សហព័ន្ធកីឡាបាល់ទាត់សិង្ហបុរី បានបង្ហាញបញ្ជីឈ្មោះសមាជិកក្នុងក្រុមបាល់ទាត់ជម្រើសជាតិខ្លួនសរុប២៩នាក់ កាលពីពេលថ្មីៗនេះ ដើម្បីត្រៀមសម្រាប់ការប្រកួតមិត្តភាពអន្តរជាតិ និងព្រឹត្តិការណ៍ប្រចាំតំបន់អាស៊ីអាគ្នេយ៍ AFF Mitsubishi Electric Cup ២០២២ ស្របពេលដែរមានកីឡាករបងប្អូនបង្កើត៣នាក់ ត្រូវបានកោះហៅចូលក្រុមក្នុងពេលដំណាលគ្នា។
ក្រោមការដឹកនាំរបស់លោក Takayuki Nishigaya គ្រូបង្វឹកជនជាតិជប៉ុន បានកោះហៅកីឡាករទាំង៣រូបនេះមាន Irfan Fandi, Ikhsan Fandi និង Ilhan Fand។ អ្នកទាំង៣ ជាកូនប្រុសបង្កើតរបស់លោក Fandi Ahmad អតីតសមាជិកក្រុមជម្រើសជាតិសិង្ហបុរី ចន្លោះឆ្នាំ១៩៧៩ដល់១៩៩៧។
– កូនទី១ Irfan Fandi កើតនៅឆ្នាំ១៩៩៧ ធ្លាប់លេងឱ្យក្រុម Universidad Católica នៅលីគកំពូលប្រទេសឈីលី ក្នុងជើងទី១ឆ្នាំ២០១៥ ហើយជើងទី២បានប្តូរទៅចូលរួមក្រុម Young Lions នៅស្រុកកំណើតវិញ។ ខ្សែបម្រើកណ្ដាលរូបនេះ បានចេញទៅចូលរួមជាមួយក្រុម Home United នៅឆ្នាំ២០១៦-១៧ និងឆ្នាំ២០១៨ ត្រឡប់ទៅក្រៅ Young Lions វិញ។ ចាប់ពីឆ្នាំ២០១៩ រូបគេបានចូលរួមក្នុងបញ្ជីកូតាកីឡាករអាស៊ាននៅលីគប្រទេសថៃ ជាមួយក្រុម BG Pathum United ហើយគេជាកីឡាករដំបូងរបស់សិង្ហបុរី ដែលឈ្នះពានរង្វាន់លីគកំពូលថៃផងដែរ។
អត្ថបទពាក់ព័ន្ធ៖សិង្ហបុរី ជាប្រទេសទី៣ក្នុងតំបន់អាស៊ាន ដែលប្រកាសប្រើ VAR ក្នុងលីគកំពូលរបស់ខ្លួន
– កូនទី២ Ikhsan Fandi វិញកើតនៅឆ្នាំ១៩៩៩ ជាខ្សែប្រយុទ្ធ ធ្លាប់ប្រកបអាជីពនៅក្លិបបាល់ទាត់ Jerv សមាជិកក្នុងពានរង្វាន់លីគលំដាប់ទី២ប្រទេសន័រវែស។ ខ្សែប្រយុទ្ធរូបនេះមានកម្ពស់ ១.៨៣ម៉ែត្រ បានចុះកិច្ចសន្យាកីឡាករអាជីពដំបូងជាមួយក្រុម Home United នៅឆ្នាំ២០១៦ ហើយនៅឆ្នាំ២០១៧-១៨ បានចូលរួមក្រុម Young Lions និងនៅឆ្នាំ២០១៩-២០ ចូលរួមក្នុងក្រុម Raufoss សមាជិកពានរង្វាន់លីគទី២ប្រទេសន័រវែស ហើយនៅចុងឆ្នាំ២០២១ រូបគេបានផ្លាស់ទៅចូលរួមលីគប្រទេសថៃ ជាមួយក្រុម BG Pathum United ដូចបងប្រុសខ្លួន។
អត្ថបទពាក់ព័ន្ធ៖ក្លិបបាល់ទាត់ Albirex Niigata គ្រងជើងឯកពានរង្វាន់លីគកំពូលសិង្ហបុរី រដូវកាលឆ្នាំ២០២២
– កូនទី៣ Ilhan Fand កើតនៅឆ្នាំ២០០២ ធ្លាប់ជាខ្សែបម្រើ-ប្រយុទ្ធ របស់ក្រុម Young Lions ក្នុងលីគសិង្ហបុរី។ រូបគេពាក់អាវលេខ១៧ក្នុងក្រុមនេះ គិតចាប់ពីចុះកិច្ចសន្យាកីឡាករអាជីពពីឆ្នាំ២០១៩ មក។ កីឡាកររូបនេះធ្លាប់ហ្វឹកហាត់នៅថ្នាលយុវជន i2i Football Academy ក្នុងប្រទេសអង់គ្លេស ដែលមានទំនាក់ទំនងជាមួយក្លិប Leeds United អំឡុងពេលសិក្សានៅ Queen Ethelburga’s College ក្នុងទីក្រុង York។ ខណ:ឆ្នាំ២០២២ រូបគេបានចូលរួមជាមួយក្លិប Albirex Niigata Singapore FC។
អត្ថបទពាក់ព័ន្ធ៖កីឡាករ Ikhsan Fandi របស់សិង្ហបុរី បោះបង់ក្លិបលីគកំពូលន័រវែស ចូលរួមក្រុមលីគកំពូលថៃ
បច្ចុប្បន្នក្រុមជម្រើសជាតិសិង្ហបុរី ដែលមានកីឡាករ ២៩នាក់ ក្រោមការដឹកនាំរបស់គ្រូបង្វឹក Takayuki Nishigaya បានធ្វើដំណើរទៅកាន់ទីក្រុង Chiba ប្រទេសជប៉ុន ដើម្បីបោះជំរុំហ្វឹកហាត់រយ:ពេល១២ថ្ងៃ និងប្រកួតមិត្តភាពអន្តរជាតិជាមួយ ម៉ាល់ឌីវ នៅថ្ងៃទី១៧ ខែធ្នូ។
សម្រាប់ក្រុមជម្រើសជាតិសិង្ហបុរី ស្ថិតនៅពូល B នៃពានរង្វាន់បាល់ទាត់ប្រចាំតំបន់អាស៊ីអាគ្នេយ៍ AFF Mitsubishi Electric Cup 2022 ជាមួយក្រុមជម្រើសជាតិវៀតណាម, ម៉ាឡេស៊ី, មីយ៉ាន់ម៉ា និង ឡាវ។ ខណ:ការប្រកួតបើកឆាក សិង្ហបុរី ប៉ះ មីយ៉ាន់ម៉ា នៅថ្ងៃទី២៤ ខែធ្នូ នៅកីឡដ្ឋាន Jalan Besar៕
អត្ថបទពាក់ព័ន្ធ៖កីឡាករដែលជួយសិង្ហបុរី ឈ្នះពាន AFF Suzuki Cup ៣សម័យកាលចូលនិវត្តន៍
