គិតចាប់តាំងពីទទួលបានសិទ្ធិអភិវឌ្ឍនៅលើកំពូលភ្នំបូកគោ ក្រុមហ៊ុនរបស់ អ្នកឧកញ៉ា សុខ គង់ ចំណាយទុនវិនិយោគគិតជាសាច់ប្រាក់ប្រមាណជាង ៧០០លាន ទៅ៨០០លាន ដុល្លារ។ បើតាមការបញ្ជាក់របស់លោក មកដល់ឆ្នាំ ២០២៤ នេះ ផលចំណេញបានមកពីការអភិវឌ្ឍនៅមិនទាន់រួចខ្លួននៅឡើយ។
រយៈពេល ១៦ ឆ្នាំ នៃ ៩៩ឆ្នាំ សម្រាប់សិទ្ធិអភិវឌ្ឍលើកំពូលភ្នំបូកគោ ដែលផ្ដល់ដោយរាជរដ្ឋាភិបាល អ្នកឧកញ៉ា សង្ឃឹមជឿជាក់យ៉ាងមុតមាំលើអ្នកជំនាន់ក្រោយរបស់លោក នឹងបន្តសម្រេចគម្រោងដ៏មហិមានេះនាពេលអនាគត ដោយលោកពោលថា «ខ្ញុំមានទ្រព្យគ្រប់គ្រាន់សម្រាប់ខ្លួនឯងហើយ ប៉ុន្តែខ្ញុំចង់បន្សល់កេរដំណែលដល់អ្នកជំនាន់ក្រោយ »។
តើចាប់តាំងពីឆ្នាំ២០០៨ មក អ្នកឧកញ៉ា សុខ គង់ បានធ្វើការអភិវឌ្ឍអ្វីខ្លះនៅភ្នំបូកគោ?
នៅពេលដែលទទួលបានសិទ្ធិអភិវឌ្ឍពេញទីលើផ្ទៃដី ៤ម៉ឺនហិចតារ នៃតំបន់ឧទ្យានជាតិព្រះមុនីវង្សបូកគោ (លើកំពូលភ្នំបូកគោ) ក្រុមហ៊ុនសុខាអូតែល និងក្រុមហ៊ុនដែលជាប់សែស្រឡាយផ្សេងៗទៀត ឋិតក្រោមការគ្រប់គ្រងរបស់អ្នកឧកញ៉ា សុខ គង់ បានបោះទុនលើគម្រោង ៣ធំៗ គឺគម្រោងកែលម្អផ្លូវឡើងទៅលើកំពូលភ្នំចម្ងាយជាង៣០គីឡូម៉ែត្រ, គម្រោងសណ្ឋាគារឋានសួគ៌បូកគោ និងគម្រោងបដិមាដូនម៉ៅកម្ពស់២៩ម៉ែត្រ។
រូបសំណាកដូនម៉ៅ ត្រូវបានចាប់ផ្ដើមសាងសង់នៅថ្ងៃទី២៧ ខែកុម្ភៈ ឆ្នាំ២០១០ និងបញ្ចប់នៅថ្ងៃទី៣ ខែឧសភា ឆ្នាំ២០១២។ រូបសំណាកនេះ ត្រូវបានសាងសង់ឡើងពីស៊ីម៉ង់ ដែលមានកម្ពស់ ២៩ ម៉ែត្រ និងទទឹង ៨ម៉ែត្រ នៅជិតច្រាំងចោទនៃឆ្នេរសមុទ្រ។ សំណង់ទាំងមូលមានតម្លៃជាង ២សែន ១ម៉ឺន ដុល្លារអាមេរិក (២១០ ១៨២)។ ទីនោះក៏ក្លាយទៅជាទីសក្ការធំជាងគេ ដែលមនុស្សម្នាទៅកម្សាន្តលើភ្នំបូកគោតែងចូលទៅគោរពបូជា។ មិនត្រឹមតែប៉ុណ្ណោះ បដិមានេះអាចនិយាយបានថា ជាអត្តសញ្ញាណនៃរមណីយដ្ឋានភ្នំបូកគោទៅហើយ។
ជាមួយគ្នានោះដែរ គម្រោងកែលម្អផ្លូវក្រាលកៅស៊ូ គ្របលើបេតុងពីជើងភ្នំ ឡើងទៅដល់សណ្ឋាគារឋានសួគ៌បូកគោ ចម្ងាយ ៣២គីឡូម៉ែត្រ ទទឹង ៨ម៉ែត្រ ក៏ត្រូវបានធ្វើឡើង ទន្ទឹមគ្នានឹងសណ្ឋាគារនោះផងដែរ ហើយគម្រោងទាំងពីរនេះសម្ពោធជាផ្លូវការនៅខែសីហា ឆ្នាំ២០១២។ គម្រោងកែលម្អផ្លូវភ្នំបូកគោនេះ ធ្វើឡើងលើដានផ្លូវចាស់ ដោយពង្រីកបន្ថែមទ្វេដង ចាក់បេតុងខាងក្រោម និងក្រាលកៅស៊ូខាងលើ។ គម្រោងផ្លូវនេះចំណាយថវិកាសាងសង់គិតជាមធ្យមក្នុង ១គីឡូម៉ែត្រអស់ ១លានដុល្លារ ដូច្នេះប្រសិនបើគិតសរុប ៣២គីឡូម៉ែត្រ ប្រហែលជាង ៣២លានដុល្លារ ។ ចំណែកគម្រោងសណ្ឋាគារវិញ ពុំមានព័ត៌មានអំពីទំហំទឹកប្រាក់សាងសង់ច្បាស់លាស់នោះទេ គេគ្រាន់តែដឹងថា សណ្ឋាគារនេះមានជាង៤១០ បន្ទប់ បែងចែកជាពីរលំដាប់ ដែលមានតម្លៃចាប់ពី ៨៥ដុល្លារ ដល់ ១៧៥ដុល្លារ ក្នុងមួយយប់។
នៅឆ្នាំ២០១៧ ក្រុមហ៊ុនសុខាបានទទួលសិទ្ធិជួសជុលកែលម្អសណ្ឋាគារចំណាស់ (កាស៊ីណូចាស់) មានអាយុជិត ១០០ឆ្នាំ នៅលើកំពូលភ្នំបូកគោ និងដាក់ឈ្មោះថា ឡឺបូកគោផាឡេស (Le Bokor Palace) ហើយបើកដំណើរការជាផ្លូវការនៅពាក់កណ្ដាលខែកុម្ភៈ ឆ្នាំ២០១៨។ សណ្ឋាគារនេះមាន ៣៦ បន្ទប់, ភោជនីយដ្ឋាន២ និងជាសណ្ឋាគារលំដាប់ផ្កាយ៥។
ដោយមានសិទ្ធិពេញដៃ ក្រុមហ៊ុននេះ បានទប់ស្ទឹងមួយបង្ខាំងយកទឹកដើម្បីប្រើប្រាស់នៅលើភ្នំ ហើយក៏ហៅទំនប់នោះថាជាបឹងធម្មជាតិ ដែលមានទីតាំងក្បែរផ្ទះអ្នកឧកញ៉ា សុខ គង់ តែម្ដង។ បឹងនេះមានទឹកខួបប្រាំងខួបវស្សា ដែលជាប្រភពទឹកដ៏សំខាន់សម្រាប់ប្រើប្រាស់នៅលើកំពូលភ្នំបូកគោទាំងមូល ហើយក៏ជាប្រភពទឹកសម្រាប់ផលិតទឹកពិសា ឋានសួគ៌បូកគោ ផងដែរ។
រោងចក្រផលិតទឹកពិសាឋានសួគ៌បូកគោ ក៏ជាសហគ្រាសស្ថិតក្រោមក្រុមហ៊ុន បូកគោហ្វាម របស់អ្នកឧកញ៉ា សុខ គង់ ដែរ ដែលត្រូវបានបង្កើតឡើងនៅឆ្នាំ ២០១៩ ដោយមានទឹកប្រាក់វិយោគចំនួន ២លានដុល្លារ។ រោងចក្រនេះមានទំហំ ១ ០៦២ ម៉ែត្រទ្វេគុណ និងស្ថិតនៅលើភ្នំបូកគោ។ ក្នុងមួយថ្ងៃ រោងចក្រនេះអាចផលិតទឹកសុទ្ធបានខ្ទង់ ៥ម៉ឺនដប។
ទន្ទឹមគ្នានេះ ទំហំវិនិយោគ ៥លានដុល្លារ ទៀត អ្នកឧកញ៉ា សុខ គង់ បានដាក់លើកសិដ្ឋានបូកគោ (Bokor Farm)។ កសិដ្ឋាននេះមានផ្ទៃដីសរុប ១២ហិចតារ ដាំដំណាំប្រភេទបន្លែធម្មជាតិប្រមាណជិត១០០ មុខ មានទាំងដំណាំលើដី និងដំណាំប្រើប្រព័ន្ធបំពង់ទឹក។ ដំណាំបន្លែបង្ការទាំងអស់នោះ ភាគច្រើនផ្គត់ផ្គង់ទៅឲ្យតែសណ្ឋាគារ និងភោជនីយដ្ឋានរបស់សុខាអូតែល។
ក្រុមហ៊ុនសុខា ក៏កំពុងសាងសង់ ទំនប់ទឹកទំហំ១លានម៉ែត្រគីប ចំណាយខ្ទង់ ៥លានដុល្លារ ។ ទំនប់ទឹកនេះមានប្រវែង ២០០ ម៉ែត្រ កម្ពស់២០ ម៉ែត្រ កម្ពស់ទឹក ១៥ ម៉ែត្រ ផ្ទៃទឹកលាតសន្ធឹងបណ្ដោយ ១ ០០០ ម៉ែត្រ។ គម្រោងនេះគ្រោងចំណាយពេល៣ឆ្នាំ ប៉ុន្តែជាក់ស្ដែងអាចនឹងហើយមុនកាលកំណត់ ពោលគឺអាចនឹងបញ្ចប់ជាស្ថាពរនៅអំឡុងខែកញ្ញា ឆ្នាំ ២០២៤។ ទំនប់ទឹកនេះជាអាងទឹកថ្មីមួយទៀតបន្ទាប់ពីបឹងធម្មជាតិ ដែលមានស្រាប់ ហើយវាមានសារសំខាន់ណាស់សម្រាប់ផ្គត់ផ្គង់ទឹកនៅក្នុងក្រុងបូកគោទាំងមូល។
បន្ថែមលើបដិមាដូនម៉ៅ នៅដំណាក់ស្លាខ្មៅ គម្រោងកសាង ពុទ្ធប្បដិមាកម្ពស់ ១០៨ ម៉ែត្រ នៅលើកំពូលភ្នំបូកគោ ក៏កំពុងប្រតិស្ឋឡើងដែរ បើគិតត្រឹមខែមិថុនា ឆ្នាំ២០២៤ គម្រោងនេះសម្រេចបានជាង៣០ភាគរយហើយ។ គម្រោងពុទ្ធប្បដិមា ដែលជាទីសក្ការបូជាកម្ពស់ជាង ១០០ គ្រោងចំណាយថវិកាកសាងប្រមាណជាង ៣០ លានដុល្លារ។ មូលហេតុដែលនាំឲ្យកសាងបដិមាព្រះពុទ្ធដ៏ធំមួយនេះឡើង គឺដោយសារភ្នំបូកគោក៏ជាទីតាំងបណ្ដុំនៃទេសចរណ៍បែបសាសនាផងដែរ។
គម្រោងចំណាយដ៏ធំមួយទៀតនោះ គឺ ផ្លូវថ្មី តភ្ជាប់ពីផ្លូវចាស់នៅត្រង់រូបសំណាកព្រះពុទ្ធកម្ពស់ ១០៨ម៉ែត្រ ទៅដល់ផ្លូវដល់ផ្លូវជាតិលេខ៤។ ផ្លូវថ្មីនេះមានប្រវែងជាង ៦០គីឡូម៉ែត្រ ទទឹង១២ម៉ែត្រ តភ្ជាប់ពីក្រុងបូកគោនៃខេត្តកំពត ដល់ផ្លូវជាតិលេខ៤ត្រង់ចម្ការដូងប្រេងឧកញ៉ា ម៉ុង ឫទ្ធី ម្ដុំគីឡូម៉ែត្រ ១៥៨ ដោយក្រាលបេតុងខាងក្រោម ហើយចាក់កៅស៊ូខាងលើ ដើម្បីធានាគុណភាពប្រើប្រាស់បានយូរអង្វែង។ បើតាមអ្នកគ្រប់គ្រងគម្រោង និងអ្នកជំនាញ ផ្លូវថ្មីនេះជាគម្រោងដ៏លំបាក និងចំណាយច្រើន។ ផ្លូវថ្មីនេះមិនមានគម្រោងចំណាយច្បាស់លាស់ និងកាលកំណត់បិទការដ្ឋាននោះទេ ប៉ុន្តែគេអាចប៉ាន់ស្មានបានតាមរយៈកំណាត់ផ្លូវដែលចាក់បេតុងរួចបានប្រហែល ៣គីឡូម៉ែត្រថា ក្នុងមួយគីឡូម៉ែត្រចំណាយអស់ ៣លានដុល្លារ។ ដូច្នេះ ប្រវែង ៦០គីឡូម៉ែត្រចំណាយអស់ប្រហែល ១៨០លានដុល្លារ។
ក្រៅពីគម្រោងធំៗ ដែលត្រូវបានបង្ហាញជាសាធារណៈតាមរយៈទស្សនកិច្ចរបស់អ្នកសារព័ត៌មានដែលរៀបចំដោយក្លឹបអ្នកកាសែតកម្ពុជា កាលពីថ្ងៃទី ២៨ ដល់ថ្ងៃទី ៣០ ខែឧសភា ឆ្នាំ២០២៤ ក្រុងបូកគោក្នុងដៃក្រុមហ៊ុនរបស់ឧកញ៉ា សុខ គង់ ត្រូវបានឈូសឆាយធ្វើជាផ្លូវគមនាគមន៍ខ្វាត់ខ្វែង តភ្ជាប់ពីកន្លែងមួយទៅកន្លែងមួយ អមដោយបង្គោល និងខ្សែភ្លើងច្រូងច្រាង។ ជាមួយគ្នានេះ គម្រោងលំនៅឋានសម្រាប់អ្នកមាន និងអភិជនក៏កំពុងពង្រីកខ្លួនវាតទីលើដីព្រៃរបោះចូលជិតពាន់ហិកតារ។
ក្នុងផ្ទៃដីសម្បទានពីរាជរដ្ឋាភិបាល ៤១០០០ ហិកតារ ផ្ទៃដីប្រមាណជា ៧៥៨ ហិកតារ ត្រូវបានក្រុមហ៊ុនសុខាបែងចែកទៅជាដីសម្រាប់អភិវឌ្ឍលំនៅឋាន ក្រោមការគ្រប់គ្រងរបស់ក្រុមហ៊ុនសុខាអចលនទ្រព្យ (Sokha Real-estate ) ។ ដីសម្រាប់អភិវឌ្ឍលំនៅឋានជិត ៧៦០ ហិកតារ ត្រូវបែងចែកទៅជា៣គម្រោង រួមមាន៖
គម្រោងទី១ ឈ្មោះថា បុរីអម្រឹត ឋានសួគ៌ គ្របដណ្ដប់លើផ្ទៃដី ៨០ ហិកតារ ជាលំនៅឋានបែបផ្ទះល្វែង៣ជាន់ មានចំនួន ៤ ២៤០ ល្វែង។
គម្រោងទី២ ឈ្មោះថា បុរីមរតក ឋានសួគ៌ គ្របដណ្ដប់លើផ្ទៃដី ៨៨ ហិកតារ ជាប្រភេទផ្ទះវីឡា ដែលមានជាង ១៣០០ វីឡា។
គម្រោងទី៣ ឈ្មោះថា ក្រោន រៀល អ៊ីស្តេត គ្របដណ្ដប់លើផ្ទៃដីសរុប ៥៩៥ ហិកតារ រួមមានផ្ទះវីឡាប្រណីតលំដាប់ខ្ពស់ ៥ ៥៨៥ ខ្នង ផ្ទះល្វែង ១៥ ៩៥២ ល្វែង និងដីឡូតិសម្រាប់សាងសង់ផ្ទះវីឡា និងផ្ទះល្វែងជាច្រើនទំហំ។
គម្រោងលំនៅឋានទាំង៣ខាងលើនេះ ភាគច្រើនគឺសាងសង់ជិតរួចរាល់ហើយ និងត្រូវបានពួកអ្នកមានៗ និងអភិជនទិញយកអស់គ្មានសល់ ត្បិតតម្លៃផ្ទះប្រណីតខ្ពស់ផុតត្រឹម ៣សែន ៥ម៉ឺនដុល្លារ ដែលជាចំនួនមិនច្រើនប៉ុន្មានទេសម្រាប់ពួកអ្នកមានស្រុកខ្មែរ។
ជាមួយគ្នានេះ គម្រោងមួយទៀតគឺ បុរីម៉ោន ស៊ីវីយូ បូកគោ ស្ថិតក្នុងភាពមិនទាន់ច្បាស់ការណ៍នៅឡើយ។
ក្រុមហ៊ុនសុខាបានទទួលសិទ្ធអភិវឌ្ឍន៍លើកំពូលភ្នំបូកគោក្រោមរូបភាពសម្បទានរយៈពេល ៩៩ឆ្នាំ ពីរាជរដ្ឋាភិបាល នៅឆ្នាំ ២០០៨ លើផ្ទៃដី ៤១ ១៤៨ ហិកតារ នៃផ្ទៃដីឧទ្យានជាតិព្រះមុនីវង្សបូកគោសរុប ១៥៤ ៤៥៩ ហិកតារ។ យោងតាមបទបង្ហាញរបស់ឧកញ៉ា សាយ សុភ័ត្រា នាយកផ្នែកលក់ និងទីផ្សារ ក្រុមហ៊ុនសុខា អូតែល និងក្រុមហ៊ុន សុខា រៀល អ៊ីស្តេត, ផ្ទៃដីប្រមាណជាង ៩ពាន់ ទៅ១ម៉ឺនហិកតារ នឹងត្រូវប្រែក្លាយទៅជាទីក្រុងឈ្លាសវៃ ដោយគម្រោងនេះសង្កត់ធ្ងន់លើការអភិវឌ្ឍប្រកបដោយនិរន្តរភាព និងធ្វើឱ្យមានតុល្យភាពរវាងការអភិវឌ្ឍន៍ទេសចរណ៍ ជាមួយនិងការអភិរក្សបរិស្ថានធម្មជាតិ។ គម្រោងទីក្រុងឈ្លាសវៃលើភ្នំបូកគោ រួមមាន លំនៅឋាន អគារពាណិជ្ជកម្មពហុបំណង តំបន់សេដ្ឋកិច្ច ផ្សារទំនើប ហេដ្ឋារចនាសម្ព័ន្ធបច្ចេកទេស ដូចជា រោងចក្រសម្អាតទឹកកខ្វក់ និងកាកសំណល់ ទឹកស្អាត អគ្គិសនី អ៊ិនធឺណិត និងប្រព័ន្ធឌីជីថល ហេដ្ឋារចនាសម្ព័ន្ធបម្រើសេវាសាធារណៈ ដូចជាអគាររដ្ឋបាល អគារសន្ដិសុខ មន្ទីរពេទ្យ និងសាលារៀន (កម្រិតក្រោយមធ្យមសិក្សាទុតិយភូមិ) ជាដើម។
តំបន់ភ្នំបូកគោត្រូវបានរាជរដ្ឋាភិបាលបង្កើតទៅជាក្រុងបូកគោតាមរយៈអនុក្រឹត្យលេខ ៣៨ អនក្រ. បក ចុះថ្ងៃទី ១១ ខែមីនា ឆ្នាំ ២០២១ ហើយក្រុងនេះឋិតក្រោមរដ្ឋបាលខេត្តកំពត។ តំបន់ភ្នំបូកគោត្រូវបានអ្នកជំនាញកំណត់ពីសក្ដានុពលធំៗចំនួន៤ រួមមាន ទី១ ជាតំបន់ប្រវត្តិសាស្ត្រ ដែលធ្លាប់បានអភិវឌ្ឍតាំងពីជាង ១០០ឆ្នាំមុន បើនិយាយឲ្យលម្អិតគឺ ថ្ងៃទី ១៣ ខែមេសា ឆ្នាំ ១៩២២ ក្នុងរជ្ជកាលព្រះបាទស៊ីសុវត្ថិ។ ទី២ ជាតំបន់សុខាភិបាលធម្មជាតិ បានន័យថា អាកាសធាតុ បរិស្ថាន ធម្មជាតិ ជាឱសថព្យាបាលជំងឺបានរាប់សិបមុខ ហើយក៏ជាឱសថព្យាបាលសភាពផ្លូវចិត្តផងដែរ។ ទី៣ បណ្ដាញគមនាគមន៍ខ្វាត់ខ្វែងទាំង ផ្លូវគោក ផ្លូវទឹក និងផ្លូវដែក ដែលអាចដឹកនាំទេសចរមកដល់តំបន់ភ្នំបូកគោនេះបាន។ បើទោះបីជាបច្ចុប្បន្ន មានផ្លូវតែមួយខ្សែដែលអាចឲ្យទេសចរមកដល់លើកំពូលភ្នំបាន ប៉ុន្តែគម្រោងផ្លូវថ្មីកំពុងស្ថាបនា ដោយតភ្ជាប់ផ្លូវចាស់លើកំពូលភ្នំ ទៅកាន់ផ្លូវជាតិលេខ៤ មួយខ្សែទៀតមានប្រវែង ៦១ គីឡូម៉ែត្រ។ ទី៤ កំពូលភ្នំបូកគោ គឺជាបណ្ដុំទីតាំងទេសចរណ៍បែបជំនឿ សាសនា ដ៏មានប្រជាប្រិយ មិនត្រឹមតែប្រជាជនក្នុងស្រុកទេ ទីនេះក៏ទាក់ទាញទេសចរពីក្រៅប្រទេសផងដែរ៕
អត្ថបទ៖ ឈិន ធារ៉ាត់
