អងគ្លេស – អ្នកគាំទ្របានចេញមកវាយប្រហារចំពោះបេក្ខនារីប៊ូតុងមាសដំបូងគេបង្អស់នៅក្នុងកម្មវិធី Britain’s Got Talent ក្រោយអ្នកនាងបានជាប់ទៅកាន់វគ្គ Live Show ឬវគ្គពាក់កណ្ដាលផ្ដាច់ព្រ័ត្រ ដោយស្វ័យប្រវត្តិ។ ការរិះគន់និងវាយប្រហារដ៏គំហុកមកលើបេក្ខនារីរូបនេះកើតមានឡើងព្រោះតែប្រវត្តិជោគជាំក្នុងវិស័យតន្ត្រីរបស់អ្នកនាង។
កាលពីពេលថ្មីៗនេះ Loren Allred បានឈ្នះប៊ូតុងមាសពីគណៈកម្មការ Amanda ហើយបានសិទ្ធិឡើងវគ្គ Semi-Final ដោយស្វ័យប្រវត្តិ។ នៅក្នុងវគ្គ audition នោះបេក្ខនារីរូបនេះបានណែនាំខ្លួនថាគឺជាម្ចាស់សំឡេង «Never Enough» បទចម្រៀងដាក់ក្នុងភាពយន្ត «The Greatest Showman» ដែលបទនេះច្រៀងឡើងដោយតួស្រី Rebecca Ferguson (Jenny Lind)។
អ្នកទស្សនាជាច្រើនមានចម្ងល់ថាហេតុអ្វីបណ្ដោយឱ្យតារាចម្រៀងដែលមានបទចម្រៀងហើយអាចដាក់ពាក្យប្រកួតបាន?
ឆ្លើយតបចំពោះសំនួរ និងមតិរិះគន់ជាច្រើនជុំវិញការប្រកួតរបស់ Loren Allred តំណាងរបស់កម្មវិធី BGT បានឆ្លើយប្រាប់ Metro ថា « អ្នកគ្រប់គ្នាសុទ្ធតែធ្លាប់បានឮបទចម្រៀងពីភាពយន្តល្បី Greatest Showman ប៉ុន្តែឈ្មោះ និងមុខរបស់ Loren មិនត្រូវបានទស្សនិកជនដឹងនិងស្គាល់នោះឡើយ ហេតុនេះអ្នកនាងគួរតែមានឱកាសមកបង្ហាញសមត្ថភាពរបស់ខ្លួនលើវេទិកាប្រកួត Britain’s Got Talent។
«ពួកយើងសង្ឃឹមថានឹងមិនមានដំណឹងចេញផ្សាយវាយប្រហារចំពោះនរណាម្នាក់ដែលស័ក្ដិសមនឹងទទួលបានឱកាស។ វាគឺជារឿងអស្ចារ្យមួយដែល Loren អាចឈានជើងចេញមកឈរយ៉ាងមាំហើយបង្ហាញមុខនិងសមត្ថភាពរបស់ខ្លួន មិនមែនត្រឹមតែសំឡេង ដែលធ្វើឱ្យមហាជនស្គាល់នោះទេ។
ចំណែក Loren ខ្លួនឯងផ្ទាល់បានលើកឡើងចំពោះស្ថានភាពនេះនិងការពារចំពោះការសម្រេចចិត្តរបស់អ្នកនាងចូលរួមក្នុងការប្រកួតនេះថា «ទោះជាខ្ញុំបានចំណាយពេលវេលាជាច្រើនឆ្នាំនៅក្នុងឧស្សាហកម្មតន្ត្រី ប៉ុន្តែមនុស្សជាច្រើននៅតែមិនស្គាល់ថាខ្ញុំជាអ្នកណាដែរ» ម្ចាស់ប៊ូតុងមាសរូបនេះបន្ថែមទៀតថា «ខ្ញុំមានឱកាសបានច្រៀងបទ Never Enough ឱ្យតួស្រីនៅក្នុងភាពយន្តនេះ ហើយទទួលបានជោគជ័យយ៉ាងសម្បើម ប៉ុន្តែមនុស្សមួយចំនួនធំនៅតែយល់ថាតួឯកស្រីគឺជាអ្នកច្រៀងចម្រៀងនេះ ដោយខ្ញុំគ្មានឱកាសបានប្រាប់រឿងរបស់ខ្ញុំទាល់តែសោះ»
ជាចុងក្រោយអ្នកនាងបាននិយាយថា «ខ្ញុំជាតារាចម្រៀងគ្មានផលិតកម្ម ជាតារាចម្រៀងឯករាជ្យ ដែលកំពុងតែព្យាយាមកសាងឈ្មោះខ្លួនឱ្យមហាជនបានស្គាល់»៕
ប្រភព៖ Digitalspy
អត្ថបទទាក់ទង
