ទំនប់ទឹកទំហំ១លានម៉ែត្រគីប នៅលើកំពូលភ្នំបូកគោ នឹងបញ្ចប់ការសាងសង់នៅប្រមាណជា ៣ ខែខាងមុខ។ ទំនប់ទឹកនេះជាអាងទឹកថ្មីមួយទៀតបន្ទាប់ពីបឹងធម្មជាតិ ដែលមានស្រាប់ ហើយវាមានសារសំខាន់ណាស់សម្រាប់ផ្គត់ផ្គង់ទឹកនៅក្នុងក្រុងបូកគោទាំងមូល។ នេះបើតាមការឲ្យដឹងពីលោក កែវ សិទ្ធ ប្រធានផ្នែកលក់នៃក្រុមហ៊ុនសុខា។
ទំបន់ទឹកនេះជាគម្រោងរបស់ក្រុមហ៊ុនសុខា របស់អ្នកឧកញ៉ាសុខ គង់ ដែលទទួលបានសិទ្ធិផ្ដាច់មុខក្នុងការអភិវឌ្ឍនៅលើកំពូលភ្នំបូកគោ។
ស្ថិតក្នុងចំណោមគម្រោងសំណង់ធំៗដូចជា ផ្លូវតភ្ជាប់ក្រុងបូកគោទៅផ្លូវជាតិលេខ៤ ប្រវែង ជាង៦០ គីឡូម៉ែត្រ និងព្រះពុទ្ធបដិមាកម្ពស់ ១០៨ ម៉ែត្រ គម្រោងទំនប់ទឹកនេះមានប្រវែង ២០០ ម៉ែត្រ កម្ពស់២០ ម៉ែត្រ កម្ពស់ទឹក ១៥ ម៉ែត្រ ផ្ទៃទឹកលាតសន្ធឹងបណ្ដោយ ១ ០០០ ម៉ែត្រ និងចំណាយខ្ទង់៥លានដុល្លារ។ បើតាមការបញ្ជាក់ពីលោក កែវ សិទ្ធ គម្រោងនេះគ្រោងចំណាយពេល៣ឆ្នាំ ប៉ុន្តែជាក់ស្ដែងអាចនឹងហើយមុនកាលកំណត់ ពោលគឺអាចនឹងបញ្ចប់ជាស្ថាពរនៅអំឡុងខែកញ្ញា ឆ្នាំ ២០២៤។
សូមបញ្ជាក់ថា ក្រុមហ៊ុនសុខាបានទទួលសិទ្ធអភិវឌ្ឍន៍លើកំពូលភ្នំបូកគោក្រោមរូបភាពសម្បទានរយៈពេល ៩៩ឆ្នាំ ពីរាជរដ្ឋាភិបាល នៅឆ្នាំ ២០០៨ លើផ្ទៃដី ៤១ ១៤៨ ហិកតារ នៃផ្ទៃដីឧទ្យានជាតិព្រះមុនីវង្សបូកគោសរុប ១៥៤ ៤៥៩ ហិកតារ។
អត្ថបទ៖ ឈិន ធារ៉ាត់
