ក្រោយកើតករណីគ្រោះថ្នាក់ចរាចរណ៍រវាងរថយន្ត Range Rover បើកបរដោយលោក ឃី ហុង ហៅតាប៊ុយ បុកគូទរថយន្តព្រូសបណ្ដាលឱ្យខូចខាតប៉ុន្តែតាប៊ុយចេញមកប្រកាសមិនអាចទទួលយកចំពោះតម្លៃជួសជុលដ៏ច្រើននោះ ពេលនេះម្ចាស់រថយន្តរងគ្រោះបានដាក់ពាក្យបណ្ដឹងទៅកាន់អយ្យការអមសាលាដំបូងរាជធានីភ្នំពេញហើយ ដោយប្ដឹងចោទប្រកាន់ចំនួន ៣បទល្មើសនិងទាមទារសំណងជាទឹកប្រាក់ចំនួន១០ម៉ឺនដុល្លារអាមេរិក (យកទៅឧបត្ថម្ភដល់មន្ទីរពេទ្យគន្ធបុប្ផា)។
យោងតាមពាក្យបណ្ដឹងរបស់ មេធាវី លោក ហ៊ុយ មាំង តំណាងឱ្យភាគីជនរងគ្រោះ បានដាក់ចូលទៅអយ្យការអមសាលាដំបូងរាជធានីភ្នំពេញនៅថ្ងៃចន្ទ ខែធ្នូ ឆ្នាំ២០២១ ម្សិលមិញនេះ មានខ្លឹមសារថា ជនរងគ្រោះបានសម្រេចចិត្តប្ដឹងតាប៊ុយ ចំនួន៣បទល្មើសរួមមាន៖
១. បើកបរបង្កឱ្យមានគ្រោះថ្នាក់ដល់អ្នកដទៃ ២. បើកបរក្នុងស្ថានភាពស្រវឹង និងទី៣. បទបរិហារកេរ្តិ៍។
ខ្លឹមសារនៅក្នុងពាក្យបណ្ដឹងនោះបានបង្ហាញពីដើមហេតុដែលបង្កឱ្យកើតមានគ្រោះថ្នាក់ចរាចរណ៍គឺដំបូងឡើយ តាប៊ុយបានបើកដេញពីក្រោយដោយស៊ីផ្លេ និងបើកហ្វាកូតចុះឡើងៗ និងបើកមកកៀកនឹងរថយន្តជនរងគ្រោះ បន្ទាប់មកបានបើកកញ្ចក់ ស្រែកជេរនិងគំរាមសម្លាប់ ដោយមិនដឹងពីមូលហេតុ។
ជនរងគ្រោះ បានព្យាយាមនបើករថយន្តគេចចេញពីជនល្មើស ប៉ុន្តែមិនអាចគេចបាន រហូតបើកដល់កន្លែងកើតហេតុ ជនរងគ្រោះបានសម្រេចចិត្តឈប់រថយន្ត និងរត់ចេញពីរថយន្តខ្លាចមានគ្រោះថ្នាក់ដល់អាយុជីវិត ស្រាប់តែជនល្មើស បានបើកឡានបុកឡានរបស់ខ្លួនពីក្រោយទាំងកំរោល។ បន្ទាប់ពីបុករួចជនល្មើសរូបនោះបានបើកកញ្ចក់ និងបានស្រែកជេរប្រមាថ ព្រមទាំងគំរាមសម្លាប់មកលើជនរងគ្រោះម្ដងទៀត។
នៅក្នុងពាក្យបណ្ដឹងនោះក៏បានរៀបរាប់ឱ្យដឹងដែរថា ជនល្មើសក្រោយពីធ្វើសកម្មភាពរួច ជនល្មើសបានបើកឡានរត់គេចចេញពីកន្លែងកើតហេតុ ប៉ុន្តែជនរងគ្រោះបានបើករថយន្តដេញតាមពីក្រោយរហូតស្ទាក់ឃាត់រថយន្តជាប់ នៅលើមហាវិថីសហព័ន្ធរុស្សី ក្បែររបងស្ថានីយរថភ្លើង។ ពេលឃាត់រថយន្តជាប់ ជនល្មើសបានចុះពីលើរថយន្តដោយសភាពស្រវឹងជោគជាំ ដើរទ្រេតទ្រោត និយាយស្ដីមិនដឹងខុសត្រូវ ក៏មានការជជែកវែកញែកគ្នា…។
ខ្លឹមសារដែលបានរៀបរាប់ខាងលើនេះគឺដកស្រង់ចេញពីក្នុងបណ្ដឹងរបស់ជនរងគ្រោះតែប៉ុណ្ណោះ ចំពោះស្ថានភាពពិតប្រាកដបែបណានោះ គឺអាស្រ័យលើការស៊ើបអង្កេតនិងស្រាវជ្រាវពីសមត្ថកិច្ច និងរង់ចាំការឆ្លើយតបបំភ្លឺពីភាគី តាប៊ុយវិញ៕
ទស្សនាវីដេអូ Big News៖