ផ្អែកតាមរបាយការណ៍ផ្លូវការរបស់ក្រុមប្រឹក្សាអភិវឌ្ឍន៍កម្ពុជា (CDC) ដែលបានចេញផ្សាយនាពេលថ្មីៗនេះ បានបង្ហាញឱ្យឃើញពីសញ្ញាណវិជ្ជមាននៃលំហូរទុនវិនិយោគនៅក្នុងប្រទេសកម្ពុជា សម្រាប់ដើមឆ្នាំ២០២៦។ ក្នុងអំឡុងខែមករា ឆ្នាំ២០២៦ គណៈកម្មាធិការវិនិយោគកម្ពុជាបានសម្រេចអនុម័តចុះបញ្ជីគម្រោងវិនិយោគសរុបចំនួន ៤៣ គម្រោង ដែលមានទុនវិនិយោគសរុបប្រមាណ ៧៥២ លានដុល្លារអាមេរិក និងរំពឹងថានឹងអាចបង្កើតការងារបានប្រមាណ ២ម៉ឺន ៣ពាន់កន្លែងជូនដល់ប្រជាពលរដ្ឋ។
បើយើងពិនិត្យមើលទៅលើសមាសភាពនៃគម្រោងវិនិយោគទាំងនោះ គេសង្កេតឃើញថាមានការបែងចែកជាពីរផ្នែកធំៗ គឺគម្រោងដែលស្ថិតនៅក្រៅតំបន់សេដ្ឋកិច្ចពិសេសមានចំនួន ៣៥ គម្រោង និងគម្រោងដែលស្ថិតក្នុងតំបន់សេដ្ឋកិច្ចពិសេសមានចំនួន ៨ គម្រោង។ ក្នុងចំណោមនោះ គម្រោងដែលមានភាពលេចធ្លោជាងគេក្នុងខែមករានេះ រួមមានគម្រោងអភិវឌ្ឍន៍ស្ថានីយផលិតអគ្គិសនីដើរដោយថាមពលខ្យល់ អានុភាព ១៥០ មេហ្គាវ៉ាត់ ស្ថិតក្នុងក្រុងសែនមនោរម្យ ខេត្តមណ្ឌលគីរី ដែលមានទុនវិនិយោគរហូតដល់ ២០០ លានដុល្លារអាមេរិក។ ក្រៅពីនេះ ក៏មានគម្រោងបង្កើតរោងចក្រផលិតក្រណាត់គ្រប់ប្រភេទនៅខេត្តកណ្តាល គម្រោងផលិតកម្មដែកនៅខេត្តកំពង់ស្ពឺ និងគម្រោងផលិតគ្រឿងកំប៉ុងនៅខេត្តកែបជាដើម។
ដោយឡែក ចំពោះការវិនិយោគនៅក្នុងតំបន់សេដ្ឋកិច្ចពិសេសវិញ គេឃើញមានគម្រោងបង្កើតតំបន់សេដ្ឋកិច្ចពិសេស កំពត ហ្វូជាន ក្នុងស្រុកដងទង់ ខេត្តកំពត ដែលមានទុនវិនិយោគប្រមាណ ១២០ លានដុល្លារអាមេរិក និងគម្រោងតំបន់សេដ្ឋកិច្ចពិសេស ខេភី យ៉ញ ក្នុងក្រុងបូកគោ ខេត្តកំពត ដូចគ្នា។ បន្ថែមពីនេះ ក៏មានការបង្កើតតំបន់សេដ្ឋកិច្ចពិសេស ភ្នំពេញ ឡូជីស្ទីក អេន អ៊ិនដាសស្ទ្រៀល ខមផ្លេកស៍ ស្ថិតក្នុងក្រុងច្បារមន ខេត្តកំពង់ស្ពឺ ក្នុងទុនវិនិយោគប្រមាណ ៧៥ លានដុល្លារអាមេរិក។
ចំពោះប្រភពទុនវិនិយោគវិញ ប្រទេសចិននៅតែបន្តឈរនៅលំដាប់ថ្នាក់លេខ១ ដែលមានចំណែកវិនិយោគរហូតដល់ ៣៥,៩០% នៃទុនវិនិយោគសរុប។ បន្ទាប់មកគឺប្រទេសម៉ាឡេស៊ីដែលមានចំណែក ២៦,៥៩% ខណៈដែលការវិនិយោគក្នុងស្រុកពីសំណាក់អ្នកវិនិយោគកម្ពុជាមានចំណែក ២១,៥៧%។ ប្រភពទុនផ្សេងទៀតបានមកពីប្រទេសសិង្ហបុរី កោះ British Virgin សីស្ហែល កាណាដា ជប៉ុន និងសហរដ្ឋអាមេរិក។ បើពិនិត្យលើទីតាំងភូមិសាស្ត្រ ខេត្តកំពង់ស្ពឺគឺជាខេត្តដែលទទួលបានគម្រោងវិនិយោគច្រើនជាងគេបង្អស់រហូតដល់ ១៣ គម្រោង តាមពីក្រោយដោយខេត្តកណ្តាលដែលមាន ១០ គម្រោង ខណៈខេត្តផ្សេងៗទៀតដូចជា កំពត តាកែវ និងភ្នំពេញ ក៏ទទួលបានគម្រោងវិនិយោគជាបន្តបន្ទាប់ផងដែរ៕
