នៅព្រឹកថ្ងៃអាទិត្យ ទី៤ ខែកក្កដា ឆ្នាំ២០២១ នេះលោក Akihiro Kato ប្រធានក្លិបអង្គរថាយហ្គឺរ សមាជិកក្នុងពានរង្វាន់បាល់ទាត់លីគកំពូលកម្ពុជា Metfone Cambodian League បានប្រកាសនៅលើគណនីហ្វេសប៊ុករបស់លោកថា នឹងបរិច្ចាកថវិការ ១/៣ ដល់ខេត្តសៀមរាប ប្រសិនបើក្រុមរបស់លោកឈ្នះជើងឯក នៅរដូវកាលនេះ។
សំណេរទាំងស្រុងរបស់លោកបញ្ជាក់ថា៖«សូមអរគុណចំពោះការគាំទ្រទាំងអស់របស់អ្នកទាំងអស់គ្នា ទាំងស្ថិតក្នុងដំណាក់កាលលំបាកយ៉ាងនេះក៏ដោយ។ ខ្ញុំបានពិភាក្សាគ្នារួចហើយ ប្រសិនបើ Tiger FC ឈ្នះពានរង្វាន់នៅរដូវកាលនេះ ខ្ញុំនឹងប្រើប្រាស់ប្រាក់រង្វាន់ ១/៣ នឹងជូនដល់កីឡាករ គ្រូបង្វឹកនិងបុគ្គលិក ហើយ១/៣ទៀត ប្រើប្រាស់សម្រាប់ក្លិប និង១/៣ទៀតនឹងបរិច្ចាគសម្រាប់កសាងខេត្តសៀមរាប»។
អត្ថបទពាក់ព័ន្ធ៖អង្គរថាយហ្គឺរ យកជប៉ុនម្នាក់ធ្លាប់កាន់ការងារ U15និងU18ខេត្តក្រចេះ ធ្វើជំនួយការគ្រូបង្វឹក
ក្រុមអង្គរថាយហ្គឺរ បង្កើតឡើងដំបូងមានឈ្មោះថា ត្រាយអាស៊ីភ្នំពេញ ប៉ុន្តែនៅឆ្នាំ២០១៥ ក្រោយលោក Akihiro Kato ក្លាយជាប្រធានក្លិបបានប្តូរឈ្មោះទៅជា ខេមបូឌានថាយហ្គឺរ។ ក្រោយមកក្លិបនេះបានប្តូរទីតាំងទៅខេត្តសៀមរាប ដើម្បីធ្វើជាទឹកដីរបស់ខ្លួន ក្រុមនេះបានប្តូរឈ្មោះជាអង្គរថាយហ្គឺរ វិញ។
គិតត្រឹមពេលនេះពានរង្វាន់លីគកំពូលកម្ពុជា ២០២១ បានដំណើរការប្រកួតឡើងវិញហើយ ខណៈក្រុមអង្គរថាយហ្គឺរ កំពុងឈរកំពូលតារាងបណ្តោះអាសន្នមាន១៣ពិន្ទុច្រើនជាងគេក្រោយប្រកួតបាន៥លើក ឈ្នះ៤លើក ស្មើ១លើក និងមិនធ្លាប់ចាញ់សោះ៕
អត្ថបទពាក់ព័ន្ធ៖កីឡាករជប៉ុន Joichiro Sugiyama អតីតសមាជិកអង្គរថាយហ្គឺរ ប្រកាសព្យួរស្បែកជើង