ក្នុងកិច្ចប្រជុំរបស់គណៈកម្មការស៊ីហ្គេម ដែលមានប្រទេសជាសមាជិកសមាគមប្រជាជាតិអាស៊ីអាគ្នេយ៍ហៅកាត់ថាអាស៊ានចូលរួមនោះ មានសម្រេចជំហានដំបូងមិនគាំទ្រការស្នើសុំលើកពេលប្រកួតរបស់ម្ចាស់ផ្ទះវៀតណាម ដែលត្រូវធ្វើនៅក្នុងខែធ្នូ ឆ្នាំ២០២១ ខាងមុខ ដោយហេតុផលវិបត្តិកូវីដ-១៩។
បើតាមសារព័ត៌មាន tv5.espn របស់ហ្វីលីពីន បានបញ្ជាក់នៅល្ងាចថ្ងៃពុធ នេះថា ក្នុងកិច្ចប្រជុំមន្រ្តីស៊ីហ្គេម មកពី១១ប្រទេស (បូកទាំងទីម័រខាងកើត) តាមប្រព័ន្ធអនឡាញ មានប្រទេសចំនួន៨ បានបដិសេធសុំមិនគាំទ្រការសុំលើកពេលស៊ីហ្គេមចុងឆ្នាំនេះ ក្នុងនោះមានកម្ពុជា ហ្វីលីពីន ម៉ាឡេស៊ី ឥណ្ឌូណេស៊ី សិង្ហបុរី ប្រ៊ុយណេ ថៃ និងម៉ាឡេស៊ី។ ចំណែកមីយ៉ាន់ម៉ា សុំគាំទ្រការស្នើសុំលើកពេលនេះ តែឡាវ សុំការសម្រេចចិត្តពីក្រុមប្រឹក្សាកីឡារបស់ខ្លួនសិន ហើយទីម័រខាងកើត មិនមានការឆ្លើយតប។
លទ្ធផលពីកិច្ចប្រជុំនេះ ត្រូវបានដាក់ជាប្រធានបទនៅក្នុងសេចក្តីសម្រេចរបស់អង្គប្រជុំក្រុមប្រឹក្សាកីឡាអាស៊ីអាគ្នេយ៍ ដែលគ្រោងធ្វើឡើងនៅ២សប្ដាហ៍បន្ទាប់ ដើម្បីសម្រេចថាគួរលើកពេលនៃការប្រកួតតាមការស្នើសុំរបស់ម្ចាស់ផ្ទះវៀតណាម ឬ យ៉ាងណា?
អត្ថបទពាក់ព័ន្ធ៖វិបត្តិកូវីដ-១៩ នៅកម្ពុជា ឡាវ ថៃ ដល់ថ្នាក់យកកីឡដ្ឋានធ្វើជាពេទ្យសម្រាប់ព្យាបាលដូចគ្នា
តាមផែនការការប្រកួតកីឡាស៊ីហ្គេម ធ្វើឡើងនៅរាល់២ឆ្នាំម្តង ខណៈឆ្នាំ២០២១ នេះវេនធ្វើឡើង២ឆ្នាំបន្ទាប់ពីហ្វីលីពីន កាលពីឆ្នាំ២០១៩។ វៀតណាម គ្រោងនឹងធ្វើឡើងពីថ្ងៃទី២១ ខែវិច្ឆិកា ដល់ថ្ងៃទី២ ខែធ្នូ ឆ្នាំ២០២១ ប៉ុន្តែកាលពីពេលថ្មីៗ បានស្នើសុំលើកពេលទៅធ្វើនៅឆ្នាំអំឡុងខែកក្កដា ឆ្នាំ២០២២ជំនួសវិញ។
សូមបញ្ជាក់ថាពេលនេះទីលានកីឡាវាយសី នៅ Bac Giang ត្រូវបានយកដាក់អ្នកជំងឺកូវីដ-១៩ នៅឡើយ ខណៈសារព័ត៌មាននៅវៀតណាម បានបញ្ជាក់ថាប្រទេសខ្លួនទើបតែបានចាក់វ៉ាក់សាំងការពារជំងឺកូវីដ-១៩ បានតិចតួចប៉ុណ្ណោះ។
អត្ថបទពាក់ព័ន្ធ៖ហ្វីលីពីន ថាម្ចាស់ផ្ទះវៀតណាមកំណត់ «មិនចាក់វ៉ាក់សំាង មិនឱ្យចូលប្រកួត» ក្នុងស៊ីហ្គេម
កន្លងមកវៀតណាម ធ្លាប់បានដាក់គោលការណ៍សម្រាប់អត្តពលិកពីប្រទេសអាស៊ានដែលត្រូវចូលរួមប្រកួតកីឡាស៊ីហ្គេមថា «មិនបានចាក់វ៉ាក់សាំង មិនឱ្យចូលប្រកួត» ស្របពេលតាមផែនការទំនងមានអត្តពលិកពីប្រទេសអាស៊ានចូលរួមប្រមាណជាង៧០០០នាក់ផងដែរ។
កន្លងមកម្ចាស់ផ្ទះស៊ីហ្គេមវៀតណាម បានកំណត់ប្រភេទកីឡាចំនួន៤០ប្រភេទមានវិញ្ញាសាសរុបចំនួន ៥២៦ ដាក់ឱ្យអត្តពលិកមកពីប្រទេសអាស៊ានចូលរួមប្រកួតប្រជែង៕
