ក្រុមប្រឹក្សាជាតិប្រាក់ឈ្នួលអប្បបរមា បានសម្រេចអនុម័តជ្រើសរើសតួលេខប្រាក់ឈ្នួលអប្បបរមាចំនួន ២១០ ដុល្លារអាមេរិកក្នុងមួយខែ ខណៈប្រមុខរាជរដ្ឋាភិបាលកម្ពុជា សម្តេចមហាបវរធិបតី ហ៊ុន ម៉ាណែត បានសម្រេចបន្ថែមថវិកាចំនួន ២ ដុល្លារអាមេរិកទៀត ដែលធ្វើឱ្យប្រាក់ឈ្នួលអប្បបរមារបស់កម្មករនិយោជិតក្នុងវិស័យកាត់ដេរ ស្បែកជើង និងផលិតផលធ្វើដំណើរសម្រាប់ឆ្នាំ២០២៧ កើនឡើងដល់ ២១២ ដុល្លារអាមេរិកក្នុងមួយខែ។
ការសម្រេចនេះបានធ្វើឡើងនៅក្នុងកិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមា អាណត្តិទី៤ កាលពីថ្ងៃទី៣០ ខែកញ្ញា ឆ្នាំ២០២៦ ដោយលទ្ធផលនៃការបោះឆ្នោតជាសម្ងាត់បានបង្ហាញថា តួលេខ ២១០ ដុល្លារអាមេរិកទទួលបានសំឡេងគាំទ្ររហូតដល់ ៤៧ លើ ៥១ សំឡេង។ បន្ថែមលើតួលេខដើមនេះ សម្តេចធិបតីនាយករដ្ឋមន្ត្រីបានសម្រេចបន្ថែម ២ ដុល្លារអាមេរិក ព្រមទាំងបានឯកភាពកាត់បន្ថយ «ប្រាក់ឧបត្ថម្ភការហាត់រៀនធ្វើដំណើរ និងថ្លៃស្នាក់នៅ» ចំនួន ២.៥ ដុល្លារអាមេរិកបន្ថែមទៀត ដោយអនុវត្តបន្តនៅឆ្នាំ២០២៧។ ការអន្តរាគមន៍នេះនឹងធ្វើឱ្យកម្មករនិយោជិតទទួលបានការកើនឡើងប្រាក់ឈ្នួលគោលសរុបចំនួន ៤.៥ ដុល្លារអាមេរិកក្នុងមួយខែ។
នៅពេលបូកបញ្ចូលជាមួយអត្ថប្រយោជន៍ផ្សេងៗដែលមានស្រាប់ ដូចជាប្រាក់រង្វាន់ធ្វើការទៀងទាត់ ១០ ដុល្លារ សោហ៊ុយធ្វើដំណើរនិងថ្លៃស្នាក់នៅ ៧ ដុល្លារ ប្រាក់រង្វាន់អតីតភាពការងារពី ២ ដល់ ១១ ដុល្លារ និងប្រាក់ថ្លៃបាយធ្វើការបន្ថែមម៉ោង កម្មករនិយោជិតម្នាក់ៗនឹងទទួលបានប្រាក់ឈ្នួលពិតប្រាកដជាមធ្យមចន្លោះពី ២៣១.៥ ដុល្លារ ដល់ ២៤២.៥ ដុល្លារអាមេរិកក្នុងមួយខែ សម្រាប់ឆ្នាំ២០២៧។ ជាមួយគ្នានេះ ភាគីតំណាងកម្មករ និងភាគីនិយោជក ក៏បានដាក់ចេញនូវសំណូមពរជាច្រើនទៅកាន់រាជរដ្ឋាភិបាល ដើម្បីជួយសម្រួលដល់បន្ទុកចំណាយប្រចាំថ្ងៃរបស់កម្មករ ព្រមទាំងជំរុញគោលនយោបាយលើកទឹកចិត្តផ្នែកពន្ធដារ និងថាមពល ដើម្បីបង្កើនភាពប្រកួតប្រជែងក្នុងវិស័យនេះផងដែរ៕
