នាយករដ្ឋមន្ត្រី ប្រកាសពង្រីកកម្មវិធីអាហាររូបត្ថម្ភតាមសាលារៀន និងការឧបត្ថម្ភសាច់ប្រាក់ជូនស្ត្រីមានផ្ទៃពោះ សំដៅលើកកម្ពស់សុខុមាលភាពប្រជាពលរដ្ឋចាប់តាំងពីវ័យកុមារ

ប្រមុខរាជរដ្ឋាភិបាលកម្ពុជា សម្ដេចមហាបវរធិបតី ហ៊ុន ម៉ាណែត បានគូសបញ្ជាក់អំពីការប្ដេជ្ញាចិត្តយ៉ាងមុតមាំក្នុងការបន្តពង្រីកវិសាលភាពនៃកម្មវិធីគាំពារសង្គមសំខាន់ៗពីរគឺ កម្មវិធីអាហាររូបត្ថម្ភតាមសាលារៀន និងកម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម ២ឆ្នាំ ដើម្បីធានាបាននូវសុខភាពសាធារណៈ និងការអភិវឌ្ឍប្រកបដោយចីរភាពរបស់ប្រជាពលរដ្ឋកម្ពុជាចាប់តាំងពីវ័យកុមារ។

នៅក្នុងឱកាសអញ្ជើញជាអធិបតីក្នុងពិធីអបអរសាទរខួប ៨០ឆ្នាំ នៃការបង្កើតសាកលវិទ្យាល័យវិទ្យាសាស្ត្រសុខាភិបាល នាថ្ងៃទី៧ ខែតុលា ឆ្នាំ២០២៦ សម្ដេចធិបតីបានមានប្រសាសន៍ថា កម្មវិធីអាហាររូបត្ថម្ភតាមសាលារៀន ដែលអនុវត្តរួមគ្នាជាមួយអង្គការស្បៀងអាហារពិភពលោក (WFP) និងដៃគូអភិវឌ្ឍន៍ សម្រេចបានការគ្របដណ្ដប់លើសាលារៀនចំនួន ១,១១៤ សាលា នៅក្នុងខេត្តជាង ១០ ទូទាំងប្រទេស។ កម្មវិធីនេះបានផ្តល់អាហាររូបត្ថម្ភដោយផ្ទាល់ដល់សិស្សានុសិស្សប្រមាណជាង ៣០ម៉ឺននាក់ ក្នុងឆ្នាំ២០២៤ ដែលជាការកើនឡើងយ៉ាងខ្លាំងបើធៀបនឹងចំនួន ១១ម៉ឺននាក់ កាលពីចុងឆ្នាំ២០២៣។

សម្ដេចបានបន្ថែមថា រាជរដ្ឋាភិបាលមានផែនការច្បាស់លាស់ក្នុងការទទួលខុសត្រូវលើសាលារៀនទាំង ១,១១៤ នេះ ដោយប្រើប្រាស់ថវិការដ្ឋទាំងស្រុងចាប់ពីឆ្នាំ២០២៨ តទៅ។ លើសពីនេះ ថវិការដ្ឋត្រូវបានប្រើប្រាស់សម្រាប់ទិញកសិផល និងបន្លែពីសហគមន៍ផ្ទាល់ ដើម្បីធ្វើម្ហូបអាហារជូនកុមារ ដែលជាការជួយទ្រទ្រង់ជីវភាពកសិករក្នុងមូលដ្ឋានផងដែរ។ ទន្ទឹមនឹងនេះ សម្ដេចក៏បានអំពាវនាវ និងណែនាំឲ្យមានការប្រុងប្រយ័ត្នខ្ពស់ចំពោះសុខភាពកុមារ ដោយហាមឃាត់ការលក់ដូរចំណីអាហារ ឬភេសជ្ជៈប៉ូវកម្លាំងដែលមានសារធាតុគីមី ឬជាតិស្ករច្រើននៅតាមសាលារៀន។

ជាមួយគ្នានេះដែរ ពាក់ព័ន្ធនឹងកម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម ២ឆ្នាំ សម្ដេចធិបតីបានគូសបញ្ជាក់ថា គិតត្រឹមឆមាសទី១ ឆ្នាំ២០២៤ ចំនួនអ្នកទទួលផលបានកើនឡើងរហូតដល់លើសពី ២,២៥ លាននាក់ (២លាន ២៥ម៉ឺន)។ ចំនួននេះបង្ហាញពីការកើនឡើងរហូតដល់ ១០៣% បើប្រៀបធៀបទៅនឹងចុងឆ្នាំ២០២៣ ដែលកាលនោះមានអ្នកទទួលផលប្រមាណ ១,១ លាននាក់។ សម្ដេចបានបញ្ជាក់ថា កម្មវិធីនេះ បាននិងកំពុងផ្តល់ការគាំពារចាប់តាំងពីអំឡុងពេលមានផ្ទៃពោះ រហូតដល់កុមារមានអាយុ ២ឆ្នាំ រួមទាំងស្ត្រីដែលមានផ្ទៃពោះនៅក្នុងពន្ធនាគារផងដែរ ព្រោះទោះបីជាម្ដាយប្រព្រឹត្តកំហុស ក៏កុមារមិនមានកំហុស និងត្រូវទទួលបានការមើលថែទាំសុខភាពឱ្យបានល្អប្រសើរ។ សម្ដេចធិបតីបានសង្កត់ធ្ងន់ថា តួលេខជាក់ស្ដែងទាំងនេះគឺជាភស្តុតាងបង្ហាញពីការយកចិត្តទុកដាក់ខ្ពស់ និងការវិនិយោគពិតប្រាកដរបស់រាជរដ្ឋាភិបាលលើសុខុមាលភាព និងសុខភាពសាធារណៈរបស់ប្រជាពលរដ្ឋចាប់តាំងពីមុនកំណើត៕