បន្ទាប់ពីអ្នកគ្រប់គ្រងកម្មវិធី «បុណ្យភូមិសៀមរាប» លោក យឹម តាស្រង់ បានចេញសារស្រាយបំភ្លឺចំពោះការភ័ន្តច្រឡំទៅកាន់ គណៈកម្មការបុណ្យភូមិ ភ្លើងគប់ វិញនោះ កញ្ញា រិទ្ធី លំអរពេជ្រ ដែលជាស្ថាបនិកកម្មវិធីបុណ្យភូមិនៃក្រុមភ្លើងគប់ ក៏បានចូលមកឆ្លើយតបសាររបស់លោក យឹម តាស្រង់ ភ្លាមៗផងដែរ។
សូមចុចអាន ក្រោយមានការភ័ន្តច្រឡំ លោក យឹម តាស្រង់ ចេញសារឆ្លើយតបរឿង «បុណ្យភូមិសៀមរាប»
កញ្ញា រិទ្ធី លំអរពេជ្រ បានចូលមកឆ្លើយតបភ្លាមៗចំពោះសារបកស្រាយរបស់លោក យឹម តាស្រង់ ថាសេចក្ដីប្រកាសរបស់ខ្លួនមិនបានសំដៅមិនឱ្យប្រើប្រាស់ពាក្យបុណ្យភូមិនោះទេ ប៉ុន្តែអ្វីដែលក្រុមការងាររបស់កញ្ញាបារម្ភគឺខ្លាចមានការច្រឡំ ដោយសារតែកម្មវិធីបុណ្យភូមិសៀមរាប បានប្រើប្រាស់ផ្លាកសញ្ញា និង វីដេអូរបស់ក្រុមការងារភ្លើងគប់ ដោយមិនមានការអនុញ្ញាតពីភាគីកញ្ញានោះឡើយ។
«ក្នុងសេចក្តីប្រកាសរបស់បុណ្យភូមិ មានបាននិយាយថាមិនអាចប្រើប្រាស់ឈ្មោះ “បុណ្យភូមិ” ឯណា។ បុណ្យភូមិចង់បញ្ជាក់ថា “បុណ្យភូមិសៀមរាប” គឺមិនមែនរៀបចំដោយក្រុមការងារភ្លើងគប់ទេព្រោះខ្លាចច្រលំដោយសារតែក្នុងវីដេអូនោះបានយកវីដេអូរបស់ “បុណ្យភូមិ” និងផ្លាកសញ្ញាដែលក្រុមការងារភ្លើងគប់បានផលិតយកទៅផ្សព្វផ្សាយ ដោយគ្មានការអនុញ្ញាត។»
ក្រៅពីកញ្ញា រិទ្ធី លំអរពេជ្រ រហើយនោះកញ្ញា រិទ្ធី លំអរកេសរ ដែលត្រូវជាប្អូនស្រី និងជាក្រុមការងារភ្លើងគប់នោះក៏បានចូលទៅបញ្ចេញជាមតិយោបល់ក្រោមផុសរបស់ យឹម តាស្រង់ ដូចទៅនឹងបងស្រីរបស់ខ្លួនដែរ ដោយកញ្ញាបានលើកឡើងយ៉ាងដូច្នេះថា៖
ក្រុមការងារបុណ្យភូមិ និងឡេឡេបុណ្យភូមិ ខិតខំបង្កេីត និងប្រារព្ធកម្មវិធីនេះមកបាន៨ឆ្នាំហេីយ ចុងក្រោយត្រូវបានគេថាពួកគាត់ជាមនុស្ស «ចិត្តចង្អៀត»
ក្រៅពីការលើកឡើងរបស់បុគ្គលល្បីនិងលេចធ្លោរទាំងពីររូបនេះក៏មានក្រុមការងារដែលធ្លាប់ជាក្រុមការងារស្ម័គ្រចិត្តក្នុងកម្មវិធី បុណ្យភូមិ និងបណ្ដាហ្វេនៗមួយចំនួនទៀតក៏បានចូលមកបង្ហាញមតិយោបល់ច្រើនចំពោះករណីចម្រូងចម្រាសរវាងស្ថាបនិកបុណ្យភូមិ កញ្ញា រិទ្ធី លំអរពេជ្រ និង អ្នកគ្រប់គ្រងបុណ្យភូមិសៀមរាប លោក យឹម តាស្រង់ ដោយភាគច្រើនឃើញថាមានទំនោរគាំទ្រទៅលើភាគីខាងស្ថាបនិកបុណ្យភូមិ ក្រុមការងារភ្លើងគប់។
បន្ទាប់ពីអ្នកគ្រប់គ្រងរូបនេះចេញមកបង្ហោះសារឆ្លើយតបនិងភ្ជាប់ជាមួយនឹងសេចក្ដីប្រកាសរបស់ ក្រុមការងារភ្លើងគប់ហើយ នោះ ភាគីផលិតកម្ម Galaxy Navatra ដែលជាអ្នកនៅពីក្រោយរៀបចំកម្មវិធីនេះ មិនទាន់មានចំណាត់ការលុបចេញវីដេអូ footages ឬ Logo ដែលខាងភាគីក្រុមការងារភ្លើងគប់បានស្នើសុំនៅឡើយទេ។
ចំពោះដំណើរការនៃការងារនេះនឹងជាយ៉ាងណាទៀតនោះ ក្រុមការងារសិល្បៈកម្សាន្តត្រយងនឹងលើកយកមកផ្សព្វផ្សាយជាបន្តទៀត៕