យោងតាមការស្រាយបំភ្លឺរបស់ការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តព្រះសីហនុ នៅថ្ងៃទី ៣ ខែកុម្ភៈ ឆ្នាំ ២០២៦ នេះ បានឱ្យដឹងថា កម្លាំងសមត្ថកិច្ចបានធ្វើការច្រានចោលទាំងស្រុងនូវព័ត៌មានដែលបានចែកចាយតាមបណ្តាញសង្គម ពាក់ព័ន្ធនឹងការចោទប្រកាន់ថាមានការផាកពិន័យជាប្រាក់ចំនួន ២ លានរៀលដោយមិនចេញវិក្កយបត្រ។ ការចេញសេចក្ដីបំភ្លឺនេះ ធ្វើឡើងបន្ទាប់ពីមានការបង្ហោះវីដេអូ និងការរិះគន់ពីសំណាក់ម្ចាស់គណនីហ្វេសប៊ុកមួយចំនួន ជុំវិញសកម្មភាពត្រួតពិនិត្យជាតិអាល់កុលនៅតាមដងផ្លូវសាធារណៈ។
តាមរបាយការណ៍របស់សមត្ថកិច្ចបានបញ្ជាក់ថា កាលពីយប់ថ្ងៃទី ២ ខែកុម្ភៈ ឆ្នាំ ២០២៦ កម្លាំងជំនាញបានដាក់គោលដៅត្រួតពិនិត្យជាតិអាល់កុលនៅលើផ្លូវ ២៨ មិថុនា ក្នុងសង្កាត់លេខ ៣ ក្រុងព្រះសីហនុ ដើម្បីកាត់បន្ថយគ្រោះថ្នាក់ចរាចរណ៍ និងរក្សាសុវត្ថិភាពជូនប្រជាពលរដ្ឋ។ ក្នុងប្រតិបត្តិការនោះ សមត្ថកិច្ចបានឃាត់ត្រួតពិនិត្យរថយន្តស៊េរីទំនើបមួយគ្រឿងម៉ាក ALPHARD ពណ៌ខ្មៅ ពាក់ស្លាកលេខ ភ្នំពេញ 2BW-6130 ដែលបើកបរដោយបុរសជនជាតិចិនម្នាក់។ ជាលទ្ធផលនៃការពិនិត្យ បុរសរូបនោះមានកម្រិតជាតិអាល់កុលរហូតដល់ 0,68 មីលីក្រាមក្នុងមួយលីត្រខ្យល់ ដែលជាកម្រិតស្រវឹងជោគជាំ និងលើសពីច្បាប់កំណត់។
ក្នុងខណៈពេលដែលសមត្ថកិច្ចកំពុងអនុវត្តការងារ និងឃាត់ខ្លួនអ្នកបើកបរទុកជាបណ្តោះអាសន្នដើម្បីរង់ចាំស្វាងស្រា ស្រាប់តែមានស្ត្រីពីរនាក់បានបង្ហាញខ្លួននៅកន្លែងកើតហេតុ រួចធ្វើការថតវីដេអូឡូឡា និងប្រើប្រាស់ពាក្យសម្តីជេរប្រមាថមើលងាយមកលើកងកម្លាំងសមត្ថកិច្ចក្នុងបំណងចង់រំដោះជនជាតិចិនរូបនោះ។ សមត្ថកិច្ចបានកត់សម្គាល់ថា ស្ត្រីទាំងនោះហាក់ស្ថិតក្នុងស្ថានភាពស្រវឹងដូចគ្នា និងបានព្យាយាមរំខានដល់កិច្ចការងាររបស់មន្ត្រីអនុវត្តច្បាប់ ដោយថែមទាំងបានជំរុញឱ្យសមត្ថកិច្ចយកប្រាក់ប៉ុន្មានក៏បានដែរ ប៉ុន្តែត្រូវបានមន្ត្រីចរាចរណ៍បដិសេធមិនទទួលយកជាដាច់ខាត។
ដោយឡែក ចំពោះការចុះផ្សាយរបស់គណនីបណ្តាញសង្គមឈ្មោះ “ប្លែកៗចាប់អារម្មណ៍” ដែលបានលើកឡើងថា មានការទារប្រាក់ ២ លានរៀលដោយគ្មានវិក្កយបត្រ និងការប៉ះទង្គិចពាក្យសម្តីរវាងស្ត្រីឈ្មោះ Srey Pov ជាមួយសមត្ថកិច្ចនោះ ស្នងការដ្ឋាននគរបាលខេត្តព្រះសីហនុបានប្រកាសច្រានចោល និងចាត់ទុកថាជាការបំភ្លៃការពិត។ ក្នុងនោះ ស្នងការដ្ឋានក៏បានអញ្ជើញម្ចាស់គណនីខាងលើឱ្យចូលមកបំភ្លឺផ្ទាល់នៅស្នងការដ្ឋាន ប្រសិនបើមានករណីបែបនេះកើតឡើងពិតប្រាកដមែន ដើម្បីស្វែងរកយុត្តិធម៌ និងតម្លាភាព។
យោងតាមច្បាប់ស្តីពីចរាចរណ៍ផ្លូវគោកនៃព្រះរាជាណាចក្រកម្ពុជា និងបទប្បញ្ញត្តិពាក់ព័ន្ធនឹងការបើកបរក្នុងស្ថានភាពស្រវឹងមានដូចខាងក្រោម៖
មាត្រា ៤៣ នៃច្បាប់ចរាចរណ៍ផ្លូវគោក បានហាមឃាត់ដាច់ខាតចំពោះអ្នកបើកបរយានយន្តដែលមានអត្រាជាតិអាល់កុលចាប់ពី 0,25 មីលីក្រាមក្នុងមួយលីត្រខ្យល់ ឬចាប់ពី 0,5 ក្រាមក្នុងមួយលីត្រឈាមឡើងទៅ។
ផ្អែកតាមអនុក្រឹត្យលេខ ៣៩ អនក្រ.បក ការផាកពិន័យត្រូវបានបែងចែកជា ២ កម្រិត៖
- កម្រិតស្រាល (ជាតិអាល់កុល 0,25 ដល់ 0,39 មីលីក្រាម/លីត្រខ្យល់)៖ ត្រូវពិន័យជាប្រាក់ ២៥០ ០០០ រៀល សម្រាប់ម៉ូតូ, ៤០០ ០០០ រៀល សម្រាប់រថយន្តធុនស្រាល និង ៨០០ ០០០ រៀល សម្រាប់រថយន្តធុនធ្ងន់។
- កម្រិតធ្ងន់ (ជាតិអាល់កុលចាប់ពី 0,40 មីលីក្រាម/លីត្រខ្យល់ឡើងទៅ)៖ នេះជាបទល្មើសព្រហ្មទណ្ឌ (មាត្រា ៨០) ដែលត្រូវប្រឈមនឹងការផ្តន្ទាទោសដាក់ពន្ធនាគារពី ៦ ថ្ងៃ ទៅ ៦ ខែ និងពិន័យជាប្រាក់ពី ៨០០ ០០០ រៀល ទៅ ៤ ០០០ ០០០ រៀល។ ចំពោះការផាកពិន័យអន្តរកាលជាក់ស្តែងតាមអនុក្រឹត្យ គឺត្រូវពិន័យ ១ ០០០ ០០០ រៀល សម្រាប់ម៉ូតូ, ២ ០០០ ០០០ រៀល សម្រាប់រថយន្តធុនស្រាល និង ៤ ០០០ ០០០ រៀល សម្រាប់រថយន្តធុនធ្ងន់។
ដូចនេះ ករណីជនជាតិចិនដែលសមត្ថកិច្ចឃាត់ខ្លួនខាងលើដែលមានជាតិអាល់កុលរហូតដល់ 0,68 មីលីក្រាមក្នុងមួយលីត្រខ្យល់ គឺស្ថិតក្នុងកម្រិតធ្ងន់ ដែលត្រូវរងការផាកពិន័យចំនួន ២ ០០០ ០០០ រៀល (សម្រាប់រថយន្តធុនស្រាល) និងត្រូវកសាងសំណុំរឿងបញ្ជូនទៅតុលាការតាមនីតិវិធីច្បាប់៕
