លោក Anurak Srikerd ដែលធ្លាប់ដឹកនាំក្រុមយុវជនថៃ ក្រោមអាយុ១៩ឆ្នាំឈ្នះជើងឯកពានរង្វាន់យុវជនតំបន់អាស៊ាន AFF U19 Championship នៅរដ្ឋធានីវៀងច័ន្ទន៍ ក្នុងឆ្នាំ២០១៥ ត្រូវបានសហព័ន្ធកីឡាបាល់ទាត់ប្រទេសខ្លួន តែងតាំងឱ្យដឹកនាំក្រុមបាល់ទាត់ជម្រើសជាតិឈុតធំបណ្ដោះអាសន្នក្រោយគ្រូបង្វឹកចាស់ លោក Akira Nishino ជនជាតិជប៉ុន ត្រឡប់ទៅស្រុកកំណើតវិញ។
សហព័ន្ធកីឡាបាល់ទាត់ថៃ បានចែកផ្លូវជាមួយលោក Akira Nishino ក្រោយគ្រូបង្វឹករូបនេះដឹកនាំក្រុមមិនបានល្អក្នុងប៉ុន្មានប្រកួតចុងក្រោយដែលនៅសេសសល់ក្នុងវគ្គជម្រុះពូល G ប្រចាំតំបន់អាស៊ី ជុំទី២នៃពានរង្វាន់ជើងឯកពិភពលោក 2022 FIFA World Cup Qatar កាលពីពេលថ្មីៗ ពោលគឺធ្លាក់ត្រឹមវគ្គនោះតែម្តង។
អត្ថបទពាក់ព័ន្ធ៖ក្លិបយក្សកូរ៉េខាងត្បូង Jeonbukខ្ចីជើងកីឡាករថៃ Sasalak ពីក្លិប Buriram ៦ខែ
អំឡុងពេលប្រមូលផ្ដុំប្រកួតលើកនេះក្រុមជម្រើសជាតិថៃ បានប្រកួតមិត្តភាពចាញ់ អូម៉ង់ ១-០ ហើយស្មើគ្នា ២ទល់២ ជាមួយតាហ្ស៊ីគីស្ថាន និងចាញ់អ៊ូបេគីស្ថាន ៤ទល់១។ ចូលដល់ប្រកួតវគ្គជម្រុះពូល G វិញក្រុមថៃ បានស្មើគ្នា ២ទល់២ ជាមួយឥណ្ឌូណេស៊ី ហើយចាញ់អារ៉ាប់រួម ៣ទល់១ និងចុងក្រោយចាញ់ម៉ាឡេស៊ី ១ទល់០។
ដោយឡែកការតែងតាំងលោកAnurak Srikerd គឺធ្វើឡើងពីដំណាច់ខែមិថុនា ថ្មីៗនេះ ខណៈលោកបានធ្វើការងារជាមួយលោក Akira Nishino គ្រូបង្វឹកចាស់តាំងពីឆ្នាំ២០១៩ មកម៉្លេះ ក្នុងនាមជាគ្រូជំនួយ។ ជាមួយគ្នានោះដែរលោក Carles Romagosa ជនជាតិអេស្ប៉ាញ នៅតែជានាយកបច្ចេកទេសដដែល ហើយលោក Issara Sritaro ជាជំនួយការគ្រូបង្វឹក និងលោក Umarin Yaodam ជាគ្រូអ្នកចាំទី។
លោកAnurak Srikerd មានបទពិសោធន៍ដឹកនាំក្រុមជាច្រើននៅក្នុងស្រុកដូចជាក្រុម Buriram នៅឆ្នាំ២០១១ ហើយប្តូរទៅដឹកនាំក្រុម Phattalung នៅឆ្នាំ២០១១-១២ និងនៅឆ្នាំ២០១២ ដដែលដឹកនាំក្រុម Rangsit F.C. Phuket។ នៅឆ្នាំ២០១៣ លោកបានដឹកនាំក្រុម Bangkok Glass និង Chiangrai United ហើយឆ្នាំ២០១៤ ដឹកនាំក្រុម Bangkok Glass ឡើងវិញ។
អត្ថបទពាក់ព័ន្ធ៖លីគ នៅប្រទេសថៃ ៣កម្រិតដាក់ផែនការរដូវកាលថ្មី គ្រោងបញ្ចប់នៅពាក់កណ្ដាលឆ្នាំ២០២២
ចូលដល់ឆ្នាំ២០១៥ លោកទទួលដឹកនាំក្រុមជម្រើសជាតិថៃក្រោមអាយុ១៩ឆ្នាំ ហើយបន្តដឹកនាំក្រុម Bangkok Glass វិញ និងឆ្នាំ២០១៦ បន្តដឹកនាំក្រុម U19 ថៃទៀត មុនចូលរួមក្រុម Khon Kaen នៅឆ្នាំ២០១៧-១៨។ ឆ្នាំ២០១៨ ដដែលដឹកនាំក្រុម Bangkok Glass និងឆ្នាំ២០១៩ ដឹកនាំក្រុមAyutthaya United។
កាលនៅជាកីឡាករក្រៅពីប្រកបអាជីពនៅលីគកំពូលថៃ បុរសមានស្រុកកំណើតមកពីខេត្ត Samut Prakan រូបនេះ ធ្លាប់ចេញទៅប្រកបអាជីពនៅលីគកំពូលសិង្ហបុរី ២លើកដែរ គឺឆ្នាំ២០០២ ចូលរួមក្នុងក្រុម Woodlands Wellington និងនៅឆ្នាំ២០០៥ ចូលរួមក្រុម Home United (បច្ចុប្បន្នប្តូរឈ្មោះជា Lion City Sailors)។ លោកធ្លាប់ឈ្នះជើងលីគកំពូលថៃ ២លើក ជាមួយក្លិប BEC Tero Sasana និងឈ្នះពាន Kor Royal Cup ១លើក ព្រមទាំងឈ្នះពានឯកត្តជនជាកីឡាករល្អប្រចាំរដូវកាល ១លើកក្នុងឆ្នាំ២០០០។
ពេលដឹកនាំក្រុម បុរសវ័យ៤៥ឆ្នាំរូបនេះធ្លាប់ជួយក្រុម Bangkok Glass ឈ្នះពានរង្វាន់ Thai FA Cup 2014 ១លើក និងឈ្នះពានរង្វាន់ជើងឯកតំបន់អាស៊ាន AFF U19 Championship ១លើក។
អត្ថបទពាក់ព័ន្ធ៖ក្រោយលើកពានលីគកំពូលថៃ គ្រូបង្វឹករូបនេះផ្ទេរទៅដឹកនាំក្លិបដែលលោក ប៉ែន ផាត ធ្លាប់ចូលរួមកាលពីក្បែរ៥០ឆ្នាំមុន
ផែនការបន្ទាប់របស់លោកAnurak Srikerd នឹងដឹកនាំក្រុមជម្រើសជាតិថៃចូលរួមប្រកួតក្នុងពានរង្វាន់ជើងឯកយុវជនទ្វីបអាស៊ី 2022 AFC U23 Championship, វគ្គជម្រុះជើងឯកទ្វីបអាស៊ី AFC Asian Cup 2023 នៅខែតុលា ពានរង្វាន់ជើងឯកតំបន់អាស៊ាន AFF Suzuki Cup និងព្រឹត្តិការណ៍កីឡាស៊ីហ្គេមឆ្នាំ២០២១ ចុងឆ្នាំនេះដូចគ្នា៕