Thursday, December 8 Login
​កីឡដ្ឋាន Estádio do Dragão ក្នុង​ទីក្រុង Porto

​ទីបំផុត​វគ្គ​ផ្ដាច់ព្រ័ត្រ​ UEFA Champion League 2020-21 រវាង​ក្រុម​បាល់ទាត់​របស់​អង់គ្លេស​ទាំង​២​គឺ​ក្រុម​ Manchester City ជាមួយ​ក្រុម​Chelsea ត្រូវ​បាន​សហព័ន្ធ​កីឡា​បាល់ទាត់​ទ្វីប​អឺរ៉ុប (UEFA) សម្រេច​ប្តូរ​ទីលាន​ពី​ប្រទេស​ទួរគី ទៅ​ធ្វើ​នៅ​ប្រទេស​ព័រទុយហ្គាល់ ព្រម​ទាំង​បើក​ឱ្យ​ទស្សនិកជន​ចូល​ទស្សនា​ផង​ដែរ​តែ​ត្រូវ​មាន​កម្រិត។

ដំបូង​ឡើយ​ការ​ប្រកួត​នេះ​គ្រោង​ធ្វើ​ឡើង​នៅ​​ប្រទេស​ទួរគី ក្នុង​ថ្ងៃ​ទី​២៩ ខែ​ឧសភា ឆ្នាំ​២០២១ ខាង​មុខ​នៅ​កីឡដ្ឋាន Atatürk Olympic Stadium ក្នុង​ទីក្រុង​អ៊ីស្តាន់ប៊ុល ប៉ុន្តែ​ដោយ​សារ​ប្រទេស​នេះ​ស្ថិត​ក្នុង​សភាព​បិទ​ខ្ទប់​ (Lockdown) នៅ​ឡើយ បន្ទាប់​ពី​ការ​រីករាល​ដាល​នៃ​ជំងឺ​កូវីដ-១៩ ទើប UEFA សម្រេច​ប្តូរ​ទីតាំង​តែ​ម្តង។

អត្ថបទពាក់ព័ន្ធ៖ព័រទុយហ្គាល់ ចេញ​មុខ​​សុំ​ធ្វើ​ម្ចាស់​ផ្ទះ​វគ្គ​ផ្ដាច់ព្រ័ត្រ Champion League ក្រោយ​ទួរគី​ស្រពិចស្រពិល

លោក Aleksander Čeferin ប្រធាន UEFA លើក​ឡើង​ថា​ការ​ប្តូរ​ទីលាន​ប្រកួត​នេះ​ក៏​បាន​អនុញ្ញាតិ​ឱ្យ​ទស្សនិកជន​ចូល​ទស្សនា​ផ្ទាល់​នៅ​ក្នុង​ទីលាន​ដែរ គឺ​អាច​ក្នុង​ចំណោម​កំណត់​ត្រឹម​៦០០០នាក់ ព្រោះ​ថា​ប្រទេស​ព័រទុយហ្គាល់ ​​ស្ថិត​ក្នុង​បញ្ជី​បៃតង ដែល​អង់គ្លេស​អនុញ្ញាត​ឱ្យ​​ប្រជាជន​ខ្លួន​អាច​ធ្វើ​ដំណើរ​​ទៅ​បាន ដោយ​មិន​ចាំ​បាច់​ធ្វើ​ចត្តាឡឺស័ក​ទាំង​ទៅ​ទាំង​​មក។

ដូច្នេះ​ប្រកួត​វគ្គ​ផ្ដាច់ព្រ័ត្រ​រវាង​​ក្រុម​Manchester City ជាមួយ​ក្រុម​Chelsea នឹង​ធ្វើ​ឡើង​នៅ​វេលា​ម៉ោង​២​រំលង​អាធ្រាត្រ​ថ្ងៃ​ទី២៩ ខែ​ឧសភា ឆ្នាំ​២០២១ លើ​ទីលាន​កីឡដ្ឋាន Estádio do Dragão ក្នុង​ទីក្រុង Porto ក្រោម​ការ​កាត់សេចក្តី​ពី​សំណាក់​អាជ្ញាកណ្ដាល​លោក Antonio Mateu Lahoz ជនជាតិ​អេស្ប៉ាញ៕

អត្ថបទពាក់ព័ន្ធ៖ពាន Champions League អាយុ​៦៦​ឆ្នាំ​ហើយ នេះ​ជា​លើក​ទី៣ ដែល​ក្រុម​អង់គ្លេស​ប៉ះ​គ្នា​វគ្គ​ផ្ដាច់ព្រ័ត្រ

Share.

Leave A Reply