កម្មវិធីប្រណាំងរទេះសាឡីគោលឿន បានខកខានធ្វើឡើងអស់រយៈពេល ០២ ឆ្នាំទៅហើយ ដោយសារតែបញ្ហានៃការរីករាលដាលនៃជំងឺកូវីដ-១៩ នៅកម្ពុជា។ តែយ៉ាងណាមិញ នៅក្នុងឆ្នាំ២០២២នេះ កម្មវិធីដ៏សប្បាយអស្ចារ្យ និងបង្ហាញពីអត្តសញ្ញាណរបស់ខ្មែរមួយនេះ បានត្រឡប់មកវិញហើយ ដោយធ្វើឡើងនៅទីលានប្រណាំងស្ថិតនៅភូមិដែកភ្លើង ឃុំរលាំងគ្រើល ស្រុកសំរោងទង ខេត្តកំពង់ស្ពឺ។
ដើម្បីអបអរសាទរពិធីបុណ្យចូលឆ្នាំប្រពៃណីខ្មែរនាពាក់កណ្ដាលខែ មេសា ខាងមុខនេះ រដ្ឋបាលសាលាខេត្តកំពង់ស្ពឺបានការអនុញ្ញាតជាគោលការណ៍ពី មន្ទីរវប្បធម៌និងវិចិត្រសិល្បៈខេត្តកំពង់ស្ពឺ បានសហការជាមួយសហភាពសហព័ន្ធយុវជនកម្ពុជា(ស.ស.យ.ក.)ខេត្តកំពង់ស្ពឺ និងសមាគមគោខេត្តកំពង់ស្ពឺ បានរៀបចំពិធីប្រណាំងរទេះសាឡីគោលឿនឡើងវិញ។
គួរដឹងបន្ថែមថា កម្មវិធីប្រណាំងរទេះសាឡីគោលឿននឹងធ្វើឡើងនៅថ្ងៃទី ៣ ខែមេសា ឆ្នាំ២០២២ សូមអញ្ជើញប្រជាពលរដ្ឋ ពុកម៉ែ បងប្អូនទាំងអស់ ចូលរួមកម្សាន្ដសប្បាយរីករាយទាំងអស់គ្នា៕