នៅក្នុងកម្មវិធី America’s Got Talent 2021 មានបេក្ខនារីមួយរូប បានមកបង្ហាញសមត្ថភាពរបស់ខ្លួនដោយច្រៀងនូវចម្រៀង Original រៀបរាប់ពីសាច់រឿងរបស់ខ្លួនរហូតធ្វើឱ្យគណៈកម្មការរំភើបចិត្តជាពិសេសទទួលបានកណ្ដឹងមាស (Golden Buzzer) ពី Simon Cowell ឱ្យឆ្លងទៅកាន់វគ្គ Live Show ដោយស្វ័យប្រវត្តិ។
យោងតាមរយៈសារព័ត៌មានក៏ដូចជា Channel YouTube ផ្លូវការ America’s Got Talent បានបង្ហោះកាលពីថ្ងៃទី ៩ ខែ មិថុនា ឆ្នាំ ២០២១ ម្សិលមិញនេះ អ្នកនាង Jane Marczewski ដែលមានឈ្មោះសិល្បៈ ឬ ក្នុងពេលច្រៀងថា Nightbirde បានឡើងមកបង្ហាញសមត្ថភាពផ្នែកច្រៀងនៅលើវេទិកាបង្ហាញសមត្ថភាព America’s Got Talent ដោយលើកយកបទចម្រៀងនិពន្ធខ្លួនឯង (Original Song) មានចំណងជើងថា «It’s OK»។
ស្ត្រីវ័យ៣០ឆ្នាំខាងលើបានប្រាប់ទៅកាន់គណៈកម្មការទាំង៤រូបដែលមានដូចជា Simon Cowell, Sofia Vergara, Heidi Klum, និង Howie Mandel ថាបទចម្រៀងនេះគឺច្រៀងរៀបរាប់ពីរឿងរ៉ាវជីវិតរបស់អ្នកនាងកាលពីឆ្នាំមុន។
ស្ត្រីដែលមានដើមកំណើតនៅរដ្ឋ Ohio ក្រុង Zanesville បានទទួលស្គាល់បច្ចុប្បន្នអ្នកនាងនៅតែប្រឈមតស៊ូជាមួយនឹងជំងឺមហារីកដដែលចាប់តាំងពីអ្នកនាងបានធ្លាក់ខ្លួនឈឺកាលពីឆ្នាំ២០១៧កន្លងមក។ ឆ្លើយតបនឹងសំនួរ Simon ចំពោះបច្ចុប្បន្នភាពជំងឺមហារីករបស់ខ្លួនអ្នកនាង Jane បានពោលថា៖
«លើកចុងក្រោយដែលខ្ញុំទៅពិនិត្យ ជំងឺមហារីកមាននៅក្នុងសួត មាននៅក្នុងឆ្អឹងកងនិងមាននៅក្នុងថ្លើម»
ស្ត្រីអ្នកចម្រៀងដែលកំពុងតស៊ូជាមួយនឹងជំងឺមហារីកជាច្រើនកន្លែងលើរាងកាយរូបនេះបានពោលដោយភាពភាពជឿជាក់និងក្ដីសង្ឃឹមថា៖
«រឿងសំខាន់គឺអ្នកគ្រប់គ្នាបានដឹងថាខ្ញុំមានភាពប្រសើរជាងរឿងអាក្រក់ៗដែលកើតក្នុងជីវិតខ្ញុំ។ មានឱកាសត្រឹម២%យកឈ្នះមហារីកមិនមែន០%ទេ ទោះជា២%ក៏ជាឱកាសដែរ ខ្ញុំប្រាថ្នាឱ្យមនុស្សទាំងអស់ដឹងថាបានប៉ុណ្ណេះអស្ចារ្យប៉ុណ្ណា»។
នៅពេលគណៈកម្មការឱ្យអ្នកនាងបង្ហើរសំនៀងបទចម្រៀង «It’s OK» ចប់គ្រប់គ្នាហាក់ពេញបរិបូរទៅដោយកម្លាំង ជាពិសេសញាប់ញ័រនឹងអត្ថន័យដែលពោរពេញដោយក្ដីសង្ឃឹម ការតស៊ូក្នុងបទចម្រៀង។
«នេះជាអ្វីមួយដែលពិតប្រាកដជាទីបំផុតដែលខ្ញុំបានស្ដាប់ក្នុងរដូវកាលនេះ» នេះជាការលើកឡើងរបស់ Mandel ខណៈ Vergara ពោលថា «ពោរពេញទៅកម្លាំង. ពេញដោយភាពស្មោះត្រង់ ខ្ញុំគិតថាអ្នកពិតជាអស្ចារ្យណាស់»។
Simon Cowell បានពោលទៅកាន់ Jane Marczewski ថា៖ «បទចម្រៀងមួយនេះមានអ្វីដ៏អស្ចារ្យម្យ៉ាង ជាពិសេសវិធីសាស្ត្រដែលអ្នកស្ទើរតែរៀបរាប់រឿងរ៉ាវដែលអ្នកកំពុងតែជួបប្រទះ។ ឆ្នាំនេះមានអ្នកចម្រៀងពីរោះជាច្រើននាក់ ខ្ញុំនឹងមិនផ្ដល់ Yes ឱ្យអ្នកនោះទេ។ តែខ្ញុំនឹងឱ្យអ្វីផ្សេងទៅកាន់អ្នក»។
អ្វីផ្សេងដែល Simon លើកឡើងនោះគឺកណ្ដឹងមាស ដែលមានសេចក្ដីថា Nightbirde ផ្លោះរំពងពីវគ្គ Audition ឡើងរហូតដល់វគ្គ Live Show តែម្ដង។
Jane Marczewski (Nightbirde) បានធ្លាក់ខ្លួនឈឺដោយសារជំងឺមហារីកជាច្រើនកន្លែងនៅអាយុ២៩ឆ្នាំ ដែលកាលនោះនាងត្រូវតស៊ូជាមួយនឹងជំងឺដ៏កាចសាហាវនេះ ថែមពីលើនោះទេជីវិតនាងហាក់រលាយគ្មានសេសសល់អ្វីព្រោះស្វាមីរបស់នាងបានចាកចេញពីនាងក្រោយនាងធ្លាក់ខ្លួនឈឺជំងឺមហារីកនៅត្រឹមតែមួយសប្ដាហ៍មុនមានការឆ្លងរាតត្បាតនៃជំងឺ Covid-19 ៕
ទស្សនាវីដេអូបង្ហាញសមត្ថភាព Nightbirde វគ្គ Judge Audition ខាងក្រោម៖
