យុទ្ធសាស្ត្រ Marketing របស់លោក ហ្វៃ សំអាង ម្ដងនេះពិតជាទទួលបានលទ្ធផលគាប់ប្រសើរព្រោះទាក់ចិត្តឱ្យមហាជនចាំតាមដានរហូត ឧទាហរណ៍ដូចជាថ្មីៗលោក បានចេញមកទម្លា.យពីឈុតឆាកស្នេហាផ្អែមល្ហែមរវាងលោក អ៊ុន សិទ្ធា និងអ្នកនាង ចន ច័ន្ទលក្ខិណា ដោយគ្រាន់តែស្ដាប់តាមការរៀបរាប់របស់លោករួចហើយ ម្នាក់ៗរមួលខ្លួនចង់ដឹងសាច់រឿងឆាប់ៗ។
និយាយពីឈ្មោះលោក ហ្វៃ សំអាង អ្នកគាំទ្រនិងមហាជន បានទទួលស្គាល់ស្នាដៃនិពន្ធ និង ដឹកនាំរបស់លោករួចជាស្រេចទៅហើយ ព្រោះគ្រប់ស្នាដៃរបស់លោកតែងតែមានអ្វី ថ្មីនិងប្លែកៗ ជាចំណីចក្ខុជាជូនអ្នកទស្សនាជានិច្ចជាពិសេសមិនអាចខ្វះបាន ឈុតឆាកស្នេហាដែលតែងតែមាននៅក្នុងសាច់រឿងរបស់លោក ក៏ត្រូវបានមហាជនមើលឃើញថា មានភាពលេចធ្លោរ រហូតដល់អាចធ្វើឱ្យអ្នកទស្សនាខ្លះសឹងមិនហ៊ានទស្សនាក៏មាន ព្រោះតែមើលទៅដូចជាការពិតពេក។
បើមើលតាមការរៀបរាប់របស់លោក ហ្វៃ សំអាង តួអង្គអ្នកនាង ចន ច័ន្ទលក្ខិណា (ម៉ែដោះញញឹម) និង លោក អ៊ុន សិទ្ធា (ព្រះអង្គម្ចាស់ វរនន្ទ) គឺជាស្នេហាក្នុងយល់សប្តិ បង្កើតបានជាផ្ទាំងទស្សនីយភាពស្នេហាមួយផ្អែមល្ហែម ដែលគួរឱ្យពិចពិលរមិលមើលនៅលើឆ្នេរខ្សាច់ប្របមាត់ទឹក។ ខាងក្រោមនេះគឺជាការរៀបរាប់របស់លោក ហ្វៃ សំអាង ពីតួអង្គ ម៉ែដោះ ញញឹម និង ព្រះអង្គម្ចាស់វរនន្ទ៖
«លោកជំទាវ ចន ច័ន្ទលក្ខិណា មកលេីកនេះនៅក្នុងខ្សែភាពយន្តភាគខ្នាតធំរឿង អប្សរាមហាអង្គរ ជាតួអង្គមានឈ្មោះថាម៉ែដោះ ញញឹម ជាស្ត្រីដ៏មានឥទ្ធិពលនៅក្នុងព្រះរាជដំណាក់ វរនន្ទ។ ជាស្ត្រីដែលរក្សាភាពក្រមុំមិនយកស្វាមីព្រោះតែក្តីស្រម៉ៃមិនបានសម្រេច ប៉ុន្តែបែរជាអស់ព្រហ្មចារីតាមរយៈការសុបិនជាមួយ ព្រះអង្គម្ចាស់ វរនន្ទទៅវិញ ផ្ទាំងទស្សនីយភាពដែលពេចពិលរមិលមេីលនៅលេីឆ្នេរខ្សាច់ប្របមាត់ទឹក ម៉ែដោះ ញញឹម និងព្រះអង្គម្ចាស់ វរនន្ទដែលសម្ដែងដោយលោក អ៊ុន សិទ្ធា ពិតជា ផ្អែមល្ហែមដែលអាចធ្វើឲ្យលោកអ្នកទស្សនាមិនហ៊ានព្រិចនេត្រា។ ម៉ែដោះ ញញឹម ចរិតមុឺងម៉ាត់ ញញឹមពីមុខ លូកចាក់ពីក្រោយ បេីជួយធ្វេីកិច្ចការអ្វីត្រូវតែបានផលតបស្នង នៅឆាកចុងក្រោយ ម៉ែដោះ ញញឹម ត្រូវចងហាលភ្លៀង ក្រោមផ្គររន្ទះជាមួយសូរសៀងរំពាត់ខ្សែតី ដំបងគល់ឬស្សីពីដៃព្រះសេនា កលនិងហ៊ាន ដែលធ្លាប់គោរពឱនលំទោនឡេីងបែកឈាមពាសពេញខ្លួន។
យ៉ាងណាមិញសាច់រឿងដែលបានចំណាយពេលនិពន្ធរហូតដល់ទៅ៤ឆ្នាំនេះ កំពុងតែផលិតចេញជារូបភាពវីដេអូដើម្បីចាក់បញ្ចាំងជូនអ្នកគាំទ្រទស្សនានៅពេលខាងមុខនេះហើយ។ ចង់ដឹងថាមានអ្វីដែលពិសេសលើសពីការរៀបរាប់របស់អ្នកនិពន្ធ និងដឹកនាំ រូបនេះកុំភ្លេចចូលរួមជួយគាំទ្រស្នាដៃរបស់កូនខ្មែរទាំងអស់គ្នា៕