បន្ទាប់ពីថ្លែងកោតសរសើរ ពីភាពឈ្លាសវៃរបស់ស្ថាប័នអយ្យកា ដែលបំបែកសំណុំរឿងឃាតកម្មទៅជាពីរបទល្មើសផ្សេងគ្នា គឺបទឃាតកម្ម និងប៉ុនប៉ងឃាតកម្ម ដោយបន្ថែមស្ថានទោសឲ្យកាន់តែធ្ងន់ដល់ឃាតក ស្រី ស៊ីណា ដែលមានអត្តចរិតសាហាវឃោរឃៅ មិនញញើតបន្តិចសោះក្នុងការប្រហារជីវិតមនុស្ស រដ្ឋមន្ត្រីយុត្តិធម៌ ឯកឧត្ដម កើត រិទ្ធ ស្នើតុលាការកុំបញ្ចូលសំណុំរឿងទាំង២របស់ឃាតករូបនេះ ចូលគ្នាតែមួយ, មួយទៀត គឺកុំអនុវត្តវិធានស្រូបទោស បានន័យថា បទល្មើសដែលមានស្ថានទោសដូចគ្នា ប្រព្រឹត្តក្នុងពេលវេលា និងទីកន្លែងតែមួយ (ករណីតែមួយ) ត្រូវបញ្ចូលទៅឲ្យជាប់ទោសដែលមានស្ថានធ្ងន់ជាង។ ហើយជាមួយគ្នានេះ លោកនឹងស្នើបញ្ចូលឈ្មោះឃាតកនេះទៅក្នុងបញ្ជីឧក្រិដ្ឋជនសាហាវៗ ដោយមិនអាចឲ្យស្នើសុំបន្ធូរបន្ថយទោស និងលើកលែងទោសបានជាដាច់ខាតបន្ទាប់ពីតុលាការសម្រេចផ្ដន្ទាទោសជាស្ថាពរ។
ទាំងអស់នេះជាការលើកឡើងរបស់ ឯកឧត្ដម កើត រិទ្ធ រដ្ឋមន្ត្រីយុត្តិធម៌ នៅក្នុងសន្និសីទសារព័ត៌មាន នាទីស្ដីការក្រសួងយុត្តិធម៌ នៅថ្ងៃទី ២៦ ខែមិថុនា ឆ្នាំ ២០២៤ នេះ។
យោងតាមសេចក្ដីប្រកាសព័ត៌មានរបស់សាលាដំបូងរាជធានីភ្នំពេញបានបញ្ជាក់ថា ផ្អែកតាមអង្គហេតុ និងភស្តុតាងដែលជាលទ្ធផល នៃការស្រាវជ្រាវ ស៊ើបអង្កេតរបស់មន្ត្រីនគរបាលយុត្តិធម៌ និងអយ្យការ និងពិនិត្យឃើញព្យសនកម្មទៅលើជនរងគ្រោះ ស្លាប់ពីរនាក់ និងរបួសពីរនាក់ តំណាងអយ្យការ បានចោទប្រកាន់ករណីនេះជា ២ សំណុំរឿងដោយ៖
- សំណុំរឿងទី១ (ជនរងគ្រោះស្លាប់ពីរនាក់) បានធ្វើការចោទប្រកាន់ឈ្មោះ ស្រី ស៊ីណា ពីបទ “ឃាតកម្ម និងប្រើប្រាស់អាវុធដោយគ្មានការអនុញ្ញាត” ដែលទណ្ឌកម្មក្នុងសំណុំរឿងនេះ ជនត្រូវចោទប្រឈមនឹងការផ្ដន្ទាទោស រហូតដល់ ១៥ (ដប់ប្រាំ) ឆ្នាំ។
- សំណុំរឿងទី ២ (ជនរងគ្រោះរបួសពីរនាក់) បានធ្វើការចោទប្រកាន់ឈ្មោះ ស្រី ស៊ីណា ពីបទ “ប៉ុនប៉ងឃាតកម្ម និងប្រើប្រាស់អាវុធដោយគ្មានការអនុញ្ញាត” ដែលទណ្ឌកម្មក្នុងសំណុំរឿងនេះ ជនត្រូវចោទប្រឈមនឹងការផ្ដន្ទាទោស រហូតដល់ ១៥ (ដប់ប្រាំ) ឆ្នាំ។
ក្រោយពីទទួលបានសំណុំរឿងខាងលើ ចៅក្រមស៊ើបសួរ បានសម្រេចឃុំខ្លួនជាបណ្ដោះអាសន្នលើជនត្រូវចោទឈ្មោះ ស្រី ស៊ីណា តាមនីតិវិធីច្បាប់ជាធរមាន។
តាមការពន្យល់របស់រដ្ឋមន្ត្រីយុត្តិធម៌ ប្រសិនបើសំណុំរឿងនេះត្រូវបានបំបែកជាពីរ គឺបានន័យថា តុលាការនឹងជំនុំជម្រះលើសំណុំរឿងទីមួយ ដោយចេញសាលក្រមផ្ដន្ទាទោសរួចហើយ និងបន្តជំនុំជម្រះលើសំណុំរឿងទីពីរ ដោយចេញសេចក្ដីសម្រេចផ្ដន្ទាទោសមួយទៀត។ ដូច្នេះឃាតកអាចនឹងជាប់ទោស១៥ឆ្នាំ២ដង (ស្មើ៣០ឆ្នាំ)។
សូមរំឭកថា កាលពីថ្ងៃ១៧ ខែមិថុនា ឆ្នាំ២០២៤ ដោយសារជម្លោះព្រំដីក្នុងបុរីប៉េងហួតបឹងស្នោ ក្នុងខណ្ឌច្បារអំពៅ ឃាតកឈ្មោះ ស្រី ស៊ីណា ដែលកាលនោះមានងារជាឧកញ៉ាផង បានប្រើកាំភ្លើងខ្លីបាញ់ទៅលើមនុស្ស៤នាក់ បណ្ដាលឲ្យជនរងគ្រោះ២នាក់ ដែលជាគូរដណ្ដឹងបាត់បង់ជីវិត និង២នាក់ទៀតរងរបួសដើមដៃ និងភ្លៅ។ តាមរយៈវីដេអូចេញពីកាមេរ៉ាសុវត្ថិភាព បង្ហាញឲ្យឃើញពីសកម្មភាពដ៏ព្រៃផ្សៃរបស់ឃាតក ដែលផ្ដាច់ជីវិតមនុស្សគ្មានញញើតដៃសោះឡើយ គឺបាញ់ម្នាក់ដួលហើយ បាញ់ម្នាក់ទៀតជាច្រើនគ្រាប់ ហើយបន្តទៅរកម្នាក់ជាពីរនាក់ទៀត ដើម្បីសម្លាប់ទាំងអស់តែម្ដង។ សកម្មភាពនេះត្រូវបានមហាជនចងកំហឹង និងថ្កោលទោសឃាតកយ៉ាងខ្លាំង។
អត្ថបទ៖ ឈិន ធារ៉ាត់
