បាងកក៖ ប៉ូលិសថៃបានចេញមកព្រមាន ចំពោះអ្នកទស្សនាភាពយន្តភាគកូរ៉េខាងត្បូងដ៏ល្បីល្បាញ «Squid Game» នៅលើ App Netflix ថាមានបង្កប់ទៅដោយឈុតឆាកហិង្សាដែលអាចជាគំរូមួយអវិជ្ជមានដល់អ្នកទស្សនា។
សូមចុចអាន ភាគបញ្ចប់រឿងភាគកូរ៉េល្បី «Squid Game» ធ្វើឱ្យ Super Star បាល់បោះ NBA ផ្ទុះកំហឹ.ង!
អ្នកនាំពាក្យរបស់មន្ត្រីនគរបាលថៃលោក Kissana Phathanacharoen បានលើកឡើងថាសាច់រឿងនេះមានបង្កប់នូវឈុតឈុតឆាកជាច្រើនដែលមិនស័ក្ដិសមនឹងឱ្យទស្សនានោះទេ ជាងនោះទៀតអត្តចរិតរបស់តួអង្គ និងអាកប្បកិរិយាពោរពេញទៅដោយហិង្សា ព្រោះរឿងនេះបានបញ្ជាក់ច្បាស់ថាទស្សនាបានពីអាយុ១៨ឆ្នាំឡើងលើ។
ប៉ុន្តែខណៈដែលប្រទេសជាតិស្ថិតក្នុងការបិទខ្ទប់ដូច្នេះគឺផ្ដល់ជាឱកាសងាយស្រួលមួយដល់យុវជនដែលស្នាក់នៅផ្ទះក៏អាចនឹងទស្សនារឿងភាគមួយនេះបានដូចគ្នា។
អ្នកនាំពាក្យរូបនោះបន្តទៀតថា ឈុតឆាកការប្រើប្រាស់ហិង្សា ការសម្លាប់ និងទារុណកម្មផ្សេងៗទៀតអាចនឹងដឹកនាំទៅរកការបង្កើតជាអំពើឧក្រិដ្ឋកម្មនៅក្នុងជីវិតពិតបាន ព្រោះរឿងនោះផ្ដោតលើមនុស្សដែលប្រើគ្រប់មធ្យោបាយដើម្បីអាចមានជីវិតរស់។
ក្នុងករណីបែបនេះលោកបានផ្ដល់ជាដំបូន្មានដល់មាតាបិតាឱ្យសង្កេតមើលកូនចុះដែលមានសកម្មភាពលើអានឡាញឱ្យកាន់តែម៉ត់ចត់ ជាពិសេសក្មេងៗមិនគួរទស្សនារឿងលើ Internet ដោយមិនមានមនុស្សធំណាស់ព្រោះពួកគេអាចនឹងចម្លងសកម្មភាពពីតួអង្គអស់ទាំងនោះបាន។
«Squid Game» និពន្ធនិងដឹកនាំដោយ Hwang Dong Hyuk បរិយាយពីមនុស្សបរាជ័យជាច្រើននាក់បានទទួលលិខិតអញ្ជើញអាថ៌កំបាំងមួយឱ្យទៅចូលរួមលេងហ្គេមដាក់ជីវិតជាដើមទុនដើម្បីឈ្នះទឹកប្រាក់៣៨លានដុល្លារ ដោយក្នុងអ្នកលេងទាំងអស់នឹងត្រូវលេងហ្គេមក្មេងដ៏មានប្រជាប្រិយមួយក្នុងប្រទេសកូរ៉េកាលពីកំឡុងឆ្នាំ១៩៨០ ដោយអ្នកដែលចាញ់នឹងត្រូវអស់ជីវិត៕
ប្រភព៖ prachatai
