កិច្ចសហប្រតិបត្តិការរវាងកម្ពុជា និងសហរដ្ឋអាមេរិក ក្នុងការប្រយុទ្ធប្រឆាំងបទល្មើសគ្រឿងញៀនឆ្លងដែន និងឧក្រិដ្ឋកម្មរៀបចំជាប្រព័ន្ធ កំពុងបង្ហាញលទ្ធផលជាក់ស្តែង តាមរយៈការពង្រឹងការចែករំលែកព័ត៌មានស៊ើបការណ៍ ការសម្របសម្រួលប្រតិបត្តិការ និងការរួមគ្នាបង្ក្រាបបណ្តាញឧក្រិដ្ឋកម្មដែលមានទំនាក់ទំនងអន្តរជាតិ។
នេះជាខ្លឹមសាររបស់ស្ថានទូតអាមេរិកប្រចាំកម្ពុជាបង្ហោះលើបណ្ដាញសង្គមហ្វេសបុកថ្ងៃទី២០ សីហា ២០២៦
តាមរយៈកិច្ចសហការរវាង រដ្ឋបាលអនុវត្តច្បាប់ប្រឆាំងគ្រឿងញៀនសហរដ្ឋអាមេរិក (DEA) និង នគរបាលប្រឆាំងគ្រឿងញៀនកម្ពុជា (ADP) ប្រតិបត្តិការជាបន្តបន្ទាប់បានឈានទៅដល់ការចាប់ខ្លួនជនបរទេសពាក់ព័ន្ធជាច្រើននាក់ ការរឹបអូសទ្រព្យសម្បត្តិ មន្ទីរពិសោធន៍ផលិតគ្រឿងញៀន ទីតាំងស្តុក និងសារធាតុគីមីដើមសម្រាប់ផលិតគ្រឿងញៀនជាង ១តោន ព្រមទាំងគ្រឿងញៀនខុសច្បាប់ជាង ២០០គីឡូក្រាម។
លទ្ធផលទាំងនេះ ឆ្លុះបញ្ចាំងពីការដឹកនាំរបស់ រាជរដ្ឋាភិបាលកម្ពុជា ដែលមាន សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី ព្រមទាំងការណែនាំ និងចង្អុលបង្ហាញយ៉ាងយកចិត្តទុកដាក់ពី ឯកឧត្តម អភិសន្ដិបណ្ឌិត ស សុខា ឧបនាយករដ្ឋមន្ត្រី និងការដឹកនាំរបស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ដែលត្រូវបានអនុវត្តដោយផ្ទាល់ពី ឯកឧត្តម ឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀន ក្នុងការពង្រឹងកិច្ចសហប្រតិបត្តិការ និងបង្ក្រាបបទល្មើសគ្រឿងញៀនឆ្លងដែន។
ចំណុចសំខាន់មួយទៀតនៃកិច្ចសហប្រតិបត្តិការនេះ គឺការសហការរវាងការិយាល័យ DEA ប្រចាំរាជធានីភ្នំពេញ និងការិយាល័យ DEA នៅរដ្ឋ New Jersey ដែលបានជួយកំណត់អត្តសញ្ញាណបណ្តាញក្នុងស្រុកមួយ ដែលពាក់ព័ន្ធនឹងការលាងលុយតាមរយៈ រូបិយប័ណ្ណគ្រីបតូ (Cryptocurrency) ក្នុងនាមឱ្យក្រុមឧក្រិដ្ឋកម្មអន្តរជាតិ Sinaloa Cartel។
ការស៊ើបអង្កេតនេះ មិនត្រឹមតែផ្តោតលើអ្នកពាក់ព័ន្ធនៅក្នុងប្រទេសកម្ពុជាប៉ុណ្ណោះទេ ប៉ុន្តែថែមទាំងបានពង្រីកទៅកាន់បណ្តាញឧក្រិដ្ឋកម្ម និងអ្នកនៅពីក្រោយប្រតិបត្តិការដែលមានទំនាក់ទំនងនៅក្រៅប្រទេស រួមទាំងម៉ិកស៊ិកផងដែរ។
ប្រតិបត្តិការធំ រឹបអូសសារធាតុញៀនជាង ១តោន នៅព្រះសីហនុ។ ក្នុងប្រតិបត្តិការដ៏ធំមួយកាលពី ខែកក្កដា ឆ្នាំ២០២៦ នៅខេត្តព្រះសីហនុ មន្ទីរប្រឆាំងបទល្មើសគ្រឿងញៀនកម្ពុជា ដោយផ្អែកលើព័ត៌មានស៊ើបការណ៍ពីភាគីអាមេរិក បានចុះបង្ក្រាបទីតាំងពាក់ព័ន្ធនៅលើកោះមួយ និងរឹបអូសបានសារធាតុញៀនមានទម្ងន់សរុបជាង ១តោន ១៩៨គីឡូក្រាម។ នេះបើយោងតាមទិន្នន័យបន្ថែមពីមន្ទីរប្រឆាំង គ្រឿងញៀន។
ប្រតិបត្តិការនេះត្រូវបានចាត់ទុកថា ជាផ្នែកមួយនៃកិច្ចខិតខំប្រឹងប្រែងរួមគ្នា ដើម្បីកាត់ផ្តាច់ខ្សែសង្វាក់នៃការផលិត ស្តុក ដឹកជញ្ជូន និងចែកចាយគ្រឿងញៀនឆ្លងដែន មុនពេលសារធាតុញៀនទាំងនោះអាចបន្តចរាចរទៅកាន់ទីផ្សារផ្សេងៗ។
កម្ពុជាបន្តបើកទូលាយចំពោះកិច្ចសហប្រតិបត្តិការអន្តរជាតិ។ លោក ទូច សុឃៈ (សុខៈ) អ្នកនាំពាក្យរងក្រសួងមហាផ្ទៃ បានគូសបញ្ជាក់ថា “យើងមើលឃើញថា កិច្ចសហប្រតិបត្តិការនេះ គឺកើតចេញជាវិជ្ជមានពីនយោបាយចាស់រវាងកម្ពុជា និងសហរដ្ឋអាមេរិក ពោលគឺ យើងបានធ្វើការងារជាមួយគ្នាជាច្រើនទសវត្សរ៍មកហើយ ទៅលើការប្រយុទ្ធប្រឆាំងនឹងបទល្មើសឆ្លងដែន ជាពិសេសគឺបញ្ហាគ្រឿងញៀននេះតែម្តង។ គ្រាន់តែមកដល់ពេលនេះ គឺយើងចាប់ផ្តើមពង្រីក បង្កើននូវសកម្មភាពថ្មីៗជាច្រើនទៀត ដើម្បីដើរឱ្យទាន់នូវការវិវត្តនៃបទល្មើសសកល ឬក៏បទល្មើសឆ្លងដែន ជាពិសេសគឺបញ្ហាគ្រឿងញៀននេះតែម្តង។ អញ្ចឹងទេ កិច្ចសហប្រតិបត្តិការនេះ វាមានន័យថាជាការទទួលស្គាល់ជារួមថា បញ្ហាគ្រឿងញៀនគឺជារឿងប្រឈមរបស់ពិភពលោកទាំងមូល ហើយទទួលស្គាល់ព្រមគ្នានឹងគ្នាថា យើងត្រូវតែរួមដៃគ្នារវាងរដ្ឋ និងរដ្ឋ ទាំងកម្រិតទ្វេភាគី ទាំងកម្រិតតំបន់ និងពិភពលោកទាំងមូល ទើបការប្រយុទ្ធប្រឆាំងនឹងបទល្មើសគ្រឿងញៀននេះ វាកាន់តែមានប្រសិទ្ធភាពខ្ពស់”។
លោក ទូច សុឃៈ អ្នកនាំពាក្យរងក្រសួងមហាផ្ទៃ បានបន្ថែមថា កម្ពុជាតែងតែបើកទូលាយក្នុងការធ្វើកិច្ចសហប្រតិបត្តិការអន្តរជាតិ ដោយសារកម្ពុជាចាត់ទុកបញ្ហាគ្រឿងញៀន និងបទល្មើសឆ្លងដែន គឺជាផលប៉ះពាល់អាក្រក់បំផុតចំពោះមនុស្សជាតិទូទៅនៅលើពិភពលោក ដោយមិនមែនជាគ្រោះថ្នាក់សម្រាប់តែកម្ពុជា ឬរដ្ឋណាមួយផ្សេងទៀតនោះឡើយ។
លោកបានបន្តថា បច្ចុប្បន្ន កម្ពុជាបាននិងកំពុងសហការយ៉ាងជិតស្និទ្ធជាមួយការិយាល័យស៊ើបអង្កេតប្រព័ន្ធផ្សព្វផ្សាយសហព័ន្ធ (FBI) របស់សហរដ្ឋអាមេរិក លើការងារជំនាញ ព័ត៌មាន និងផ្លូវច្បាប់ ដោយឈរលើគោលការណ៍គោរពអធិបតេយ្យភាពនៃរដ្ឋ។ ជាមួយគ្នានេះ កម្ពុជានឹងបន្តធ្វើការ និងពង្រីកកិច្ចសហប្រតិបត្តិការនេះជាបន្តបន្ទាប់ជាមួយបណ្តារដ្ឋផ្សេងៗទៀតផងដែរ។
ជាមួយគ្នានេះ លោកវរសេនីយ៍ឯក ម៉ាក់ សេរីវឌ្ឍនៈ នាយករងមន្ទីរប្រឆាំងបទល្មើសគ្រឿងញៀន ទទួលដឹកនាំ ការិយាល័យ ប្រឆាំងបទល្មើសគ្រឿងញៀន ឆ្លងដែនបានចូលរួមបកស្រាយ និងចែករំលែកព័ត៌មានពាក់ព័ន្ធនឹងប្រតិបត្តិការទាំងនេះ ក្នុងកិច្ចប្រជុំសន្និបាតកំពូល IDEC (International Drug Enforcement Conference) នៅប្រទេសអាហ្សង់ទីន ដែលបង្ហាញពីការចូលរួមយ៉ាងសកម្មរបស់កម្ពុជាក្នុងកិច្ចប្រឹងប្រែងអន្តរជាតិប្រឆាំងបទល្មើសគ្រឿងញៀន។
យោងតាមព័ត៌មានដែលស្ថានទូតសហរដ្ឋអាមេរិកប្រចាំរាជធានីភ្នំពេញបានផ្សព្វផ្សាយនៅថ្ងៃទី ២០ ខែសីហា ឆ្នាំ២០២៦ ការពង្រឹងការចែករំលែកព័ត៌មានស៊ើបការណ៍ និងការសម្របសម្រួលប្រតិបត្តិការរវាងសមត្ថកិច្ចអាមេរិក និងកម្ពុជា កំពុងដើរតួនាទីសំខាន់ក្នុងការប្រយុទ្ធប្រឆាំងនឹងការជួញដូរគ្រឿងញៀនឆ្លងដែន និងឧក្រិដ្ឋកម្មរៀបចំជាប្រព័ន្ធ។
ប្រភពដដែលបានឱ្យដឹងថា តាមរយៈគំនិតផ្តួចផ្តើមរួមគ្នានាពេលថ្មីៗនេះ DEA និង ADP បានជំរុញឱ្យមានការចាប់ខ្លួនជនបរទេសពាក់ព័ន្ធនឹងប្រតិបត្តិការជាច្រើននាក់ ព្រមទាំងការរឹបអូសទ្រព្យសម្បត្តិ មន្ទីរពិសោធន៍ផលិតគ្រឿងញៀន ទីតាំងស្តុក សារធាតុគីមីដើមសម្រាប់ផលិតគ្រឿងញៀនច្រើនជាង ១តោន និងគ្រឿងញៀនខុសច្បាប់ជាង ២០០គីឡូក្រាម។
កិច្ចខិតខំប្រឹងប្រែងដែលពាក់ព័ន្ធនឹងការិយាល័យ DEA នៅរាជធានីភ្នំពេញ និងរដ្ឋ New Jersey ក៏បានជួយរកឃើញបណ្តាញក្នុងស្រុកដែលពាក់ព័ន្ធនឹងការលាងលុយតាមរូបិយប័ណ្ណគ្រីបតូ ក្នុងនាមឱ្យក្រុម Sinaloa Cartel។
ប្រតិបត្តិការទាំងនេះបង្ហាញឱ្យឃើញកាន់តែច្បាស់ពីសារៈសំខាន់នៃកិច្ចសហប្រតិបត្តិការអន្តរជាតិ ក្នុងការរុះរើបណ្តាញឧក្រិដ្ឋកម្មសកល កាត់ផ្តាច់ខ្សែសង្វាក់ជួញដូរគ្រឿងញៀន និងការពារសុវត្ថិភាពប្រជាពលរដ្ឋនៃប្រទេសពាក់ព័ន្ធ។
សម្រាប់កម្ពុជា កិច្ចសហប្រតិបត្តិការជាមួយសហរដ្ឋអាមេរិក និងដៃគូអន្តរជាតិផ្សេងទៀត កំពុងក្លាយជាយន្តការដ៏សំខាន់ក្នុងការបង្កើនសមត្ថភាពប្រយុទ្ធប្រឆាំងបទល្មើសគ្រឿងញៀនឆ្លងដែន និងឧក្រិដ្ឋកម្មរៀបចំជាប្រព័ន្ធ ដែលកាន់តែមានភាពស្មុគស្មាញ និងគ្មានព្រំដែនភូមិសាស្ត្រ៕