ប្រិយមិត្តអ្នកអានមួយចំនួនធំដែលតាមដានសាច់រឿងភ្ជង់គំរាមយកទ្រព្យសម្បត្តិកក្រើករាជធានីភ្នំពេញប្រាកដជាបានដឹងព័ត៌មានរស៊ើបមួយទៀត ដែលបណ្ដាញសារព័ត៌មានមួយចំនួននៅលើបណ្ដាញសង្គមបានចេញផ្សាយ នោះគឺរឿងទំនាក់ទំនងមនោសញ្ចេតនាស្នេហារវាងជនរងគ្រោះ ឧកញ៉ា អ៊ាន សៀវម៉ី និងមេក្រុមចោរប្រដាប់អាវុធ លោក សុខសុវណ្ណវឌ្ឍនា សាប៊ុង ហៅ William Guang ជាមេបក្សខ្មែរក្រោក។ យ៉ាងណាមិញរឿងរ៉ាវដ៏រសើបដែលមហាជនខ្សឹបខ្សៀវគ្នាច្រើនលើប្រព័ន្ធអនឡាញនេះ ត្រូវបានលោកមេធាវី ២រូបចេញមកបញ្ជាក់ការពិតច្បាស់ៗហើយពីទំនាក់ទំនងរបស់ជនរងគ្រោះ និងមេក្រុមចោរប្រដាប់អាវុធខាងលើ។
សូមចុចអាន មេបក្សខ្មែរក្រោក ជាអ្នកដឹកនាំកម្លាំងដោយផ្ទាល់ចូលទៅគំរាមយកទ្រព្យសម្បត្តិពី ឧកញ៉ា អ៊ាន សៀវម៉ី
យោងតាមការលិខិតជូនដំណឹងរបស់ក្រុមហ៊ុនមេធាវីកម្ពុជា ចិន លោកមេធាវី ជា សុខចាន់ និងលោកមេធាវី នួន បូរ៉ា ជាមេធាវីតំណាងដោយអាណត្តិឱ្យ ឧកញ៉ា អ៊ាន សៀវម៉ី បានចេញមកច្រានចោល និងបដិសេធចំពោះការចុះផ្សាយរបស់កាសែត និងសារព័ត៌មានមួយចំនួន ដែលបានចេញផ្សាយដោយប្រើចំណងជើងថា «សៀវម៉ីជាស្រីកំណាន់គ្មានទីបញ្ចប់របស់វីល្លាម ដែលជារឿយៗពួកគេតែងណាត់ជួបគ្នាដើម្បីធ្វើដំណើរទេសចរណ៍ទៅឋានសួគ៌លោកីយ»។ នៅក្នុងសេចក្ដីជូនដំណឹងនោះ ក៏បានបដិសេធចោលដែរចំពោះការលើកឡើងរបស់អង្គភាពសារព័ត៌មានមួយដែលបានលើកឡើងថា «ចោរប្លន់គ្នាវា សៀវម៉ីជាស្រីកំណាន់ចិត្តរបស់វីល្លាម មិនដឹងជាយ៉ាងម៉េចយ៉ាងម៉ា វាប្លន់គ្នាវា ក្បត់ជាតិគ្នាវា»។
ខ្លឹមសារនៃលិខិតនោះបានលើកឡើងថាការចុះផ្សាយទាំងអស់ខាងលើនេះគឺជាព័ត៌មានបំភ្លើសខុសពីការពិត ដែលធ្វើឱ្យប៉ះពាល់ដល់កិត្តិយសកេរ្តិ៍ឈ្មោះ និងសេចក្ដីថ្លៃថ្នូរបស់ឧកញ៉ា អ៊ាន សៀវម៉ីយ៉ាងធ្ងន់ធ្ងរជាទីបំផុត ព្រោះថៅកែអនឡាញគឺជាជនរងគ្រោះក្នុងករណីនេះ។
មេធាវីតំណាងដោយអាណត្តិឱ្យអ្នកនាង អ៊ាន សៀវម៉ី ក៏បានដាក់បន្ទុកទៅលើសារព័ត៌មានដែលបានលើកយករឿងខាងលើមកចុះផ្សាយ ដោយមិនមានប្រភពច្បាស់លាស់ មិនមានវិជ្ជាជីវៈជាអ្នកសារព័ត៌មាន មិនមានក្រមសីលធម៌អ្នកសារព័ត៌មាន ចុះផ្សាយបែបញុះញង់និងបំផុសបំផុលចោទប្រកាន់មកលើកូនក្ដីខ្លួន បណ្ដាលឱ្យកើតមានការរើសអើងមកលើកូនក្ដីរបស់ខ្លួន។ ក្នុងនាមជាមេធាវីតំណាងដោយញត្តិឱ្យឧកញ៉ា អ៊ាន សៀវម៉ី បានប្រកាសថា កូនក្ដីរបស់ខ្លួនមិនមែនជាស្រីកំណាន់របស់ឈ្មោះ វីល្លាម ហើយក៏គ្មានទំនាក់ទំនងអ្វីនឹងឈ្មោះនេះដែរ ដោយអ្នកនាងមានស្វាមីនិងកូនចំនួន៣នាក់។
ក្រៅពីស្នើឱ្យបណ្ដាញសារព័ត៌មាននានា ក៏ដូចជាសាធារណជនបញ្ឈប់ជាបន្ទាន់នូវការចែករំលែកដំណឹងមិនពិតប្រាកដនេះ ក៏មានលើកឡើងដែរថាប្រសិនបើបុគ្គល ឬស្ថាប័នព័ត៌មានណានៅតែបន្តផ្សព្វផ្សាយបំភ្លើសខុសពីការពិត បង្កាច់បង្ខូចកេរ្តិឈ្មោះ ធ្វើឱ្យភាន់ច្រឡំដល់មតិសាធារណជន បណ្ដាលឱ្យប៉ះពាល់ដល់កិត្តិយសនិងសេចក្ដីថ្លៃថ្នូររបស់កូនក្ដីខ្លួននោះ មេធាវីតំណាងដោយអាណត្តិរបស់អ្នកនាងនឹងចាត់វិធានដាក់ពាក្យបណ្ដឹងទៅតាមផ្លូវច្បាប់។
សូមអានខ្លឹមសារលិខិតទាំងស្រុងនៅខាងក្រោមនេះ៖
ទស្សនាវីដេអូ Big News៖
