ក្រោយស្ងប់ស្ងាត់មួយរយៈធំ បន្ទាប់ពីបានលាចាកសិក្ខាបទ ឧកញ៉ា ហ៊ីង បញ្ញារិទ្ធ ហៅពូម៉ៅ បាន Live លើ Facebook យំរៀបរាប់លែងខ្មាសអៀនថានឹកប្រពន្ធ នឹកកូន ហើយចង់សុំត្រូវរ៉ូវនិងជានាជាមួយនឹងឧត្តមភរិយាគឺឧកញ៉ាទ្រី ដាណាឡើងវិញ។
សូមចុចអាន ស្វាមីឧកញ៉ា ទ្រី ដាណា សម្រេចចិត្តកោរសក់ សាងភ្នួសថ្វាយខ្លួនជូនសាសនា!
នៅក្នុងវីដេអូឃ្លីបយំខ្សឹកខ្សួលរបស់ពូម៉ៅ បានរៀបរាប់ថា «ពេលនេះលោកកំពុងតែស្នាក់នៅផ្ទះម្ដាយរបស់លោក លោកនឹករលឹកដល់ប្រពន្ធកូនជាខ្លាំង ព្រោះរយៈពេលមួយខែហើយដែលលោកមិនបានជួបមុខប្រពន្ធកូន លោកបានលើកឡើងថា នេះមិនមែនជាការសម្ដែងនោះឡើយ ព្រោះក្នុងនាមជាមនុស្សប្រុសមិនយកទឹកភ្នែកដាក់មុខនោះទេ ប៉ុន្តែលោកពិតជាមិនយល់ចិត្តប្រពន្ធលោកសោះ ទំនាស់គ្រួសារតិចតួចហេតុអ្វីបានជាធ្វើដាក់លោកដល់ថ្នាក់។»
សូមចុចអាន ឧកញ៉ា ទ្រី ដាណា បញ្ជាក់ទាំងយប់រឿងខ្លួននិងស្វាមីមិនមែនឈ្លោះយក Like,Share និង View
យំបណ្ដើរពោលរៀបរាប់បណ្ដើរអួលអាក់បណ្ដើរពូម៉ៅ បានបន្តទៀតថា «លោកនឹកប្រពន្ធកូនណាស់ លោកដឹងកំហុសអស់ហើយ ហេតុម្ដេចប្រពន្ធលោកនៅតែមិនលើកលែងទោសឱ្យលោក? លោកខំទៅបួសសាងផលបុណ្យ ដឹងកំហុសគ្រប់យ៉ាង ពេលខ្លះលោកនឹកកូន លោកមើលវីដេអូដែលលោកបានថតទុក លោកស្រក់ទឹកភ្នែក រាល់ដងទៅខេត្តជាមួយប្រពន្ធត្រឹមពីរថ្ងៃលោកនឹកកូនស្ទើរស្លាប់ ចុះទម្រាំបែកមួយខែបែបនេះតើទំហំចិត្តលោកនឹកដល់កូនប៉ុណ្ណា?»
ស្ថិតក្នុងអារម្មណ៍ក្ដុកក្ដួលផងនោះពូម៉ៅ ក៏រៀបរាប់រំលឹករឿងរ៉ាវចាស់តាំងពីនៅបាតដៃទទេ ពេលនេះមានបានសព្វគ្រប់បែបយ៉ាងហើយ ហេតុអ្វីធាក់លោកចេញ? លោកនិយាយថាពេលនេះលោកមិនមានអ្វីទេ ហើយលោកក៏មិនត្រូវការអ្វីដែរ រឿងសំខាន់បំផុតសម្រាប់លោកគឺបានវិលទៅជួបជុំក្រុមគ្រួសារមើលថែទាំប្រពន្ធកូនដូចមុន ព្រោះប្រពន្ធនិងកូនគឺជាទ្រព្យសម្បត្តិដ៏មានតម្លៃរបស់លោក។
ជាចុងបញ្ចប់លោកក៏បានពោលយ៉ាងដូច្នេះដែរថា លោកទទួលកំហុស លោកដឹងខុសហើយ លោកទទួលព្រមទទួលស្គាល់ដែលលោកបាន Live ទាំងស្រវឹងកាលនោះ លោកគ្រាន់តែចង់ឱបកូនប៊ី (កូនប្រុស) របស់លោកវិញ លោកស្រលាញ់កូនណាស់ លោកសុំសន្យាថានេះគឺជាកំហុសចុងក្រោយ លោកនឹងមិនបណ្ដោយឱ្យមានកំហុសលើកទីពីរ លើកទីបីទៀតនោះទេ។
ថ្វីត្បិតតែពូម៉ៅ បានយំរៀបរាប់ថាគ្រប់យ៉ាងជាការពិត មិនមែនជាការសម្ដែងអ្វីនោះទេ ប៉ុន្តែក៏នៅតែមានអ្នកលេងហ្វេសប៊ុកមួយចំនួន ចូលមកឌឺដងឱ្យលោកនិងលើកឡើងជាដដែលថា «ពូម៉ៅសម្ដែង» ខណៈអ្នកខ្លះទៀតបានលើកឡើងពីកំហុសរបស់ពូម៉ៅ ថាបានហែកកេរ្តិ៍គ្រួសារ ហែកកេរ្តិ៍ប្រពន្ធ ហើយនៅថាគ្មានកំហុសទៀត? មនុស្សស្រីចិត្តដាច់ចឹង មិនថាគេមិនថាខ្ញុំ។
យ៉ាងណាមិញបន្ទាប់ពី ពូម៉ៅ បានចេញ Live ឃ្លីបវីដេអូហើយ នៅមិនទាន់ឃើញមានប្រតិកម្មតបតពីភាគីខាងឧកញ៉ា ទ្រី ដាណានៅឡើយទេ ហើយរឿងរ៉ាវរបស់គ្រួសាររបស់បុគ្គលល្បីនេះនឹងចប់ទៅដោយបែបណានោះ ត្រយងនឹងលើកជូនមកជម្រាបជាបន្តបន្ទាប់ទៀត ប្រសិនបើមានអ្វីថ្មីនិងគួរឱ្យចាប់អារម្មណ៍។