អ្នកគាំទ្រមួយភាគធំ តែងតែបន់ស្រន់ចង់ឃើញតារាឯកប្រុសស្រីពីរដួងគឺ កញ្ញា ហ៊ិន ច័ន្ទនីរ័ត្ន និងលោក សេង មង្គល បានចាប់ដៃគូសម្ដែងជាមួយគ្នាសារជាថ្មី ព្រោះក្រោយសម្ដែងរឿង «ទាសីបេះដូង» ចប់ អាយដលទាំងពីរដួងនេះនៅមិនទាន់មានតម្រុយនឹងវិលត្រលប់មកចាប់ដៃគូគ្នាក្នុងរឿងភាគណាមួយទៀតនៅឡើយទេ។ ដូចការលើកឡើងនេះ ហេតុតែស្រលាញ់តារាទាំងពីរដួង និង Ship អ្នកទាំងពីរខ្លាំង និងចង់ឃើញអ្នកទាំងពីរនៅក្បែរៗគ្នាទៀតនោះ ធ្វើឱ្យហ្វេនម្នាក់ដាច់ចិត្តធ្វើរឿងដែលមើល ពិតជាមិនអាចមិនសរសើរទឹកចិត្តស្រលាញ់អាយដលរបស់ហ្វេនរូបនោះបានឡើយ។
ដូចប្រិយមិត្តមួយចំនួនបានដឹងហើយថាប៉ុន្មានថ្ងៃកន្លងមកនេះកញ្ញា ហ៊ិន ច័ន្ទនីរ័ត្នកំពុងរងគ្រោះព្រោះព្យុះរឿងអាស្រូវ ដែលបង្កឡើងដោយគណនីមួយបានចេញមកធ្វើការផុសពីរឿងរ៉ាវជីវិតបែបពែបជ្រាយនិងថ្កោលទោសលើកញ្ញា ហ៊ិន ច័ន្ទនីរ័ត្នថាមិនស្គាល់ម្ដាយបង្កើត តែក្រោយមកក៏មានផេកមួយបានទម្លាយរឿងរ៉ាវជុំវិញបញ្ហានេះដើម្បីស្រាយចម្ងល់ដល់មហាជន។
ក្រៅពីអ្នកគាំទ្រមួយចំនួនដែលបានផ្ញើសារលើកទឹកចិត្តចំពោះកញ្ញាហើយនោះ ដៃគូសម្ដែងដ៏ស័ក្ដិសមក្នុងខ្សែភាពយន្តភាគដែលហ្វេនប្រាថ្នាចង់ឱ្យអ្នកទាំងពីរក្លាយជាគូជីវិតពិតរបស់កញ្ញា គឺលោក សេង មង្គល បានចូលមកផ្ដល់កម្លាំងចិត្តចំពោះអតីតដៃគូសម្ដែងរឿងភាគខ្មែររបស់ខ្លួន យ៉ាងសាមញ្ញានិងខ្លឺថា «Be Strong ឬមានន័យជាខេមរភាសាថា រឹងមាំឡើង»។ ពាក្យដ៏សែនខ្លីបានធ្វើឱ្យហ្វេនរបស់អ្នកទាំងពីរជ្រើមជ្រួល រមួលសួតប្រមាត់ ដោយសារតែរំភើបដែលបានឃើញសំណព្វចិត្តទាំងពីរផ្ដល់កម្លាំងចិត្តនិងលើកទឹកចិត្តឱ្យគ្នានៅក្នុងកាលៈទេសៈលំបាកបែបនេះ។
ក្នុងចំណោមហ្វេនជាច្រើននោះ មានហ្វេនម្នាក់ដែលស្រលាញ់អ្នកទាំងពីរខ្លាំងពេក ម្យ៉ាងចង់ឃើញតារាទាំងពីរដួងរាល់ៗថ្ងៃផងនោះបានយករូបរបស់តារាទាំងពីរដួងស្ថិតក្នុងសំលៀកបំពាក់បុរាណប្រពៃណីខ្មែរទៅផ្ដិត (print) ជារូបថតមកដាក់ទុកក្នុងអាល់ប៊ុមថែមទៀតផង៕
ប្រិយមិត្តចង់ឃើញប្រុសស្អាត សេងមង្គល និងស្រីស្រស់ ហ៊ិន ច័ន្ទនីរ័ត្ន សម្ដែងរឿងជាមួយគ្នាទៀតទេ? បើចង់តើចង់ឱ្យអ្នកទាំងពីរសម្ដែងរឿងបែបណាដែរ?
