ចូលឆ្នាំខាលនេះ តន់ ចន្ទសីម៉ា បង្ហាញសកម្មភាពដឹងគុណចំពោះគ្រូបង្វឹក ឱក សុគន្ធកញ្ញា ធ្វើឱ្យមហាជនពេញចិត្តស្ដូក

តារាចម្រៀង តន់ ចន្ទសីម៉ា សព្វថ្ងៃនេះកំពុងកើបប្រជាប្រិយភាពតាមរយៈជ្រកក្រោមផលិតកម្មកាឡាក់ស៊ីណាវ៉ាត្រា ដែលគេអាចនិយាយបានថា នាងគឺជាតារាស្រីជួរមុខឱ្យផលិតកម្មមួយនេះទៅហើយ។ គ្រាប់ពេជ្រមួយគ្រាប់នេះ ក៏ធ្លាប់មានអតីតកាលឆ្លងកាត់ការប្រឡងចម្រៀងជាច្រើនកម្មវិធីផងដែរ មុននឹងបានល្បីល្បាញដូចសព្វថ្ងៃ។

យ៉ាងណាមិញ គេនៅចាំបានថា តន់ ចន្ទសីម៉ា ធ្លាប់ជាអតីតបេក្ខភាពប្រឡងចម្រៀង The Voice Cambodia រដូវកាលទី ២ ហើយក៏ជាកូនសិស្សរបស់តារាចម្រៀងប្រចាំផលិតកម្មហង្សមាសគឺ គ្រូបង្វឹក ឱក សុគន្ធកញ្ញា។ បើទោះបីជាការប្រឡងនៅគ្រានោះមិនទទួលបានពានរង្វាន់ក៏ពិតមែន ក៏ប៉ុន្ដែតារាចម្រៀងស្រីរូបនេះ នៅតែបន្តតស៊ូនៅលើវិថីសិល្បៈមិនលែង។

ជាមួយគ្នានោះដែរ តារាចម្រៀង តន់ ចន្ទសីម៉ា ក៏មិនដែលភ្លេចពីអតីតកាលរបស់ខ្លួនឡើយ នាងតែងតែរម្លឹកពីការដឹងគុណប្រាប់ទៅហ្វេនជានិច្ចថា មុននាងមានថ្ងៃនេះក៏ដោយសារមានការដុសខាត់ពីកំពូលតារាចម្រៀង ឱក សុគន្ធកញ្ញា។

ថ្មីៗនេះដែរ តន់ ចន្ទសីម៉ា បង្ហាញសកម្មភាពដឹងគុណចំពោះគ្រូបង្វឹក ឱក សុគន្ធកញ្ញា ដោយនាងបានរៀបរាប់នៅហ្វេសប៊ុកខ្លួនយ៉ាងក្បោះក្បាលចេញពីចិត្ត រហូតធ្វើឱ្យហ្វេនអ្នកគាំទ្រពោលសរសើរនាងគ្រប់គ្នា។ សីម៉ា បានរៀបរាប់ថា ៖ «🙏🙏🙏ខ្ញុំពិតជាមានអារម្មណ៍ថាកក់ក្ដៅសម្រាប់ពេលវេលា ដ៏មានតម្លៃនេះ អតីតកាលអ្នកគ្រូបានផ្ដល់ដំបូន្មានជាច្រើនសម្រាប់ខ្ញុំ ទោះបីខ្ញុំមិនអាច មានឱកាសទទួលពាន តែអ្នកគ្រូបាន ផ្ដល់កម្លាំងចិត្តឱ្យខ្ញុំ និងបានផ្ដល់ ឱកាសអោយខ្ញុំរហូតពេលវេលាចុងក្រោយ ។ ក្នុងនាមខ្ញុំជា សិស្សជំនាន់ក្រោយ នាងខ្ញុំ សូម គោរពអរគុណអ្នកគ្រូ និងជូនពរអ្នកគ្រូ ទទួលបានសុខភាពល្អមានសុភមង្គលពេញមួយជីវិត 🙏🙏»។

គ្រាន់តែលើកឡើង និងបង្ហោះរូបភាពស្និទ្ធស្នាលជាមួយអតីតគ្រូបង្វឹកខ្លួនបែបនេះភ្លាម សីម៉ា ក៏ទទួលការសរសើរពីមហាជនថា ជាតារាចម្រៀងកត្តញូ ស្អាតឆ្លាតពូកែ និងចេះដឹងគុណគ្រូដើម៕