កាលពីថ្ងៃទី ១៨ ខែមេសា នេះ គេស្រាប់តែឃើញតារាកំប្លែង ផេនខេក បានចេញសារនៅលើបណ្ដាញសង្គមហ្វេសប៊ុករបស់ខ្លួន ដែលទម្លាយឱ្យមហាជនអ្នកគាំទ្របានដឹងថា នាងបានចែកផ្លូវគ្នាជាមួយស្វាមីហើយ ដោយប្រើហេតុផល មានជនទី ៣ ចូលមកជ្រៀតជ្រែកនៅក្នុងជីវិត និងបានផ្ដាំឱ្យស្វាមីចាកចេញទៅមើលថែគ្នាឱ្យបានល្អជាងនាងទៅចុះ។
បើទោះទម្លាយបែបនេះមែន តែហ្វេនអ្នកគាំទ្រនៅតែមិនអស់ចិត្តសោះ ព្រោះហេតុការណ៍នេះកើតឡើងខ្លាំងពេក បន្ទាប់ពី ផេនខេក ទើបតែបានចូលរោងការជាមួយស្វាមីកាលពីពាក់កណ្ដាលខែ មីនា កន្លងទៅថ្មីៗនេះ។
រហូតមកទល់យប់ថ្ងៃទី ១៩ ខែមេសា នេះ ផេនខេក បានចេញមុខនៅលើហ្វេសប៊ុករបស់ខ្លួនម្ដងទៀត ដោយធ្វើឱ្យការ Live បំភ្លឺពីហេតុផលដែលធ្វើឱ្យខ្លួននឹងស្វាមីឈានទៅដល់ការលែងលះគ្នា។ យ៉ាងណាមិញ ផេន ខេក មិនបាននិយាយរៀបរាប់អ្វីច្រើនឱ្យមហាជនអស់ចិត្តនោះទេ នាងបានត្រឹមតែបង្ហើបប្រាប់ពីអារម្មណ៍ដែលអួលណែនក្នុងទ្រូងថា បញ្ហានៅក្នុងជីវិតនាងគឺមានច្រើនណាស់ ហេតុអីនាងត្រូវយករឿងបែកបាក់ក្នុងជីវិតមកសម្តែងឱ្យមហាជនឃើញ ឬដើម្បីយកប្រជាប្រិយភាពនោះ?
គ្រប់យ៉ាង ផេនខេក និយាយសារភាពប្រាប់មហាជនថា រាល់ថ្ងៃនេះ ខ្លួនជាតារាកំប្លែងម្នាក់ដែលមានតួនាទីធ្វើឱ្យមហាជនសើចសប្បាយរីករាយ។ ផេនខេក ថា ការពិតទៅរាល់ថ្ងៃនេះនាងរស់នៅក្រោមសម្ពាធឯកា និងសម្ពាធផ្លូវចិត្តធ្ងន់ រហូតដល់ថ្នាក់ពិបាកធ្មេចភ្នែកឱ្យលក់នៅពេលរាត្រី។ នាងបញ្ជាក់ថា មានតែអ្នកស្គាល់គ្នា ហើយស្និទ្ធស្នាលនឹងនាងទើបអាចយល់ពីបញ្ហារបស់នាងច្បាស់។
ទោះជាយ៉ាងណាក្ដី ផេនខេក នៅតែបញ្ជាក់ជាដដែលៗនៅក្នុង Live ថា ខ្លួនអរគុណចំពោះហ្វេន និងមិត្តភ័ក្តចំពោះការលើកទឹកចិត្ត ហើយចំពោះការលែងលះរបស់ខ្លួន និងស្វាមី ជារឿងពិតហើយក៏គ្មានថ្ងៃត្រឡប់មកវិញឡើយ៕
អត្ថបទទាក់ទងពីតារាកំប្លែង ផេនខេក ៖
ផេនខេក ប្រាថ្នាចង់បានកូនជាមួយស្វាមី ក៏ប៉ុន្ដែត្រូវរង់ចាំពេលវេលាល្អសិន
កូវីដមិនស្ងប់ ផេនខេកតារាភេទទីបី ថែមអាជីពលក់ទឹកប្រហុកអនឡាញមួយមុខទៀត!
