យោងតាមសារព័ត៌មាន The New York Time របស់សហរដ្ឋអាមេរិកបានរាយការណ៍ថាមេដឹកនាំកូរ៉េខាងជើង លោក Kim Jong Un បានហៅឧស្សាហកម្មចម្រៀង K-Pop របស់កូរ៉េខាងត្បូងថាជា «ជំងឺមហារីកសាហាវ» ដែលនឹងនាំគ្រោះថ្នាក់មកដល់ភាពស្ថិតស្ថេរគង់វង្សរបស់ប្រទេសកូរ៉េខាងជើង។
សូមចុចអាន៖ នៅពីក្រោយរូបថតញ៉ាំចេក របស់តារាចម្រៀង Sandara Park មានអាថ៌កំបាំងសំខាន់មួយ!
មេដឹកនាំកូរ៉េខាងជើងរូបនេះបានបន្ថែមទៀតថា K-Pop បានបំផ្លិចបំផ្លាញដល់ការតុបតែងខ្លួន ម៉ូដសក់ ការនិយាយស្ដី ព្រមទាំងអាកប្បកិរិយារបស់ជនជាតិកូរ៉េខាងជើង ហើយអាចនឹងធ្វើឱ្យប្រទេសកូរ៉េខាងជើងរលំរលាយប្រៀបដូចជញ្ជាំងដុះស្នឹម។
លោក Kim បានបន្តទៀតថាកន្លងមក កូរ៉េខាងជើងបានព្យាយាមបិទបាំងការពារមិនឱ្យឥទ្ធិពលបរទេសចូលមកជ្រួតជ្រាបក្នុងចំណោមប្រជាជនខ្លួន។
សារព័ត៌មាន The New York Times បានធ្វើសេចក្ដីរាយការណ៍បន្ថែមទៀតថា កូរ៉េខាងជើងបានចេញច្បាប់ថ្មីកាលពីខែធ្នូចុងឆ្នាំ២០២០ កន្លងទៅឱ្យបញ្ជូនអ្នកណាក៏ដោយដែលមើលព័ត៌មានរបស់ប្រទេសកូរ៉េខាងត្បូងទៅប្រើប្រាស់កម្លាំងនៅក្នុងជំរុំឃុំឃាំងរហូតដល់ ១៥ឆ្នាំ ខណៈអ្នកដែលនិយាយ សរសេរ ឬច្រៀងចម្រៀងកូរ៉េខាងត្បូងនឹងត្រូវបញ្ជូនទៅជំរុំឃុំឃាំងឱ្យប្រើប្រាស់កម្លាំងពលកម្មរយៈពេល ២ឆ្នាំ។
គ្រួសាររបស់លោក Kim Jong Un បានគ្រប់គ្រងប្រទេសកូរ៉េខាងជើង៣ជំនាន់មកហើយ ក្នុងនោះកូរ៉េខាងជើងចេញមកឃោសនាបបួលឱ្យប្រជាជនមើលឃើញថាកូរ៉េខាងត្បូងជាប្រទេសក្រីក្រនិងមានមនុស្សសុំទានច្រើន ប៉ុន្តែមានមនុស្សលបលួចនាំព័ត៌មានសិល្បៈកម្សាន្តកូរ៉េខាងត្បូងទៅចែកចាយនៅកូរ៉េខាងជើងតាម Flash Drive ធ្វើឱ្យជនជាតិកូរ៉េខាងជើងជំនាន់ក្រោយៗបានដឹងថា ជនជាតិកូរ៉េខាងត្បូងមិនបានប្រឈមនឹងជីវភាពក្រីក្រដូចជាប្រទេសកូរ៉េខាងជើងកំពុងជួបប្រទះនោះទេ៕