អគ្គនាយករដ្ឋបាលក្រសួងមហាផ្ទៃណែនាំឲ្យមន្ត្រីបម្រើការងារនៅច្រកចេញចូលតែមួយពង្រឹងសមត្ថភាពប្រើប្រាស់ប្រព័ន្ធបច្ចេកវិទ្យាឌីជីថលឲ្យបានរឹងមាំ ដើម្បីធានាបាននូវការផ្ដល់សេវាជូនប្រជាពលរដ្ឋបានឆាប់រហ័ស មានប្រសិទ្ធភាព តម្លាភាព និងគណនេយ្យភាព ស្របតាមកម្មវិធីនយោបាយរបស់រាជរដ្ឋាភិបាល។
ឯកឧត្ដម សួស ប្រថ្នា អគ្គនាយក នៃអគ្គនាយកដ្ឋានរដ្ឋបាលក្រសួងមហាផ្ទៃ តាមរយៈសន្និសីទសារព័ត៌មានដែលរៀបចំដោយអង្គភាពអ្នកនាំពាក្យក្រសួងមហាផ្ទៃ លោកបានណែនាំទៅកាន់មន្ត្រីថ្នាក់ក្រោមជាតិ ដែលបម្រើការនៅច្រកចេញចូលតែមួយថា ទន្ទឹមនឹងការកសាងសមត្ថភាពក្នុងការឈ្វេងយល់អំពីលិខិតបទដ្ឋានគតិយុត្តិ ដែលជាកិច្ចការដ៏សំខាន់ និងចាំបាច់ត្រូវប្រើជាប្រចាំ ថ្នាក់ដឹកនាំ ក៏ដូចជាមន្ត្រីទទួលបន្ទុកក្នុងការផ្ដល់សេវាក៏ត្រូវសិក្សាឈ្វេងយល់បន្ថែមទៀតទៅលើការប្រើប្រាស់កម្មវិធីព័ត៌មានវិទ្យាសម្រាប់ការគ្រប់គ្រងទិន្នន័យ និងផ្ដល់សេវាតាមប្រព័ន្ធអនឡាញ។ លោកបញ្ជាក់ថា «ប្រការនេះសំខាន់ណាស់ ព្រោះរាជរដ្ឋាភិបាលយើងបានដាក់គោលដៅ ក្នុងការកសាងរដ្ឋាភិបាលឌីជីថល ហើយ (ប្រសិនបើ) មន្ត្រីថ្នាក់ក្រោម (ជាតិ) ក៏នៅមិនទាន់យល់ដឹងបានទូលំទូលាយ ទៅលើការប្រើប្រាស់ប្រព័ន្ធឌីជីថលសម្រាប់ផ្ដល់សេវាជូនប្រជាពលរដ្ឋ ក៏មានការលំបាកដែរ។ ដូច្នេះ ខ្ញុំសូមស្នើដល់មន្ត្រីដែលទទួលបន្ទុកនៅតាមច្រកចេញចូលតែមួយ ឲ្យឈ្វេងយល់ឲ្យបានជ្រៅជ្រះពីប្រព័ន្ធឌីជីថលក្នុងការផ្ដល់សេវាជូនប្រជាពលរដ្ឋ»។
ពាក់ព័ន្ធនឹងការអភិវឌ្ឍសមត្ថភាពក្នុងការប្រើប្រាស់ប្រព័ន្ធឌីជីថលនេះ លោកបណ្ឌិតទូច សុឃៈ (សុខៈ) អ្នកនាំពាក្យរងក្រសួងមហាផ្ទៃ និងជាអ្នកសម្របសម្រួលក្នុងសន្និសីទសារព័ត៌មាននេះ បានពាំនាំនូវប្រសាសន៍របស់ឯកឧត្ដមអភិសន្តិបណ្ឌិត ស សុខា ឧបនាយរដ្ឋមន្ត្រី រដ្ឋមន្ត្រីក្រសួងមហាផ្ទៃចែកជូនសាធារណជនថា ដើម្បីឲ្យការធ្វើទំនើបកម្មប្រព័ន្ធឌីជីថលនៅក្នុងវិស័យរដ្ឋបាលសាធារណដំណើរការទៅរលូន ទាមទារឲ្យមានសម្ភារៈបច្ចេកទេសគ្រប់គ្រាន់ ទំនើប និងទាន់សម័យកាល (Up to Date & Up Grade) ជាមួយគ្នានេះ មន្ត្រី និងបុគ្គលិកក៏ត្រូវមានសមត្ថភាពគ្រប់គ្រាន់ក្នុងការប្រើប្រាស់សម្ភារៈទាំងនោះផងដែរ។
លោកបណ្ឌិតបន្ថែមថា ប្រជាពលរដ្ឋក៏ត្រូវចូលរួមឈ្វេងយល់ឲ្យបានទូលំទូលាយអំពីបច្ចេកវិទ្យាឌីជីថលនេះផងដែរ ទើបដើរទាន់ការរីកចម្រើននៃវិស័យនេះ ហើយមានភាពងាយស្រួល និងឆាប់រហ័សក្នុងការទទួលសេវានានា៕
អត្ថបទ៖ ឈិន ធារ៉ាត់