ឆ្លើយតបទៅកាន់សំណួរអ្នកសារព័ត៌មាននៃស្ថានីយទូរទស្សន៍មហាផ្ទៃ ដែលជាប្រព័ន្ធផ្សព្វផ្សាយរបស់ក្រសួងផ្ទាល់ ឧត្ដមសេនីយ៍ឯក តុប នេត អគ្គនាយកអត្តសញ្ញាណកម្ម បានឱ្យដឹងថា អគ្គនាយកដ្ឋានអត្តសញ្ញាណកម្ម នៃក្រសួងមហាផ្ទៃ គ្រោងពង្រីកការផ្ដល់សេវាលិខិតឆ្លងដែនទៅកាន់ ២ខេត្តទៀត គឺខេត្តត្បូងឃ្មុំ និងខេត្តសៀមរាប។ កិច្ចការនេះ គឺជាគោលដៅមួយនៃការបង្ខិតសេវាសាធារណៈ ឱ្យនៅកៀកជិតនឹងប្រជាពលរដ្ឋ។
អគ្គនាយក នៃអគ្គនាយកដ្ឋានអត្តសញ្ញាណកម្ម បានគូសបញ្ជាក់ថា បច្ចុប្បន្នសេវាផ្ដល់លិខិតឆ្លងដែនមានចំនួន៥កន្លែង គឺទី១ នៅក្រោយវត្តនិរោធរង្សី ក្នុងសង្កាត់និរោធ ខណ្ឌច្បារអំពៅ, ទី២ ផ្សារទំនើបអ៊ីអន២ សែនសុខ, ទី៣ នៅខេត្តកោះកុង, ទី៤ នៅខេត្តបាត់ដំបង, និងទៅ៤ នៅក្រុងប៉ោយប៉ែត ខេត្តបន្ទាយមានជ័យ។ បច្ចុប្បន្នអគ្គនាយកដ្ឋានទទួលបានគោលការណ៍ពីក្រសួងមហាផ្ទៃ និងបានត្រៀមសម្ភារបរិក្ខារគ្រប់គ្រាន់ ពោលយ៉ាងយូរ ដំណើរការនៃការផ្ដល់សេវាលិខិតឆ្លងដែននៅខេត្តត្បូងឃុំ និងខេត្តសៀមរាប នឹងចាប់ផ្ដើមនៅក្នុងត្រីមាសទី៤ នៃឆ្នាំ ២០២៤នេះ៕
