ល្បែងកូនកាស ឬលាក់កូនកាស ជាល្បែងមួយយ៉ាង សម្រាប់ក្មេងជំទង់ៗលេងកំសាន្តសប្បាយ។ ល្បែងនេះ គេលេងបានតែនៅក្នុងទឹកអូរ ឬទន្លេ ដែលមានជម្រៅត្រឹមចង្កេះ ឬត្រឹមដើមទ្រូងក្មេងៗអ្នកត្រូវការលេងនោះៗ។
របៀបលេង៖ ក្មេងៗត្រូវបបួលគ្នាឲ្យបាន ៤ ទៅ ៥ នាក់ឡើងទៅចុះទៅក្នុងទឹក ហើយយកកំណាត់ឈើ ឬដើមស្នោរ ខ្លីៗ ដែលជាវត្ថុស្រាលៗ អណ្តែតទឹក ធ្វើជាខ្នាត់ដាក់បណ្តែតលើខ្នងទឹក បង្ហាញអ្នកលេងទាំងអស់គ្នា ឲ្យឃើញច្បាស់នឹងភ្នែកថានេះជា “កូនកាស” កុំឲ្យច្រឡំនឹងកំណាត់ឈើឯទៀត ហើយអ្នកលេងទាំងអស់គ្នា គេនាំគ្នារើសកំណាតឈើផ្សេងៗ ដែលមាននៅក្នុងទឹកត្រង់កន្លែងលេងនោះចេញអស់ ដើម្បីកុំឲ្យច្រឡំ នឹងកូនកាសរបស់ខ្លួន ហើយគេនាំគ្នាឈរដំកង់ជាវង់ក្នុងទឹកដាក់ខ្នាត់ជាកូនកាសនៅចំកណ្តាលវង់។
លុះរៀបស្រួលបួលហើយគេនាំគ្នាបញ្ជ្រោកទឹកពន្លិច ឬបន្សាត់កូនកាសចេញ ហើយឈប់បង្អង់បន្តិច ទើបនាំគ្នាគន់រកមើលខ្នាត់ដែល អណ្តែតឡើង ហើយរសាត់ឆ្ងាយពីខ្លួនបើអ្នកណារកឃើញមុនគេហើយចាប់យកខ្នាត់នោះបាននោះត្រូវដេញញៀចស្លឹកត្រចៀក គឺមួលស្លឹកត្រចៀក អ្នកទាំងអស់គ្នាដែលរកពុំឃើញ។ មុននឹងទៅដេញចាប់ញៀចគេនោះអ្នកបានខ្នាច់នោះគេស្រែកជាសញ្ញាថា “ញៀច”។ ពេលនោះ បើអ្នកណាមុជ ទឹកទាន់ អ្នកនោះត្រូវរួចខ្លួន អ្នកដេញញៀចមិនបានត្រូវគេទេ។
ល្បែងនេះ ជាល្បែងមួយសម្រាប់លេងជាកំសាន្តផងសម្រាប់ហាត់ភ្នែកឲ្យរហ័សឲ្យវៃក្នុងការពិនិត្យរកវត្ថុអ្វីផ្សេងៗ នឹងជាកីឡាហែលទឹក គឺការហក់ហែលទៀតផង។
ពាក់ព័ន្ធល្បែងប្រជាប្រិយខ្មែរ៖
ឈ្វេងយល់ប្រវត្តិល្បែងប្រជាប្រិយខ្មែរ៖ ទីដប់ប្រាំបី ល្បែងបាយខុំ!
ឈ្វេងយល់ប្រវត្តិល្បែងប្រជាប្រិយខ្មែរ៖ ទីដប់ប្រាំពីរ ល្បែងចោះប្រមាត់!
ឈ្វេងយល់ប្រវត្តិល្បែងប្រជាប្រិយខ្មែរ៖ ទីដប់ប្រាំមួយ ល្បែងរាវបង្កង!
