តាំងពីសហព័ន្ធកីឡាបាល់ទាត់អាស៊ី (AFC) បានបង្កើតពានរង្វាន់ជើងឯកយុវជនក្រោមអាយុ២៣ឆ្នាំ AFC U-23 Asian Cup សម្រាប់ប្រទេសជាសមាជិកប្រកួតប្រជែងរាល់២ឆ្នាំម្តង ពីឆ្នាំ២០១៣ (ឆ្នាំ២០១២ សម្រាប់ប្រកួតជម្រុះ) មានកីឡាកររបស់កម្ពុជា ចំនួន៤រូប ធ្លាប់ជាប់ឈ្មោះរហូតដល់ទៅ៣ជំនាន់ដូចៗគ្នា ក្នុងកំណត់ត្រាពានរង្វាន់កម្រិតទ្វីបមួយនេះ។
សារព័ត៌មានត្រយង សូមណែនាំប្រិយមិត្តឱ្យស្គាល់កីឡាករទាំង៤រូបដូចខាងក្រោម៖
ទី១) ខ្សែការពារ នេន សុធារ័ត្ន របស់ណាហ្គាវើលដ៍
នេន សុធារ័ត្ន ជាខ្សែការពារ បច្ចុប្បន្នកំពុងប្រកបអាជីពនៅក្លិបណាហ្គាវើលដ៍ ធ្លាប់បង្ហាញខ្លួន៣ជំនាន់មុនគេ នៅចន្លោះឆ្នាំ២០១២, ២០១៥ និង២០១៧ ដោយបង្ហាញខ្លួនបាន១០ប្រកួត មាន៦៨៦នាទី។ នេន សុធារ័ត្ន ទទួលបានការពេញចិត្តពេញថ្លើមពីគ្រូបង្វឹក៣ជំនាន់ផ្សេងគ្នាដែរ ដោយនៅឆ្នាំ២០១២ ក្រុម U23 កម្ពុជា ដឹកនាំដោយលោកគ្រូបង្វឹក ប្រាក់ សុមន្នី ហើយនៅឆ្នាំ២០១៥ ដឹកនាំដោយលោកគ្រូបង្វឹកកូរ៉េខាងត្បូង Lee Tae Hoon និងនៅឆ្នាំ២០១៧ ដឹកនាំដោយលោកគ្រូបង្វឹកប្រេស៊ីល Leonado Vitorino។
ជាខ្សែការពារក៏ពិតមែន ប៉ុន្តែ នេន សុធារ័ត្ន បានរកគ្រាប់បាល់ឱ្យក្រុមជម្រើសជាតិកម្ពុជា ឈុត U23 ចំនួន១គ្រាប់ដែរ គឺនៅប្រកួតបើកឆាកព្រឹត្តិការណ៍ AFF U23 Championship ជម្រុះពូល F នៅថ្ងៃទី២៣ ខែមិថុនា ឆ្នាំ២០១២ ទល់ក្រុមហុងកុង ខណៈកាលនោះក្រុមកម្ពុជា ឈ្នះហុងកុង ៣-២ លើទីលាន Chao Anouvong Stadium ក្នុងរដ្ឋធានីវៀងច័ន្ទន៍ប្រទេសឡាវ។ ជាមួយគ្នានោះដែរ សុធារ័ត្ន ទទួលបានការទុកចិត្តពីលោកគ្រូបង្វឹក ប្រាក់ សុមន្នី ឱ្យធ្វើជាប្រធានក្រុមក្នុងប្រកួតបិទពូល F នៅឆ្នាំ២០១២ ទល់នឹងក្រុមកូរ៉េខាងជើង ផងដែរ។
អត្ថបទពាក់ព័ន្ធ៖ជម្រើសជាតិកម្ពុជា ចំនួន២៧នាក់ ត្រៀមប្រកួតវគ្គជម្រុះពានរង្វាន់ AFC U23 Asian Cup 2026
ទី២) ខ្សែការពារស្លាប ឆេង ម៉េង របស់វិសាខា
ខ្សែការពារស្លាប ឆេង ម៉េង បច្ចុប្បន្នកំពុងប្រកបអាជីពនៅក្លិបវិសាខា ជាកីឡាករទី២ ដែលធ្លាប់បានជាប់ឈ្មោះ៣ជំនាន់ក្នុងក្រុម U23កម្ពុជា សម្រាប់ប្រកួតវគ្គជម្រុះតាមពូលដែរ គឺនៅឆ្នាំ២០១៥, ២០១៧ និង២០១៩ ពោលគឺបង្ហាញខ្លួនបាន៤ប្រកួត ហើយត្រូវបានលោកគ្រូបង្វឹកប្រេស៊ីល Leonado Vitorino អោយធ្វើជាប្រធានក្រុមក្នុងប្រកួតបើកឆាកពូល J នៅឆ្នាំ២០១៧ គ្រាដែលកម្ពុជា ធ្វើម្ចាស់ផ្ទះនៅពហុកីឡដ្ឋានជាតិ ខណៈលទ្ធផលគ្រានោះកម្ពុជា ស្មើគ្នាជាមួយចិន ០-០។
ទី៣) ខ្សែការពារស្លាប សឿត បារាំង របស់ព្រះខ័នរាជស្វាយរៀង
ខ្សែការពារស្លាប សឿត បារាំង បច្ចុប្បន្នប្រកបអាជីពនៅក្លិបបាល់ទាត់ព្រះខ័នរាជស្វាយរៀង ធ្លាប់ជាប់ឈ្មោះ៣ជំនាន់ក្នុងក្រុម U23 កម្ពុជា សម្រាប់ប្រកួតពានរង្វាន់ជើងឯកទ្វីបអាស៊ី នេះដែរ ពោលគឺនៅឆ្នាំ២០១៧ ដែលដឹកនាំដោយលោកគ្រូបង្វឹកប្រេស៊ីល Leonado Vitorino នៅឆ្នាំ២០១៩ ដឹកនាំដោយគ្រូបង្វឹកអាហ្សង់ទីន Félix Agustín González Dalmás និងឆ្នាំ២០២១ ដឹកនាំដោយគ្រូបង្វឹកជប៉ុន HIROSE RYU។ សរុបនាទីទាំង៦ប្រកួតដែល សឿត បារាំង ធ្លាប់បានបង្ហាញខ្លួនលើទីលាន មានចំនួន៤៥៩នាទី ក្នុងឈុត U23 កម្ពុជា ប្រចាំជើងឯកកម្រិតទ្វីបអាស៊ី នេះ។
អត្ថបទពាក់ព័ន្ធ៖កីឡាករ ១០នាក់ បង្ហាញខ្លួនឱ្យកម្ពុជា វគ្គជម្រុះជើងឯក U23 ប្រចាំទ្វីបអាស៊ី ច្រើនជាងគេ
ទី៤) ខ្សែប្រយុទ្ធ ស៊ិន កក្កដា របស់វិសាខា
ខ្សែប្រយុទ្ធ ស៊ិន កក្កដា របស់ក្លិបវិសាខា ជាកីឡាករទី៤ ដែលបង្ហាញខ្លួនបាន៣ជំនាន់សម្រាប់ឈុត U23 កម្ពុជា ក្នុងពានរង្វាន់ជើងឯកប្រចាំទ្វីបអាស៊ី នេះ ដោយលើទី១ នៅឆ្នាំ២០១៧ លើកទី២ឆ្នាំ២០១៩ និងលើកទី៣ ឆ្នាំ២០២១។
ស៊ិន កក្កដា មានកំណត់ត្រាល្អជាងគេ ធ្លាប់ឈ្នះងារកីឡាករឆ្នើមប្រចាំការប្រកួតបាន១លើក ពេលប្រកួតទល់ក្រុមកោះតៃវ៉ាន់ នៅឆ្នាំ២០១៩ គ្រាដែលលទ្ធផលបញ្ចប់ទៅស្មើគ្នា ១-១ លើទីលានពហុកីឡដ្ឋានជាតិ ក្នុងរាជធានីភ្នំពេញ។
មិនតែប៉ុណ្ណោះ ស៊ិន កក្កដា ក៏ជាប់ក្នុងបញ្ជី Top Scorers របស់ក្រុម U23 កម្ពុជា ក្នុងចំណោមកីឡាករ៦រូប ដែលជាប់ឈ្មោះបច្ចុប្បន្នដែរ ពោលគឺរកបានគ្រាប់ស្មើគ្នា ក្នុងនោះមាន ភួង សុខសាណា, ចាន់ វឌ្ឍនាកា, ស៊ិន កក្កដា, សៀង ចន្ធា, ស រតនា និង សា ទី។ ២គ្រាប់របស់ ស៊ិន កក្កដា រកគ្រាប់បាល់បំប៉ោងសំណាញ់ទីក្រុមតៃវ៉ាន់ នៅឆ្នាំ២០១៩ នៅរាជធានីភ្នំពេញ ចំនួន១គ្រាប់ និង១គ្រាប់ទៀតទាត់បញ្ជូលទីក្រុងហុងកុង នៅប្រកួតបើឆាកពូល K ឆ្នាំ២០២១ នៅ J-Village Stadium ក្នុងប្រទេសជប៉ុន ខណៈលទ្ធផលរួមកម្ពុជា ឈ្នះហុងកុង ៤-២៕
សម្រាប់កម្មវិធីប្រកួតរបស់ក្រុម U23កម្ពុជា នៅឆ្នាំ២០២៥ នេះ សូមចុចនៅទីនេះ…
