្ណោះក្លិបរបស់សេដ្ឋប្រាក់ពាន់លាន Forrest Li បាននាំយកគ្រូបង្វឹកកូរ៉េខាងត្បូង Kim Do-Hoon ដែលធ្លាប់ឈ្នះពាន AFC Champion League មកដឹកនាំក្រុមកាលពីខែឧសភា ផងដែរ។
ក្នុងនាមជាក្រុមជើងឯកក្រុម Lion City Sailors ទទួលបានប្រាក់រង្វាន់ $150,000 មេដាយមាសម្នាក់១ និងពានរង្វាន់ចំនួន១ ហើយក្រុមជើងឯករងAlbirex Niigata (S) ទទួលបានមេដាយប្រាក់ម្នាក់១ អមដោយប្រាក់រង្វាន់ $80,000 និងក្រុមលេខ៣ Hougang United ទទួលបានមេដាយសំរឹទ្ធម្នាក់១ និងទឹកប្រាក់ $40,000។
អត្ថបទពាក់ព័ន្ធ៖សេដ្ឋីប្រាក់ពាន់លាន ថៅកែក្លិប Lion City Sailors ជាប់ជាសមាជិកគណៈកម្មាធិការអូឡាំពិកសិង្ហបុរី
ដូច្នេះក្រុមLion City Sailors មានឈ្មោះឡើងទៅលេងពានរង្វាន់ជើងឯកទ្វីបអាស៊ី AFC Champions League 2022ក្នុងវគ្គចែកពូល ហើយក្រុម Hougang United និងក្រុម Tampines Rovers តំណាងឱ្យសិង្ហបុរី មានឈ្មោះចូលរួមប្រកួតពានរង្វាន់ AFC Cup 2022៕
