ក្រសួងការបរទេស និងរដ្ឋាភិបាលឥណ្ឌា បានប្រតិកម្មចំពោះទង្វើមិនគោរពរបស់ភាគីថៃ ដែលបានបំផ្លាញរូបបដិមាព្រះនារាយណ៍ ជាអាទិទេពដ៏ពិសិដ្ឋមួយអង្គក្នុងជំនឿព្រហ្មញ្ញសាសនា។
ក្នុងសេចក្ដីថ្លែងការណ៍នោះ បានលើកឡើងថា «យើងបានឃើញរបាយការណ៍អំពីការប្រើគ្រឿងចក្រធុនធ្ងន់បំផ្លាញរូបសំណាកអាទិទេពសាសនាហិណ្ឌូមួយអង្គ ដែលត្រូវបានសាងសង់នាពេលថ្មីៗនេះ និងមានទីតាំងនៅក្នុងតំបន់ដែលរងផលប៉ះពាល់ដោយជម្លោះព្រំដែនថៃ-កម្ពុជា»។
ព្រះអាទិទេពហិណ្ឌូ និងព្រះពុទ្ធសាសនា ត្រូវបានគោរពបូជាយ៉ាងជ្រាលជ្រៅដោយប្រជាជនទូទាំងតំបន់ ដែលជាផ្នែកមួយនៃបេតិកភណ្ឌអរិយធម៌រួមរបស់យើង។
បើទោះបីជាភាគីថៃ អះអាងថាខ្លួនការពារទឹកដី ជាលេសបិទបាំងការឈ្លានពានកម្ពុជា តែទង្វើមិនគោរពច្បាប់អន្តរជាតិបែបនេះបានធ្វើឱ្យប៉ះពាល់ដល់អារម្មណ៍ប្រជាជន និងក្រុមអង្កេតការណ៍អន្តរជាតិ ដែលបញ្ហានេះមិនគួរឱ្យកើតមានឡើយ។
យ៉ាងណាម៉ិញ រដ្ឋាភិបាលឥណ្ឌា នៅតែជំរុញឱ្យភាគីទាំង២ ចូលតុចរចាស្វែងរកសន្ដិភាពឡើងវិញ៕
