បើតាមសេចក្តីប្រកាសព័ត៌មានរបស់ក្រសួងអប់រំយុវជននិងកីឡា ចុះថ្ងៃទីអង្គារ ទី១៣ ខែកក្កដា ឆ្នាំ២០២១ បញ្ជាក់ថាការវិនិច្ឆ័យលទ្ធផលនៃការប្រកួតកីឡាប្រដាល់គុនខ្មែរផ្ដាច់ព្រ័ត្រដណ្តើមខ្សែក្រវាត់គោជល់មានភាពមិនប្រក្រតី។
សេចក្តីប្រកាសនេះចេញឡើងក្រោយកិច្ចប្រជុំបន្ទាន់មួយ នៅម៉ោង៣រសៀលតាមប្រព័ន្ធ Zoom ដឹកនាំដោយឯកឧត្តម អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡា នៃក្រសួងអប់រំយុវជននិងកីឡា។
សេចក្តីប្រកាសបញ្ជាក់ថាករណីប្រកួតផ្ដាច់ព្រ័ត្រដណ្តើមខ្សែក្រវាត់គោជល់ ប្រភេទទម្ងន់៦០គីឡូក្រាម រវាងកីឡាករ ឃឹម បូរ៉ា និងកីឡាករ ម៉ឺន មេឃា នាយប់ថ្ងៃសៅរ៍ ទី១០ ខែកក្កដា ឆ្នាំ២០២១ វេលាម៉ោង៨យប់ នៅស្ថានីយទូរទស្សន៍ CNC មានភាពមិនប្រករតីដោយមិនបានអនុវត្តន៍តាមបទបញ្ជានៃការប្រកួត ក្បួនច្បាប់ និងក្រមសីលធម៌វិជ្ជាជីវៈកីឡា។
ក្រសួងអប់រំយុវជននិងកីឡាបានណែនាំឱ្យសហព័ន្ធកីឡាប្រដាល់គុនខ្មែរដូចជា៖
១. ត្រូវបែងចែកតួនាទីនិងភារកិច្ចឱ្យបានច្បាស់លាស់រវាងសហព័ន្ធនិងស្ថានីយ៍ទូរទស្សន៍ដៃគូឧបត្ថម្ភដើម្បីអនុវត្តការងារឱ្យមានការទទួលខុសត្រូវច្បាស់លាស់។
២. ពង្រឹងវិន័យនិងការអនុវត្តបទបញ្ជានៃការប្រកួតឱ្យបានត្រឹមត្រូវម៉ឺងម៉ាត់តាមក្បួនច្បាប់មានតម្លាភាពនិងយុត្តិធម៌។
៣. អភិវឌ្ឍសមត្ថមភាពមន្ត្រីអាជ្ញាកណ្តាលចៅក្រមនិងស្នងការប្រកួតឱ្យមានសមត្ថភាពជំនាញមនសិការក្រមសីលធម៌វិជ្ជាជីវៈនិងគុណតម្លៃកីឡា។
៤. ដាក់ពិន័យដល់មន្ត្រីដែលប្រព្រឹត្តខុសឆ្គងតាមទោសកំហុសដែលបានប្រព្រឹត្តនិងលើកទឹកចិត្តដល់មន្ត្រីដែលអនុវត្តការងារបានល្អនិងមានស្នាដៃជាគំរូ។
៥. ករណីបញ្ហានេះកើតឡើងបន្តទៀតក្រសួងអប់រំយុវជននិងកីឡានឹងផ្អាកការគាំទ្រថវិកាទាំងស្រុងនិងលុបប្រកាសស្តីពីការអនុញ្ញាតឱ្យគណៈកម្មាធិការប្រតិបត្តិសហព័ន្ធកីឡាប្រដាល់គុនខ្មែរបំពេញភារកិច្ចចេញពីបញ្ជីសហព័ន្ធកីឡាជាតិ។
អត្ថបទពាក់ព័ន្ធ៖សម្តេចតេជោ៖«ឱ្យកីឡាប្រដាល់ឈានទៅមុខម្តេចបាន បើសហព័ន្ធ ទុកឱ្យអាជ្ញាកណ្ដាលធ្វើបែបនេះ?»
សូមបញ្ជាក់ថាជុំវិញការប្រកួតវគ្គផ្ដាច់ព្រ័ត្ររវាងកីឡាករ ឃឹម បូរ៉ា និងកីឡាករ ម៉ឺន មេឃា ត្រូវបានសម្តេចតេជោ ហ៊ុន សែន បង្ហោះនៅលើហ្វេសប៊ុកនៅម៉ោង៨:៣០នាទីយប់ថ្ងៃអាទិត្យ ទី១១ ខែកក្កដា ឆ្នាំ២០២១ រំលងការប្រកួត១ថ្ងៃ ដោយរិះគន់សហព័ន្ធកីឡាប្រដាល់គុនខ្មែរ ថាបណ្តោយឱ្យអាជ្ញាកណ្ដាលធ្វើតាមតែអំពើចិត្ត។
ក្រោយសម្តេចតេជោ ប្រតិកម្មបានប្រហែលជាងកន្លះម៉ោង ទូរទស្សន៍ CNC ដែលម្ចាស់សង្វៀនបានប្រកាសនៅលើហ្វេសប៊ុករបស់ខ្លួនថា សហព័ន្ធកីឡាប្រដាល់គុនខ្មែរ រួមជាមួយស្ថានីយទូរទស្សន៍ សម្រេចមិនលើកពេលប្រកួតផ្តាច់ព្រ័ត្រកម្មវិធីប្រដាល់ អ្នកតស៊ូគុនខ្មែរគោជល់ កំពូលជើងឯក ទេ ដោយប្រគល់ជ័យលាភីឲ្យទៅ ឃីម បូរ៉ា។
អត្ថបទពាក់ព័ន្ធ៖NOCC ព្រមានសហព័ន្ធកីឡាប្រដាល់គុនខ្មែរ ក្រោយត្រូវត្មោងសម្តេចតេជោ រឿងអយុត្តិធម៌
រហូតដល់ល្ងាចថ្ងៃច័ន្ទ គណៈកម្មាធិការជាតិអូឡាំពិកកម្ពុជា (NOCC) បានចេញសេចក្តីសម្រេចដាក់ការព្រមានដល់សហព័ន្ធកីឡាប្រដាល់គុនខ្មែរ ឱ្យធ្វើការកែទម្រង់ និងដាក់ចេញនូវបទបញ្ញត្តិដោយដាក់ពិន័យយ៉ាងម៉ឺងម៉ាត់ដល់អាជ្ញាកណ្ដាលនិងចៅក្រមឱ្យគោរពស្មារតីកីឡា ក្រោយកើតហេតុការណ៍ខាងលើនេះ។
ចូលដល់រសៀលថ្ងៃសុក្រ នេះសារព័ត៌មានក្នុងស្រុកមួយបានបញ្ជាក់ថាមន្ត្រីកីឡាប្រដាល់ ២រូប និងកីឡាករ១រូបជាប់ពិន័យ ដោយក្នុងនោះមានផ្អាកការងារលោកគ្រូ មាស សុខគ្រី ចំនួន៦ សប្តាហ៍ ដាក់ទណ្ឌកម្មអាជ្ញាកណ្ដាល រៀម កុសល រយៈពេល៤សប្តាហ៍ និងសហព័ន្ធព្រមាន ម៉ឺន មេឃា លើកទី ១។
នៅម៉ោង៥:៣០នាទីល្ងាចថ្ងៃសុក្រ នេះដែរសហព័ន្ធកីឡាប្រដាល់គុនខ្មែរ បានចេញសេចក្តីប្រកាសមួយដោយទទួលយកសំណូមពរទាំង៥ របស់ក្រសួងអប់រំយុវជននិងកីឡា ក្រោយប្រជុំជាមួយភាគីពាក់ព័ន្ធរួច។ សេចក្តីប្រកាសនេះមាន៥ ចំណុចដូចជា៖
១.អនុវត្តឲ្យបាននូវច្បាប់ប្រកួត បទបញ្ជាបច្ចេកទេសក្នុងកាប្រកួត
២.ត្រូវកាត់សេចក្ដីដោយយុត្តិធម៌បំផុត
៣.បែងចែកភារកិច្ចរវាង សហព័ន្ធ ទូរទស្សន៍ និង អ្នកឧបត្ថម្ភគាំទ្រ
៤.បន្តពង្រឹង គុណភាព មន្ត្រី បច្ចេកទេស
៥.មានវិធានការណ៍លើកទឹកចិត្ត ចំពោះមន្ត្រីដែល សកម្មនិងមានវិធានការណ៍ អប់រំណែនាំ ព្រមទាំងពង្រឹងចំពោះមន្ត្រីទាំងឡាយណាដែលអសកម្ម៕