ក្រោយរដ្ឋមន្ត្រីក្រសួងទេសចរណ៍និងកីឡា លោក ភិភ័ត រ៉ាត់ឆៈកិច្ចប្រាក់កាន បានប្រកាសថាត្រៀមកញ្ចប់ថវិការ១០០ លានបាទជួលតារាចម្រៀង K-Pop សញ្ជាតិថៃ Lisa និងលោក Andrea សិល្បករតន្ត្រីអូប៉េរ៉ាដ៏ល្បីល្បាញមកច្រៀង Countdown ដាច់ឆ្នាំស្វាគមន៍ឆ្នាំសកលនាខេត្ត ភូកេត ហើយមានសារព័ត៌មានក្នុងប្រទេសថៃបានផ្សាយដំណឹងនេះយ៉ាងគគ្រឹកគគ្រេង ប៉ុន្តែកាលពីពេលថ្មីៗនេះ ផលិតកម្ម YG Entertainment ដែលជាផលិតកម្មគ្របគ្រងលើ Lisa បានចេញមកថ្លែងបដិសេធចំពោះដំណឹងនេះ។
សូមចុចអាន ថៃចាយ១០០លានទាញLisaមកច្រៀងConcert ផ្សព្វផ្សាយពិភពលោកបើកប្រទេសឡើងវិញ
ផែនការជួលតារាចម្រៀងល្បីលំដាប់ពិភពលោក កញ្ញា Lisa Lalisa Manoban និង លោក Andrea Bocelli មានទាំងអ្នកដែលយល់ស្របនិងមិនយល់ស្រប ដោយយល់ឃើញថាប្រើប្រាស់កញ្ចប់ថវិការមិនត្រឹមត្រូវ ខណៈមតិខ្លះទៀតគិតថាគួរតែជួយដល់តារាចម្រៀងថៃដែលកំពុងតែក្ដៅក្រហាយនិងរងផលប៉ះពាល់ដោយសារការបិទកន្លែងកម្សាន្ត និងក្លិបកម្សាន្តជាដើម។
ងាកមកផលិតកម្ម YG Entertainment កាលពីថ្ងៃទី២៨ ខែតុលា ម្សិលមិញនេះ បានចេញមកប្រកាសថា «ដោយសារតែមានព័ត៌មានផ្សព្វផ្សាយថា Lisa ដែលជាសិល្បករក្នុងផលិតកម្មខ្លួន នឹងមកចូលរួមច្រៀងឆ្លងឆ្នាំសកលនៅប្រទេសថៃ ខាងផលិតកម្ម YG សូមជំរាបជូនដំណឹងថា ផលិតមានសេចក្ដីសោមនស្សនិងអរគុណយ៉ាងក្រៃលែងដែលទទួលបានកិត្តិយសខ្ពង់ខ្ពស់ បានទទួលការទាក់ទងអញ្ជើញតារាក្នុងផលិតកម្មខ្លួនទៅចូលរួមក្នុងកម្មវិធី ប៉ុន្តែផលិតកម្មសូមជំរាបជូនថា Lisa មិនអាចទៅចូលរួមបាននោះទេ ដោយសារតែមានការច្រើនបានកំណត់ទុករួចទៅហើយ ផលិតកម្មជំរាបជូននេះដើម្បីឱ្យគ្រប់គ្នាបានយល់និងជ្រាបពីដំណឹងនេះ។ សូមអរគុណដែលបានតាមដានតារារបស់យើងជារៀងរហូតមក»៕
