ការទន្ទឹងចាំបានវិលត្រឡប់មកវិញហើយ នោះគឺព្រឹត្តិការណ៍ «សង្ក្រាន្តសៀមរាប ២០២២» ជាការចូលរួមអបអរនាពិធីបុណ្យចូលឆ្នាំថ្មីប្រពៃណីខ្មែរ នា១០ថ្ងៃខាងមុខទៀតនេះ។ មហាជនគ្រប់រូបហាក់ដូចជាសប្បាយ និងរំភើបចិត្តណាស់ ខណៈដែលឃើញពីទិដ្ឋភាពនៃការរៀបចំកម្មវិធីសង្ក្រាន្ដសៀមរាប ដែលបានបង្ហោះនៅលើបណ្ដាញសង្គមហ្វេសប៊ុក។ តើអ្នកទាំងអស់គ្នាបានដឹងហើយឬនៅថា កម្មវិធីសប្បាយមានអ្វីខ្លះ? ហើយគេធ្វើនៅទីតាំងណាខ្លះ?
ជាការពិតណាស់ បើតាមរដ្ឋបាលខេត្តសៀមរាបបានឱ្យដឹងថា ឆ្នាំនេះខេត្តសៀមរាប នឹងរៀបចំពិធីសង្ក្រាន្តសៀមរាប២០២២ដែលនឹងត្រូវរៀបចំទៅលើទីតាំងសំខាន់ៗចំនួន ២ គឺ ៖
ទីតាំងសំខាន់ទី ១ រៀបចំននៅក្នុងក្រុងសៀមរាប ដោយមានកម្មវិធីជិះទូកកម្សាន្ត ពិព័រណ៍ម្ហូបអាហារ ផ្សារបណ្ដែតទឹក តន្ត្រីស្គរដៃ ការសម្ដែងសិល្ប: នៅលើផែទឹក និងការប្រគំតន្ត្រីខ្នាតយក្ស ចំនួន ២ កន្លែងតែម្ដង។
ទីតាំងសំខាន់ទី ២ រៀបចំនៅប្រាសាទចៅសាយចៅទេវតា ត្រូវបានរៀបចំជាពិធី «ភូមិសង្ក្រាន្ត» និងប្រាសាទធម្មានុន្ន ដោយអ្នកចូលរួម គឺតម្រូវឱ្យស្លៀកសម្លៀកបំពាក់ប្រពៃណីខ្មែរយើង រួមមានហូល ផាមួង អាវប៉ាក់ ខោចែវជាដើម ដើម្បីជាចំណែកមួយនៃការលើកតម្លៃវប្បធម៌ប្រពៃណីជាតិ។ សម្រាប់កម្មវិធីកម្សាន្តក្នុងតំបន់នេះ រួមមានពិធីបួងសួងសុំសេចក្ដីសុខ ពិធីទទួលទេវតាឆ្នាំថ្មី ពិធីពូនភ្នំខ្សាច់ និងតំបន់ «ភូមិខ្ញុំ» ដែលមានលេងល្បែងប្រជាប្រិយ និងការសម្ដែងល្ខោនបាសាក់ ជាដើម។
ព្រឹត្តិការណ៍ «សង្ក្រាន្តសៀមរាប ២០២២»ប្រព្រឹត្តទៅចាប់ពីថ្ងៃទី ១២ រហូតដល់ថ្ងៃទី ១៦ ខែមេសា ឆ្នាំ ២០២២ ខាងមុខនេះ។ ដូច្នោះ ប្រិយមិត្តទាំងអស់គ្នា កុំភ្លេចត្រៀមឈុតបុរាណប្រពៃណីរបស់ខ្មែរ សម្រាប់ស្លៀកដើរកម្សាន្ដផងណា ដើម្បីរួមចំណែកលើកស្ទួយវប្បធម៌ជាតិយើង៕
សូមចូលអាន-មកដឹងទាំងអស់គ្នា! ពីទំនាយតាមថ្ងៃសង្ក្រាន្តទាំង៣ថ្ងៃ
សូមចូលអាន-មហាសង្ក្រានឆ្នាំខាល ចត្វាស័ក ឆ្នាំ២០២២