ព្រឹត្តិការណ៍ប្រកួតកីឡាអេឡិចត្រូនិកថ្នាក់ជាតិឆ្នាំ២០២២ រកឃើញក្រុមជើងឯកលើវិញ្ញាសា Mobile Legends ហើយ នៅថ្ងៃទី២០ ខែកុម្ភៈ ឆ្នាំ២០២២ ដែលនេះជាដំណើរឆ្ពោះទៅកីឡាស៊ីហ្គេម លើកទី៣១ ឆ្នាំ២០២១ នៅវៀតណាម និងការត្រៀមខ្លួនសម្រាប់ស៊ីហ្គេមលើកទី៣២ ឆ្នាំ២០២៣ បន្ទាប់ពីប្រកួតវគ្គផ្តាច់ព្រ័ត្រនៅផ្សារទំនើបអ៊ីអនពីរក្រោមអធិបតីភាព ឯកឧត្តម ជា ចន្ទបរិបូរណ៍ ប្រធានសហព័ន្ធកីឡាអេឡិចត្រូនិកកម្ពុជា។
សូមបញ្ជាក់ថាការប្រកួតបានចាប់ផ្តើមតាំងពីថ្ងៃទី២៧ ខែមករា ដល់ថ្ងៃទី២០ ខែកុម្ភៈ ឆ្នាំ២០២២ ដែលមានក្រុមចុះឈ្មោះចូលរួមប្រកួតជាច្រើនមុនពេលជ្រើសរើស៨ក្រុមចុងក្រោយដើម្បីប្រកួតវគ្គវិលសន្សំពិន្ទុ។ ក្រោយមកទៀត ការប្រកួតរកឃើញក្រុមឡើងដល់វគ្គពាក់កណ្តាលផ្តាច់ព្រ័ត្រ និងផ្តាច់ព្រ័ត្រ។
សម្រាប់លទ្ធផលនៅវគ្គផ្ដាច់ព្រ័ត្រ គឺជើងឯកបានទៅក្រុម BURN X PLASH បន្ទាប់ពីឈ្នះក្រុម SEE YOU SOON។ ចំណែកកីឡាករ XE ON បានជាប់ឈ្មោះជាកីឡាករឆ្នើមប្រចាំព្រឹត្តិការណ៍ផងដែរ។
ឯកឧត្តម ជា ចន្ទបរិបូរណ៍ ប្រធានសហព័ន្ធកីឡាអេឡិចត្រូនិកកម្ពុជា បានលើកឡើងថា៖«ការកំណត់កន្លងមកគឺយកកីឡាករអាយុចាប់ពី១៨ឆ្នាំឡើង ប៉ុន្តែចាប់ពីឆ្នាំ២០២៣ តទៅគឺកំណត់អាយុចាប់ពីអាយុ១៦ឆ្នាំឡើងទៅវិញម្តង។ ដូច្នេះសូមប្អូនៗដែលមានសមត្ថភាព សូមពង្រឹងបច្ចេកទេសដើម្បីចូលរួមនៅឆ្នាំបន្តបន្ទាប់»។ ឯកឧត្តមប្រធានសហព័ន្ធបានថ្លែងអំណរគុណដល់ក្រុមទាំងអស់បានចូលរួម តាំងពីដើមមក និងអរគុណដល់ក្រុមការងារបច្ចេកទេសបានរៀបចំព្រឹត្តិការណ៍នេះដោយជោគជ័យ។
អត្ថបទពាក់ព័ន្ធ៖កីឡាអេឡិចត្រូនិក វិញ្ញាសា PUBG Mobileរើសបានកីឡាករត្រៀម ស៊ីហ្គេមនៅវៀតណាម និងកម្ពុជា
វិញ្ញាសា Mobile Legends ជាវិញ្ញាសាទី២ ហើយបន្ទាប់ពីបញ្ចប់ការប្រកួតលើវិញ្ញាសា PUBG Mobile កាលពីថ្ងៃទី១៩ ខែកុម្ភៈកន្លងទៅ ក្រោយសហព័ន្ធកីឡាអេឡិចត្រូនិកកម្ពុជា (EFC) ចាប់ដៃជាមួយក្រុមហ៊ុនទូរសព្ទ Cellcard សម្រាប់ព្រឹត្តិការណ៍«ដំណើរឆ្ពោះទៅកីឡាស៊ីហ្គេម លើកទី៣១ ឆ្នាំ២០២១ នៅវៀតណាម និងការត្រៀមខ្លួនសម្រាប់ស៊ីហ្គេម លើកទី៣២ ឆ្នាំ២០២៣ នៅកម្ពុជា»។
បើតាមការបញ្ជាក់ពីគណៈកម្មការរៀបចំការប្រកួត គោលបំណងនៃការប្រកួតគឺដើម្បីជ្រើសរើសកីឡាករល្អៗបង្កើតជាក្រុមជម្រើសជាតិដើម្បីធ្វើដំណើរទៅប្រកួតកីឡាស៊ីហ្គេមលើកទី៣១ នៅប្រទេសវៀតណាម។ ដូច្នេះមានន័យថា ជយលាភីចុងក្រោយនេះមិនទាន់ជាក្រុមជម្រើសជាតិផ្លូវការនៅឡើយទេ ប៉ុន្តែនឹងមានការជ្រើសរើសសមាជិកដែលមានជំនាញរៀងៗខ្លួនបន្ថែម ដើម្បីបង្កើតជាក្រុមជម្រើសជាតិ។
អត្ថបទពាក់ព័ន្ធ៖ហ្គេមទាំង៨នេះដាក់ជាវិញ្ញាសាប្រកួតកីឡាកម្រិតទ្វីបអាស៊ី 2022 Asian Games នៅចិន
សហព័ន្ធក៏បានបង្កើតគណៈកម្មការបច្ចេកទេសដើម្បីជ្រើសរើស គ្រូបង្វឹក និងកីឡាករជម្រើសជាតិ ដែលជាផ្នែកនៃការអភិវឌ្ឍ បង្កើនសមត្ថភាព បំផុសបំផុល និងជំរុញកីឡាអេឡិចត្រូនិកកម្ពុជា ដើម្បីឲ្យរីកចម្រើនឈានឡើងលំដាប់អន្តរជាតិសម្រាប់ត្រៀមខ្លួនប្រកួតកីឡាស៊ីហ្គេម លើកទី៣២ ឆ្នាំ២០២៣ដែលកម្ពុជាធ្វើជាម្ចាស់ផ្ទះ៕