គេចាំបានថា រឿងអាស្រូវរបស់លោកឧកញ៉ា ហេង សៀ បំពានលើកញ្ញា មាន ពេជ្ររីតា បានកើតឡើងឡើងក្នុងរថយន្តមួយគ្រឿងដោយតារាស្រីរូបនេះបានដាក់ពាក្យបណ្ដឹងទៅសមត្ថកិច្ច បានចោទថា លោកឧកញ៉ា ហេង សៀ បានប៉ុនប៉ងរំលោភសេពសន្ថវៈមកលើរូបនាងក្នុងរថយន្តតែម្តង។ ហេតុការណ៍នេះកើតឡើងកាលពីថ្ងៃទី០៤ ខែឧសភា ឆ្នាំ២០២១។
ដំបូងឡើយ មាន ពេជ្ររីតា ត្រូវឧកញ៉ាមានទ្រព្យខាងលើចោទប្រកាន់ថាលួចទ្រព្យនិងបង្កហិង្សាមានស្ថានទម្ងន់ទោស រហូតត្រូវសមត្ថកិច្ចចាប់ឃាត់ខ្លួន និងបញ្ជូនខ្លួនទៅឃុំឃាំង។ យ៉ាងណាមិញ បន្ទាប់ពីបណ្ដឹងបករបស់កញ្ញា មាន ពេជ្ររីតា ទៅលើឧកញ៉ា ហេង សៀ ពីបទ «ប៉ុនប៉ងរំលោភសេពសន្ថវ:» ក្នុងរថយន្ត ត្រូវបានផ្សព្វផ្សាយនិងមានការចែករំលែកលើបណ្ដាញសង្គម ភ្លាមៗនោះ លោក គី តិច ប្រធានក្រុមមេធាវីរាជរដ្ឋាភិបាល និង ជាប្រធានក្រុមមេធាវីស្ម័គ្រចិត្តសម្ដេចតេជោបានលូកដៃចូលជួយ និង ស្រាវជ្រាវ លើករណីបណ្ដឹងរបស់កញ្ញា មាន ពេជ្ររីតា ជាតារាសម្ដែង តារាម៉ូដែល និង ជាពិធីការិនីរបស់ទូរទស្សន៍ MYTV ដើម្បីស្វែងរកពន្លឺយុត្តិធម៌។
រឿងរ៉ាវកក្រើកប្រទេសនេះ ត្រូវបានប្រមុខរាជរដ្ឋាភិបាលកម្ពុជា សម្ដេចតេជោ នាយករដ្ឋមន្ត្រី រំលឹកឡើងវិញនៅក្នុងពិធីសំណេះសំណាលជាមួយសិស្សនិទ្ទេស A ក្នុងការប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០២១ នៅថ្ងៃទី ៣ ខែឧសភា ឆ្នាំ ២០២២នេះ សម្តេចតេជោ ហ៊ុន សែន បានមានប្រសាសន៍សង្កត់ធ្ងន់ថា ករណីនេះក្មេងស្រីនឹងរងភាពអយុត្តិធម៌ និងជាប់ពន្ធនាគារដល់ពេលនេះ ប្រសិនបើគ្មានការអន្តរាគមន៍ទាន់ពេលវេលារបស់សម្តេចទេនោះ។
សម្តេចតេជោ ហ៊ុន សែន បានបញ្ជាក់ដូច្នេះថា៖ «ប្រសិនបើបញ្ហានេះ គ្រាន់តែ”ស្រីញីប្រុសឈ្មោល” ខ្ញុំគ្មានការចាំបាច់ដើម្បីធ្វើអន្តរាគមន៍ទេ ប៉ុន្តែបញ្ហាវាស្ថិតនៅលើអំពើអយុត្តិធម៌ ក្មេងស្រីជានិស្សិត(ពេលនោះ)កំពុងជាប់នៅក្នុងមន្ទីរឃុំឃាំង ក្រោមអន្តរាគមន៍របស់ឧកញ៉ា៤-៥នាក់ឯនោះ តើខ្ញុំឱ្យខ្ញុំនៅស្ងៀមទេរឿងនេះ ខ្ញុំមិនមែនតិរច្ឆានទេ បើអ្នកជាតិរច្ឆានធ្វើតិរច្ឆានខ្លួនឯងចុះ ប៉ុន្តែក្នុងឋានៈជានាយករដ្ឋមន្រ្តី ខ្ញុំត្រូវតែមានការទទួលខុសត្រូវ ដើម្បីយុត្តិធម៌សម្រាប់ពលរដ្ឋរបស់ខ្លួន ដែលត្រូវគេបំពាន»។
សម្តេចបានបញ្ជាក់បន្ថែមថា «បន្ទាប់ទៅ កូនប្រសាររបស់ឧកញ៉ានេះ បានទិញដល់មេធាវីខ្ញុំទៅទៀត (មេធាវីខ្ញុំរាយការណ៍ឱ្យ) ដោយគេលើកឡើងថា នាយករដ្ឋមន្រ្តីនៅខាងឧកញ៉ាហើយ សារសំឡេងឆ្លើយឆ្លងទាំងប៉ុន្មាន គេបាញ់ Forward ជូនគ្នាទៅវិញទៅមក ហើយទីចុងបំផុតយើងបញ្ជាក់បានថា ខ្ញុំត្រូវឱ្យមេធាវីរបស់ខ្ញុំ ទៅធ្វើការធានាឱ្យ និស្សិតជានារីនៅក្រៅឃុំ»។ «បើខ្ញុំមិនអន្តរាគមន៍ ពេលនេះម៉ោងនេះ ចៅស្រីនោះកំពុងស្ថិតនៅក្នុងគុកនៅឡើយទេ សូមកុំច្រឡំ មានឧកញ៉ា ៥រូប បានចូលរួមព្រឹត្តិការណ៍នេះ ខ្ញុំមិនតិរច្ឆានដូចអ្នក អ្នកកុំអញ្ជើញខ្ញុំទៅធ្វើតិរច្ឆាន ខ្ញុំមិនទៅទេ ខ្ញុំដឹងរឿងខុស រឿងត្រូវ»។
ជាចុងក្រោយ សម្ដេចបានបញ្ជាក់ច្បាស់ៗថា «អាងតែមានលុយទៅបំពាន ដល់ចុងក្រោយខាងស្រីក៏មិនចង់មានរឿង ខាងប្រុសក៏មិនចង់មានរឿង ខាងប្រុសឧកញ៉ាក៏បានសារភាព ឧកញ៉ានេះបំពានហើយ លើកទៀតថា និស្សិតនេះជាស្រីរបស់ខ្លួនធ្លាប់ដេកធ្លាប់អីៗជាមួយគ្នាដែលបំពានថែមមួយរឿងទៀត ហើយទារលុយមិនបានទើបបានចាក់។ ក្រោយមកសារភាព ហើយស្នើសុំដោះស្រាយនៅខាងក្រៅ ខាងស្រីក៏មិនចង់ខូចឈ្មោះ ខាងប្រុសឧកញ្ញាក៏មិនចង់ខូចឈ្មោះ ទៅដោះស្រាយស្ងាត់ស្ងៀមទៅ»៕
