ពាក្យមួយឃ្លាដែលបណ្ដាលចិត្តឱ្យម្ចាស់ផលិតកម្មបារមី រុញបទចម្រៀងរបស់លោក វណ្ណដា ឱ្យល្បីដល់កំពូល ត្រូវបានគេលើកឡើងថា ៖«ការធ្វើបទ Original គឺមិនអាចទៅរួចទេ»។ តែយ៉ាងណាមិញ ដោយសារតែការប្រឹងប្រែងទើបបទចម្រៀង «Time To Rise» ច្រៀងដោយ Rapper វណ្ណដា មានចំនួនអ្នកទស្សនាដល់ទៅ ១០១លានដង។
ក្រោយទទួលបានភាពជោគជ័យមួយនេះ តារាចម្រៀងស្រី ឡូរ៉ា ម៉ម ( Laura Mam ) ដែលជាម្ចាស់ផលិតកម្មបារមី ក៏បានសម្ដែងអារម្មណ៍ឱ្យមហាជនបានដឹងថា ៖ «គេបានប្រាប់ខ្ញុំថា «ការធ្វើបទ Original គឺមិនអាចទៅរួចទេ»។ ខ្ញុំចាំបានផងដែរ នូវកិច្ចសន្ទនាមួយជាមួយលោក Arn Chorn-Pond ដែលគាត់បាននិយាយថា អាជីវកម្មខ្លះមិនឱ្យតម្លៃសិល្បៈប្រពៃណីរបស់យើង ហើយគិតថាសិល្បៈនេះតូចទាប «គួរឲ្យខ្មាសគេណាស់»។ ជាមួយនឹងពាក្យទាំងនោះ គាត់បានជំរុញខ្ញុំឱ្យធ្វើអ្វីមួយអំពីវា! នៅពេលដែលខ្ញុំពិចារណាពីការចងចាំនេះ ខ្ញុំដឹងថា មានមនុស្សមួយចំនួន ដែលមិនមានអារម្មណ៍សប្បាយចិត្តជាមួយនឹងគំនិតនៃ «ភាពអស្ចារ្យរបស់ខ្មែរ» នោះទេ ។ ឥឡូវនេះខ្ញុំយល់ហើយថា ហេតុអ្វីបានជាវាគួរឱ្យខ្លាចសម្រាប់ពួកគេ។ នេះគឺដោយសារតែការបរាជ័យគឺកើតឡើងញឹកញាប់ពេក ហើយមនុស្សជាច្រើនប្រហែលជាមានអារម្មណ៍ថាយើងបានចាញ់គ្រប់គ្រាន់ហើយ។»
ចូលអាន៖ ដឹងអត់ 12 បទនេះ របស់វណ្ណដា មួយបទៗមានចំនួនទស្សនាលើសពី ២០លានដងនៅលើ YouTube
កញ្ញា រ៉ូឡា ម៉ម បានសង្កត់ធ្ងន់ថា បទចម្រៀងរបស់ Rapper វណ្ណដា និងព្រឹទ្ធាចារ្យចាប៉ីដងវែង គង់ណៃ គឺគ្រាន់តែជាសំណុចចាប់ផ្ដើមតែប៉ុណ្ណោះ។
ឡួរ៉ាបានបន្តទៀតថា «ចាប់ពីថ្ងៃនេះតទៅ ខ្ញុំមានជំនឿចិត្តខ្លាំងជាងពេលមុនទៅទៀតថានេះ គឺគ្រាន់តែជាការចាប់ផ្ដើមតែប៉ុណ្ណោះ។ លោកព្រឹទ្ធាចារ្យ គង់ ណៃ និង វណ្ណដា បាននិយាយថាវាដល់ពេលហើយ ដែលយើងក្រោកឡើង គឺដល់ពេល «Time to Rise»! ហើយប្រជាជនយើងក៏បានយល់ព្រមជាមួយពួកគាត់ដែរ គឺយល់ព្រមដល់ទៅ ១០០ លានដង! ដូច្នេះតោះកម្ពុជាក្រោកឡើងវិញ! នាងខ្ញុំក៏សូមអរគុណចំពោះការជឿជាក់លើពួកយើងទាំងអស់គ្នានៅ បារមី! ពួកយើងស្រឡាញ់អ្នកទាំងអស់គ្នា! ខ្ញុំពិតជាមានមោទកភាពខ្លាំងណាស់ សម្រាប់ក្រុមការងារ Baramey ទាំងមូល ហើយជាពិសេសសប្បាយចិត្តសម្រាប់ Vann Da – វណ្ណដា និង លោកព្រឹទ្ធាចារ្យ គង់ ណៃ។ ១០០ លាន Views Verified! ពិតជានិយាយលែងចេញហ្មង! ដោយក្ដីស្រឡាញ់ ឡូរ៉ា»៕
