Movie Musical ឬជាភាពយន្តតន្ត្រីដែលមានចំណងជើង «1660 Vine» មានការចូលរួមសម្ដែងដោយ អ្នកអង្គម្ចាស់ នរោត្តម រស្មី ខែមុន្នី នៅពេលថ្មីៗនេះ បានបញ្ចេញ Trailer ជាផ្លូវការហើយ ថែមទាំងបញ្ជាក់ពីថ្ងៃចាក់បញ្ចាំងឱ្យអ្នកគាំទ្របានដឹងទៀតផង។
ភាពយន្តតន្ត្រី «1660 Vine» គឺជាតន្ត្រីភាពយន្តថ្មីសន្លាងមួយដែលមានភាពស្រដៀងគ្នាទៅនឹងភាពយន្ត Higt Scool Musical បានប្រមូលផ្ដុំតារាចម្រៀងល្បីតាមបណ្ដាញសង្គមមកជាង ២០ រូប ឱ្យជួបគ្នាបង្ហើរសំនៀងដ៏ពីរោះទៅតាមសាច់រឿងដែលបានតាក់តែង។ តាមរយៈវីដេអូ Trailer ដំបូងដែលបានបង្ហាញជាផ្លូវការ គេមើលឃើញថា តួអង្គនីមួយៗនៅក្នុងសាច់រឿង គឺបានចាកចេញមកពីកន្លែងផ្សេងៗគ្នា ហើយមកជួបគ្នានៅទីតាំងប្រសព្វមួយ ដែលពួកគេ អាចធ្វើបច្ចុប្បន្នភាពទៅកាន់អ្នកតាមដានរបស់ពួកគេតាមរយៈ vlogs ការផ្សាយហ្គេម ការបង្រៀនតុបតែងមុខ ការរាំនៅក្នុងវីដេអូTikTok បទចម្រៀង និងការលេងសើចកំប្លែង។
ជាពិសេសភាពយន្តហូលីវូដមួយនេះ មានការចូលរួមសម្ដែងពីតារាចម្រៀងនាំមុខដូចជា អ្នកអង្គម្ចាស់ នរោត្តម រស្មី ខែមុន្នី ដែលជាតារាចម្រៀងមួយរូបមានឈ្មោះល្បីនៅលើយូធូប អ្នកគ្រូបង្វឹក Cheryl Porter ដែលជាគ្រូបង្វឹកសំឡេងច្រៀងនៅលើបណ្ដាញសង្គមនានា ជាពិសេសល្បីខ្លាំងនៅលើ TikTok តារាសម្តែង Chris Olsen និងម្ចាស់ពាន American Idol កញ្ញា Pia Toscano ជាដើម។
សូមជម្រាបបន្ថែមថា ភាពយន្តតន្ត្រី «1660 Vine» គ្រោងចាក់បញ្ចាំងជាផ្លូវការនៅថ្ងៃទី ៤ ខែវិច្ឆិកា ឆ្នាំ២០២២ នេះបើតាមការបញ្ជាក់ថ្មី។ ហើយព័ត៌មាននៃការទស្សនា ត្រូវបានធ្វើឡើងនៅលើគេហទំព័រថ្មីរបស់ភាពយន្តនេះផ្ទាល់តែម្ដង 1660vine.com។
សម្រាប់តួអង្គ អ្នកអង្គម្ចាស់ នរោត្តម រស្មី ខែមុន្នី គឺត្រូវបានសម្ដែងជាតួកំឡោះសង្ហាដែលចាកចេញពីការរស់នៅលើទឹកដីហូលីវូដ មកជួបជាមួយក្រុមអ្នកធ្វើការងារនៅលើបណ្ដាញសង្គម។ ទ្រង់បានចូលរួមសម្ដែងភាពយន្តជាលើកដំបូងបង្អស់ បន្ទាប់ពីបញ្ចប់ការសិក្សាពីថ្នាក់បណ្ឌិតផ្នែកសិល្បៈល្ខោន នៅសហរដ្ឋអាមេរិក។ ទ្រង់បានទទួលចំណេះចំនាញផ្នែករបាំពីសម្តេចព្រះបរមនាថ នរោត្តម សីហមុនី ហើយក្រោយមកទ្រង់ក៏ក្លាយជាអ្នកការទូតលើផ្នែកផ្សព្វផ្សាយវប្បធម៌បុរាណខ្មែរ។ ទ្រង់បានចូលប្រឡូកសិល្បៈពេញលេញនៅឆ្នាំ ២០១៧។
